بىرەگەي شىعارماشىلىق مۇرا بولىپ تابىلاتىن وسى ىرگەلى ەڭبەكتەردە العاش رەت XV ع. مەن XX عاسىردىڭ باسىنداعى قازاقتاردىڭ كوشپەلى قوعامىنىڭ الەۋمەتتىك-ەكونوميكالىق قۇرىلىمىنىڭ تۇبەگەيلى جاڭا تۇجىرىمداماسى ۇسىنىلىپ, نەگىزدەلگەن. قازاقستان ەكونوميكاسىنىڭ رەۆوليۋتسيا الدىنداعى كەزەڭدەردەن وتكەن عاسىردىڭ 60-شى جىلدارىنا دەيىنگى قالىپتاسۋى مەن دامۋ ەرەكشەلىكتەرىمەن قاتار اۋىر جانە جەڭىل ونەركاسىپ, كولىك, اۋىل شارۋاشىلىعى سالالارىنىڭ پايدا بولۋى مەن قالىپتاسۋى, العاشقى بەسجىلدىق كەزەڭىندەگى, سونداي-اق سوعىس جانە سوعىستان كەيىنگى جىلدارداعى رەسپۋبليكاداعى ونەركاسىپ كاسىپورىندارىن قۇرۋدىڭ كەزەڭدەرى قاراستىرىلعان.
قوس عالىمنىڭ عىلىمي ەڭبەكتەرى وتاندىق ەكونوميكا ءىلىمى مەن قازىرگى ەگەمەن قازاقستاننىڭ تاريحى ماسەلەلەرىنە قىزىعۋشىلىق تانىتاتىن ورتاعا اسا ماڭىزدى باسىلىم بولىپ تابىلادى.
وسى مازمۇنداعى پىكىرلەرىمەن بولىسكەن ەكونوميكا ينستيتۋتىنىڭ ديرەكتورى ءازىمحان ساتىبالدين, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, پروفەسسور زيابەك قابىلدينوۆ, اكادەميكتەر حانگەلدى ءابجانوۆ, ورازالى سابدەن, امانجول قوشانوۆ جانە دە بولات جۇماعۇلوۆ, تالاس وماربەكوۆ, ت.ب. عالىمدار ەكونوميكا, تاريح سالاسىنداعى عىلىمي زەرتتەۋلەردىڭ قاينارىندا تۇرعان عالىمداردىڭ ەڭبەكتەرىنىڭ ەلىمىز عىلىمىنىڭ دامۋىنداعى زەردەلى باسىلىم ەكەندىگىنە توقتالدى.
اتالعان ءىس-شاراعا بەلگىلى عالىمدار, مەملەكەتتىك باسقارۋ ورگاندارىنىڭ وكىلدەرى, ساراپشىلار قاتىستى.
ەلۆيرا سەرىكقىزى,
«ەگەمەن قازاقستان»
الماتى
