قوعامدىق كەڭەس مۇشەلەرى وتىرىس بارىسىندا ءتورت نەگىزگى ماسەلەنى تالقىعا سالدى. ونىڭ العاشقىسى, قالا مەن اۋىلداعى تەلەفون بايلانىسىن دامىتۋدىڭ وزەكتى ماسەلەلەرىنە ارنالدى. قوعامدىق كەڭەستىڭ مۇشەسى دۋلات ورازالينوۆ تاقىرىپ بويىنشا بايانداما جاساپ, قازىرگى تاڭدا تۇتاس قازاقستاندى ساپالى بايلانىسپەن قامتاماسىز ەتۋدىڭ جولدارىمەن تانىستىرىپ ءوتتى. ونىڭ ايتۋىنشا, قازاقستاندا ءموبيلدى بايلانىس سالاسىنداعى كەڭجولاقتى ينتەرنەتكە قولجەتىمدىلىك 2015 جىلدان بەرى كۇرت ارتقان. اسىرەسە ەلىمىزدەگى قالا تۇرعىندارىنىڭ LTE بايلانىس جۇيەسى ەنگىزىلگەلى بەرى عالامتورعا قولجەتىمدىلىگى ارتسا, اۋىلدار مەن اۋداندىق ورتالىقتار ودان كەنجەلەۋ قالدى. سەبەبى اۋدان ورتالىقتارىندا ارنايى تەحنيكالار از.
سونىمەن بىرگە اۋىلدار مەن قالا تۇرعىندارى اراسىندا ستاتسيونارلىق تەلەفوننان باس تارتىپ, ۇيالى بايلانىس تەلەفوندارىنا كوشۋشىلەر سانى كوبەيۋدە. «بۇگىندە قازاقستاننىڭ 4 پروتسەنت حالقىن ەسەپتەمەگەندە, ەلىمىزدىڭ بارلىق تۇرعىندارى 2 G دەڭگەيىندە ۇيالى بايلانىس جەلىسىمەن تولىق قامتىلعان. ەلىمىزدىڭ ۇيالى بايلانىس وپەراتورلارى حالىق سانى مىڭنان اساتىن اۋىلدارعا بايلانىس ورناتىپ, 2020 جىلعا دەيىن 500-دەن اساتىن تۇرعىنى بار اۋىلدارعا بايلانىس جەلىسىن ورناتۋعا مىندەتتەمە العان. بۇل تۇرعىندار سانى وتە از اۋىلدارعا دا 2 G دەڭگەيلى ۇيالى بايلانىس كەلەدى دەگەن ءسوز. اۋەل باستا اۋىلدارعا بايلانىس ورناتۋشى ۇيالى بايلانىس وپەراتورلارى شىعىنعا ۇشىرادى. سول سەبەپتى 2004 جىلدان باستاپ بايلانىستىڭ وسى ءتۇرىن سۋبسيديالاۋ تۋرالى ارنايى زاڭناما قابىلداندى. بۇگىنگى تاڭدا قابىلدانعان شارا وزىنە ارتىلعان جۇكتى تولىققاندى وتەپ, ءىرى اۋىلدارداعى سۋبسيديالاۋدى توقتاتۋعا بولاتىندىعىن, سونىمەن بىرگە ۇيالى بايلانىس وپەراتورلارىنىڭ اراسىندا ەركىن باسەكەلەستىك جۇرگىزۋ مۇمكىن ەكەندىگىن كورسەتىپ وتىر. الايدا تۇرعىندار سانى وتە از, 50-100 شاقتى ادامنان قۇرالاتىن اۋىلداردا بايلانىس جوق. بولعان كۇننىڭ وزىندە ولاردا ۇيالى بايلانىس وپەراتورلارى اراسىندا باسەكەلەستىك بولۋى مۇمكىن ەمەس. سوندىقتان سۋبسيديالاۋدى توقتاتۋ مۇمكىن ەمەس», دەدى د.ورازالينوۆ.
قوعامدىق كەڭەس وتىرىسى بارىسىندا 1414 بىرىڭعاي بايلانىس ورتالىعىنىڭ قىزمەتى تۋرالى, سونىمەن قاتار اشىق ۇكىمەتتى دامىتۋ, ونىڭ ىشىندە ازاماتتاردى اشىق ۇكىمەتتى قالىپتاستىرۋعا تارتۋ ماسەلەلەرى, مينيسترلىكتىڭ ادەپ جونىندەگى ۋاكىلىنىڭ قىزمەتى تۋرالى ءسوز بولدى.
ۆەنەرا تۇگەلباي,
«ەگەمەن قازاقستان»
