كەشكە قاتىسۋشىلار الدىمەن كامشات بايعازىنىڭ ءومىرى مەن ەڭبەك جولىن ەسكە تۇسىرەتىن سۋرەتتەر كورمەسىن تاماشالادى. اپايدىڭ ۇلكەن كەلىنى اقمارال جاقسىباەۆا ەنەسى تۋرالى كوپشىلىك بىلە بەرمەيتىن اقپاراتتاردى دا ورتاعا سالدى.
«انامىز تۋرالى ونىڭ كوزى ءتىرى كەزىندە كوپتەگەن فوتوسۋرەتتەر جاريالانىپ جاتاتىن. بىراق قولىمىزدا ءالى ەشكىم كورمەگەن, انامىزدىڭ ۇلبىرەگەن جاس شاعىنداعى سۋرەتتەرى بار. ونى بىلتىر ەنەم قايتىس بولعاننان كەيىن ءبىر اجەمىز اكەلىپ بەردى. كونە سۋرەتتى ءبىز وڭدەتىپ الدىق. سونىمەن قاتار ۆەنگريادا تۇسكەن, ەنەم ءبىر ۆەنگر بالاسىنا كىندىك شەشە بولعانداعى سۋرەتى دە ءبىز ءۇشىن قۇندى» دەدى اقمارال.
اقمارالدىڭ ايتۋىنشا, كامشات اپانىڭ ءوزىنىڭ قايتار الدىندا تاپسىرۋىمەن, ول كىسى تۋرالى بارلىق ماتەريالداردى جيناقتاپ, بالالارى كىتاپ شىعارۋ ءىسىن قولعا الىپتى. قازاقستاندا تالاي قىزدىڭ اتى كامشاتتىڭ قۇرمەتىنە ونىڭ ەسىمىمەن اتالعانى دا بەلگىلى. كەشتە كوزكورگەندەر بىلتىر عانا ارامىزدان كەتكەن قازاقتىڭ دانا قىزى تۋرالى ەستەلىكتەر ايتتى. ونىمەن ەگىس القابىندا بىرگە ەڭبەك ەتكەن, مەڭدىعارا اۋدانىنىڭ سوسنوۆ سەلولىق وكرۋگى ارداگەرلەر كەڭەسىنىڭ توراعاسى اناتولي شابانوۆ تولقي سويلەدى.
«مەنەن «كامشات بايعازىقىزى قانداي بولىپ ەدى؟» دەپ سۇرايتىندار كوپ. «ول كىسى سەن مەن مەن سياقتى وتە قاراپايىم بولعان» دەپ جاۋاپ بەرەمىن. ءبىز 1972 جىلدان بىرگە ەڭبەك ەتتىك.ماعان شارۋاشىلىقتا تراكتور ايدايتىن ايەل بار دەگەن سوڭ, ءوزىم ىزدەپ بارىپ تانىسقانمىن. كامشات الدىمەن متز تراكتورىن ايدادى,ونىڭ ءىشى سۋىق, جازدا جەلدەتكىشى دە بولمايتىن. كەيىن وقىپ, «كيروۆەتس» تراكتورىن الدى. وتە ەڭبەكقور ەدى. ول القاپقا تاڭەرتەڭ ەرتە باراتىن, سودان ۇيىنە تۇندە ءبىر-اق قايتادى عوي. كامشاتتى بارلىعى سىيلايتىن, الدىنان وتپەيتىنبىز.ول كىسى شارۋاشىلىققا كەلگەن ك-700 تراكتورىن سىناۋعا دا كەلىسكەن بولاتىن. تراكتور سىنىپ قالىپ, جيىن-تەرىن كەزىندە جۇمىس توقتاپ قالعاندا, ول كىسى لەنينگرادتاعى زاۋىتقا ءوزى تەلەفون شالىپ, جوندەيتىن توپتى اينالاسى ءبىر كۇننىڭ ىشىندە العىزعانى ەسىمدە. قاراپايىمدىلىعى, ىزەتتىلىگىمەن قاتار, وسىنداي تالاپشىلدىعى دا بولاتىن» دەپ اڭگىمەلەدى اناتولي شابانوۆ اقساقال.
ء نازيرا جارىمبەت,
«ەگەمەن قازاقستان»
قوستاناي
