12-13 قىركۇيەك كۇندەرى شاھار ومىرىندەگى شۋاقتى شارالاردىڭ ءبىرى – اشىق اسپان استىندا جىل سايىن ۇيىمداستىرىلاتىن ءىح وركەسترلەر فەستيۆالى ءوتتى. قازاق ونەرى مەن مادەنيەتىنە قىزمەت ەتىپ كەلە جاتقان ماڭىزدى شىعارماشىلىق ۇجىمداردىڭ, سونداي-اق مۋزىكا اسپاپتارىندا وينايتىن جەكە ورىنداۋشىلار مەن ۆوكال شەبەرلەرىنىڭ قاتىسۋىمەن ەكى كۇن بويىنا وركەسترلىك اۋەن اۋەدە قالىقتاپ تۇردى.
ساحنا تورىندە قۇرمانعازى اتىنداعى قازاق مەملەكەتتىك اكادەميالىق ۇلت اسپاپتارى وركەسترى, ن.تىلەنديەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترى, الماتى قالاسى اكىمىنىڭ ەسترادالىق-سيمفونيالىق وركەسترى جانە قازاقستان رەسپۋبليكاسىنىڭ مەملەكەتتىك ۇرمەلى اسپاپتار وركەسترىنىڭ ءبىر مەزگىلدە ونەر كورسەتۋى كاسىبيلىكتى عانا ەمەس, ونەردەگى ىنتىماقتى, ۇجىمداعى ورىستەۋ مەن دامۋدى دا ايگىلەگەندەي بولدى. مەرەكەنىڭ العاشقى كۇنى كلاسسيكالىق مۋزىكا اۋەسقويلارىنا «كۇيدەن كلاسسيكاعا دەيىن» اتتى تاماشا مۋزىكالىق باعدارلاما ۇسىنىلدى. العاشقىدا الىستان قالىقتاپ جەتكەن مۋزىكا ۇنىنە ەلتىپ جينالا باستاعان شوعىردىڭ قاراسى سيرەك بولعانىمەن, كەشكە قاراي شوقتانا تۇسكەن جۇزدەگەن, مىڭداعان كورەرمەن اباي ەسكەرتكىشىنىڭ اينالاسىن دۇبىرلەتكەن ناعىز وركەسترلەر شەرۋىن تاماشالادى. اشىق اسپان استىنداعى كونتسەرتتە قازاقتىڭ اسپاپتىق جانە ۆوكالدىق كلاسسيكاسىنىڭ جاۋھارلارى, حالىق اندەرى, ورىس جانە ەۋروپالىق اۆتورلاردىڭ كلاسسيكالىق اۋەندەرى, زاماناۋي سازگەرلەردىڭ شىعارمالارى, كينوفيلمدەردىڭ ساۋندترەكتەرى بىرىنەن سوڭ ءبىرى ورىندالىپ جاتتى. وركەسترلەردىڭ سۇيەمەلدەۋىمەن زارينا التىنباەۆا, ءجاميلا سەركەباەۆا, ۇلتۋ قاباەۆا, باقىت تۇرمانوۆا, فارحات كۋبيەۆ, دانيار بايجۇمانوۆ, نۇرسۇلتان شاتىرحان ۇلى سياقتى وپەرا, سيمفونيالىق ساز شەبەرلەرى, ەسترادا ورىنداۋشىلارى ونەر كورسەتسە, «Satzhan project», «Ifly» توپتارىنىڭ ونەرپازدارى دا جۇلدىزدى كەشتى جارقىراتا ءتۇستى.
ايگۇل احانبايقىزى,
«ەگەمەن قازاقستان»
الماتى
