باس قالانىڭ 20 جىلدىق مەرەيتويىنا وراي ارنايى ۇيىمداستىرىلعان جاس كينوگەرلەر بايقاۋىنا 10 رەجيسسەر تاڭدالىپ الىنىپ, ۇزدىك جۇمىستار «قازىعۇرتفيلم» كينوستۋدياسىندا تاسپالاندى. جوبانىڭ باس پروديۋسەرى – قازاقستاننىڭ ەڭبەك سىڭىرگەن قايراتكەرى ءسابيت ابدىحالىقوۆ. كوركەمدىك تالاپ تۇرعىسىنان باعالاپ, ساراپتاعان – كينورەجيسسەر, قازاقستان رەسپۋبليكاسىنىڭ ەڭبەك سىڭىرگەن قايراتكەرى ساتىبالدى نارىمبەتوۆ باستاعان كينەماتوگرافيا سالاسىنىڭ كاسىبي ماماندارى.
«بۇل فەستيۆالدى ۇيىمداستىرۋداعى ەڭ باستى ماقسات – تاقىرىپ ءوز الدىنا, جاستاردىڭ جۇلدىزىن جاعىپ, كينو الەمىنە 10 جاڭا ەسىم اكەلگىمىز كەلدى. كوپتەگەن جاستارىمىز حالىقارالىق بايقاۋلارعا قاتىسىپ, جۇلدەلى ورالىپ ءجۇر. بىراق وكىنىشكە قاراي, ول جۇمىستاردىڭ بارلىعى اۆتورلىق كينو – ارتحاۋس باعىتىندا تۇسىرىلگەندىكتەن, كينوتەاترلاردا كوپ كورسەتىلە بەرمەيدى. كورەرمەن مەن كينوگەرلەر اراسىندا كوپىر بولساق دەگەن ۇسىنىسىمىزدى مادەنيەت جانە سپورت ءمينيسترى ارىستانبەك مۇحامەدي ۇلى قۋانا قولداپ, جاستاردىڭ شىعارماشىلىق تىنىسىن سەزىنىپ, قيال-قارىمىن ايقىنداۋعا تاماشا مۇمكىندىك الدىق», دەيدى فەستيۆالدىڭ باس ساراپشىسى, بەلگىلى كينورەجيسسەر ساتىبالدى نارىمبەتوۆ.
10 رەجيسسەر استانا قالاسىنا قاتىستى ءوربيتىن ون ءتۇرلى تاقىرىپتى قوزعاپ, سۋرەتكەرلىك قيال-قارىمى مەن كاسىبي شەبەرلىكتەرىن ساراپشىلار تالقىسىنا ۇسىندى. ولاردىڭ قاتارىندا: ماقسات وسپانوۆتىڭ «استانا اسپانى», سامات ءالىمنىڭ «سارباز», ەلەنا ليساسينانىڭ «قازىنا», ايدىن ساحاماننىڭ «باقىت ءبيى», ارداق تولەۋبايدىڭ «وزبەك قۇدا», بەكسۇلتان ءانۋاروۆتىڭ «التىن بالىق», ايگۇل اقسامبيەۆانىڭ «يا تەبيا سلىشۋ», رۋستام ءوتارشيننىڭ «چەمودان», سافۋان شايمەردەنوۆتىڭ «نۇرلى جولدا» جانە جاندوس قۇسايىنوۆتىڭ «قۇتتى قوناق» قىسقامەترلى كارتينالارى بار. «Positive» قىسقامەترلى فيلمدەر فەستيۆالى باعدارلاماسىنا ەنگەن 10 كارتينانىڭ 6-اۋى كومەديا جانرىندا تۇسىرىلسە, 4 تۋىندى درامالىق سيۋجەتكە قۇرىلىپتى. اتالعان فيلمدەردەگى باستى رولدەردى جالعاس تولعانباي, سانجار ماديەۆ, ەرنار جۇماتاەۆ, جانار ماقاشەۆا, ءابىلمانسۇر سەرىكوۆ, اقمارال تاناباەۆا باستاعان وتاندىق اكتەرلەرمەن قاتار, وزبەكستاننىڭ حالىق ءارتىسى مۇرات رادجابوۆ, رەسەيدىڭ حالىق ءارتىسى, تەاتر جانە كينو اكتەرى يۋري كۋزنەتسوۆ, رەسەيلىك تانىمال كينواكتريسا ولگا كۋزمينا, تالانتتى قىرعىز اكتەرى ءازيز بەيشەناليەۆ جانە تاعى باسقا ونەر مايتالماندارى كەيىپتەدى.
