ەۋرازيالىق ەكونوميكالىق وداق ماسەلەلەرى جونىندەگى وكىلەتتى وكىل اقمارال قابدەنوۆانىڭ ايتۋىنشا, دارىلىك زاتتاردىڭ ۋاقتىلى جانە ساپالى ساراپتاماسى قاۋىپسىز, ءتيىمدى جانە ساپالى ءدارى-دارمەكتەرمەن قامتاماسىز ەتۋدىڭ نەگىزى بولىپ تابىلادى.
قازاقستاننىڭ مەملەكەتتىك فارماكوپەياسىنىڭ تالاپتارىنا سايكەس كەلمەيتىن ءدارى-دارمەكتەردى نارىققا جىبەرمەۋ بارىسىنان جايىنان حاباردار ەتكەن سىناق ورتالىعىنىڭ ديرەكتورى تاتيانا ابراموۆا زەرتحانالاردا فيزيكالىق-حيميالىق, يممۋنوبيولوگيالىق, توكسيكولوگيالىق, ميكروبيولوگيالىق جانە باسقا دا سىناقتار وتكىزىلەتىندىگىن اتاپ ءوتتى.
بۇگىندە اتالعان ورتالىقتا دارىلىك پرەپاراتتاردىڭ ساپاسى مەن قاۋىپسىزدىگىن باقىلاۋعا ارنالعان 1000-نان استام بىرلىك قۇرال-جابدىق بار. زەرتحانالاردىڭ ورنالاسۋى مەن جۇمىس ايماقتارى حالىقارالىق ستاندارتتارعا سايكەس جابدىقتالعان ءارى ەۋروپالىق ۇلگىدەن كەم تۇسپەيدى.
2015 جىلى سىناق ورتالىعىنا دارىلىك پرەپاراتتاردىڭ فيزيكالىق-حيميالىق سىناقتارى بويىنشا EDQM/MJA-093 (European Directorate for the Quality of Medicine) اككرەديتاتسيالىق اتتەستاتى بەرىلگەن. ال 2018 جىلعى شىلدەدە ورتالىق مەديتسينالىق ماقساتتاعى بۇيىمداردىڭ فيزيكالىق-حيميالىق سىناقتارى جانە دارىلىك پرەپاراتتار مەن مەديتسينالىق ماقساتتاعى بۇيىمداردىڭ بيولوگيالىق سىناقتارى تۇرعىسىنان اككرەديتاتسيالاۋ سالاسىن كەڭەيتۋ جانە قولدانىلاتىن اتتەستاتتى راستاۋ ماقساتىندا EDQM تاراپىنان جۇرگىزىلگەن اۋديتتەن وتكەن. ورتالىق OMCL دارىلىك پرەپاراتتاردىڭ ساپاسىن باقىلاۋ جونىندەگى رەسمي زەرتحانالاردىڭ جالپى ەۋروپالىق جەلىسىنىڭ (GEON) مۇشەسى بولىپ تابىلاتىندىعى ISO/IEC 17025 حالىقارالىق ستاندارتى جانە EDQM ديرەكتيۆالارىنىڭ تالاپتارىنا سايكەستىگىنىڭ ايعاعى.
ەلۆيرا سەرىكقىزى,
«ەگەمەن قازاقستان»
الماتى