«رەجيسسەرلەر جۇمىسى نەگىزىنەن استانانىڭ ەڭ ءبىر كورىكتى, ءپوزيتيۆتى ساتتەرى سۋرەتتەلەتىن كورىنىستەرى مەن ساۋلەتتى دە ءساندى ارحيتەكتۋراسىن, جالپى باس قالامىزدىڭ بۇگىنگى رۋحاني تىنىسىن كوركەم تىلدە, ياعني كينو تىلىندە بەينەلەۋگە باعىتتالدى. ادامدى ەرەكشە اسەرگە بولەپ, كوتەرىڭكى كوڭىل كۇي سىيلايتىن ستسەناريلەرمەن جۇمىس جاسادىق. ءار ءفيلمنىڭ ايتار ويى مەن قامتيتىن سيۋجەتى بولەك بولعانىمەن, بارلىعىنا ورتاق ماقسات بىرەۋ. ول – ەلدىگىمىزدى, ەڭسەلى ەلوردامىزدىڭ جەتىستىكتەرىن دارىپتەۋ», دەيدى جوبا پروديۋسەرى ءسابيت ابدىحالىقوۆ.
راس, قىسقامەترلى فيلم – رەجيسسەر شەبەرلىگىنىڭ شىڭدالىپ, شىعارماشىلىق قيال مۇمكىندىگىنىڭ ناعىز سىنالار تۇسى. ۇزاقتىعى 2 ساعاتقا سوزىلاتىن فيلمدەردەگىدەي ەمەس, بۇل جەردە اينالدىرعان 15 مينۋت ۋاقىتتىڭ ىشىنە بارلىق ايتقىڭ كەلگەن ويدى سىعىمداپ سىيدىرىپ, كينو تىلىندەگى ىقشام عانا, بىراق كوركەمدىك قۋاتى تولىقمەترلى كارتينالاردان تيتتەي دە كەم ەمەس دۇنيە تۋدىرۋ.
باس شاھار تورىندەگى «قازاقستان» ورتالىق كونتسەرت زالىندا كورسەتىلگەن 10 ءتۇرلى تاقىرىپتا تۇسىرىلگەن ءدال سونشا ءفيلمدى كورىپ, الۋان ويدىڭ جەتەگىنە ەرىپ, كورەرمەن زالىنان تۇسىنىكسىزدەۋ سەزىمدە شىققانىمىز سوندىقتان بولسا كەرەك. بۇل فەستيۆالدا دا ساۋاتتى, وقيعانى شىتىرمان سيۋجەتكە قۇرا الاتىن ستسەناريستەر تاپشىلىعىمەن بەتپە-بەت كەلدىك. استانا دەگەندە ساناۋلى عانا سيۋجەتتىڭ اينالاسىنا توقايلاسقان فيلمدەردە وقيعا كوپ, بىراق ادامنىڭ كوڭىلىن قوزعاپ, جان دۇنيەسىن الەمتاپىرىق كۇيگە بولەيتىن تەرەڭدىك, ەستە قالارلىق ديالوگ از. ايتسە دە ءبىزدى قۋانتقانى – قازاق كينوسىنداعى سونداي ءبىر ولقىلىقتاردىڭ ورنىن تولتىرۋعا باعىتتالىپ «Positive» فەستيۆالى سەكىلدى اۋقىمدى جوبالاردىڭ قولعا الىنۋى. اتالعان كينوبايقاۋ ارقىلى ونەر الەمى بولاشاقتا قازاق كينوسىنىڭ تۋىن كوككە كوتەرەتىن جاڭا ەسىم, تىڭ تالپىنىستارمەن تانىستى. ارينە العاش رەت ۇيىمداستىرىلىپ, تۇڭعىش رەت دوداعا ءتۇسىپ تۇرعاننان كەيىن دە كەيبىر تۇستا كەمشىلىكتىڭ كەتىپ جاتۋى زاڭدىلىق جانە ول قاۋىپ ەمەس. باستىسى – فيلم تۇسىرۋگە, كەيىپكەرلەرىن كينو تىلىندە سويلەتۋگە باعىتتالعان تالپىنىستىڭ, العاشقى قادامنىڭ جاسالعانى. «Positive» فەستيۆالىنىڭ باستى ءپوزيتيۆى دە وسىندا بولسا كەرەك, بىزدىڭشە.
حوش, سونىمەن ءومىر شىندىعىن ونەر بيىگىندە بەدەرلەۋگە تالپىنعان ءتۇرلى دەڭگەيدەگى جۇمىستاردى سارالاي كەلە, ماماندار قاتىسۋشىلاردى ارنايى اتالىمدار بويىنشا ماراپاتتادى.
«ۇزدىك فيلم» جۇلدەسىنە ايگۇل اقسامبيەۆانىڭ رەجيسسەرلىك قولتاڭباسىندا كورەرمەنىنە جول تارتقان «يا تەبيا سلىشۋ» ءفيلمىنىڭ ۇجىمى يە بولدى. «ۇزدىك اكتەر» اتالىمىنداعى سىيلىق – وزبەكستاننىڭ حالىق ءارتىسى مۇرات رادجابوۆقا بۇيىرسا, ع.مۇسىرەپوۆ اتىنداعى اكادەميالىق بالالار مەن جاسوسپىرىمدەر تەاترىنىڭ اكتريساسى جانار ماقاشەۆا «ۇزدىك اكتريسا», «يا تەبيا سلىشۋ» ءفيلمىنىڭ اكتەرى ۆيللي پىلكوۆ-ۆايدمان «ەكىنشى پلانداعى ۇزدىك اكتەر» اتاندى. سونىمەن قاتار ساراپشىلار القاسىنىڭ شەشىمىمەن «ەڭ ۇزدىك رەجيسسەرلىك جۇمىس» – «سارباز» ءفيلمىنىڭ رەجيسسەرى سامات الىمگە, «ەڭ ۇزدىك وپەراتورلىق جۇمىس» – «يا تەبيا سلىشۋ» كارتيناسىنىڭ وپەراتورى رينات قوسانعا, «ەڭ ۇزدىك ستسەناري» – «استانا اسپانى» ءفيلمىنىڭ ستسەناري اۆتورى نۇرجان تۇتوۆقا, «ەڭ ۇزدىك ءپوزيتيۆتى فيلم» – بەكسۇلتان ءانۋاروۆتىڭ «التىن بالىق» تۋىندىسىنا, «ەڭ ۇزدىك مونتاج» – رۋستام ءوتارشيننىڭ «چەمودان» كارتيناسىنا, «ەڭ ۇزدىك سۋرەتشى» اتالىمىنداعى جۇلدە – «قۇتتى قوناق» ءفيلمىنىڭ سۋرەتشىسى ەركەن سۇلەيمەنوۆكە, «ەڭ ۇزدىك گريم» اتالىمىنداعى سىيلىق «استانا اسپانى» ءفيلمىنىڭ گريمدەۋشى مامانى دانيار سادىعۇلوۆقا تابىستالدى. بۇدان بولەك, «قازىلار القاسىنىڭ ارنايى سىيلىعى» – ايدىن ساحاماننىڭ «باقىت ءبيى» كارتيناسىنا, ال دەبيۋتتىك جۇمىسى ءۇشىن «ارنايى سىيلىق» «نۇرلى جولدا» ءفيلمىنىڭ رەجيسسەرى سافۋان شايمەردەنوۆكە بەرىلدى. سونداي-اق شەتەلدىك قوناق اكتەرلەر يۋري كۋزنەتسوۆ, ۆلاديمير مويسەەنكو, ازيز بەيشەناليەۆ, ازامات نىعمانوۆقا ۇيىمداستىرۋشىلار تاراپىنان ارنايى سىيلىقتار تابىس ەتىلدى. ماراپاتتاۋ ءراسىمىنىڭ سوڭىندا فەستيۆالدىڭ قۇرمەتتى قوناعى بولعان قازاقستاننىڭ ەڭبەك ەرى, كسرو جانە قازاقستاننىڭ حالىق ءارتىسى ءاسانالى ءاشىموۆ جاس كينوگەرلەرگە ساتتىلىك تىلەپ, اق باتاسىن بەردى.
نازەركە جۇماباي,
«ەگەمەن قازاقستان»
