ادەبي كەشكە اقىن وڭايگۇل تۇرجان, كينوتانۋشى, ونەرتانۋ كانديداتى ءنازيرا راحمانقىزى, قازاقستاننىڭ ەڭبەك سىڭىرگەن قايراتكەرى روزا مۇقانوۆا جانە «ەگەمەن قازاقستان» گازەتىنىڭ جۋرناليستەرى مەن ادەبيەت الەمىندە جۇرگەن شىعارماشىل جاستار قاتىستى. ايتۋلى كەزدەسۋدى «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى اقپارات جانە كوممۋنيكاتسيالار ءمينيسترى داۋرەن اباەۆتىڭ قۇتتىقتاۋ سوزىمەن اشىپ بەردى.
كەزدەسۋ بارىسىندا قادىرلى قوناقتار ءسوز الىپ, مەرەيتوي يەسىنىڭ شىعارماشىلىق الەمىنەن جان-جاقتى سىر قوزعاسا, جاستار جاعى وسى ءساتتى پايدالانىپ سۇيىكتى قالامگەرىنە كوكەيىندە جۇرگەن قىزىقتى ساۋالدارىن قويىپ, تۇشىمدى جاۋاپ الدى. سىرلاسۋ ستيلىندە وتكەن جۇزدەسۋدىڭ ەرەكشەلىگى دە سول – مۇندا جازۋشى بۇعان دەيىن ەشبىر جەردە ايتىلماعان تىڭ دەرەك, قىزىقتى ساتتەرىمەن بۇكپەسىز ءبولىستى. وقىرماندارىنا جان سىرىن اقتاردى.
«كۇلدىرۋ ءۇشىن ايتايىن: مەن كىتاپتى شالقامنان جاتىپ وقيمىن. سوسىن اسىقپايمىن. ەكى-ءۇش بەتتەن كەيىن جاۋىپ قويامىن. سودان اراعا ءبىرشاما ۋاقىت سالىپ ءارى قاراي جالعاستىرىپ وقيمىن. ءبىر وقىعانىمدى كەيىن قايتادان قايتالاپ وقۋ – جاس كۇنىمنەن كەلە جاتقان جاقسى ادەتتەرىمنىڭ ءبىرى دەپ سانايمىن. سەبەبى سىرىلداتىپ وقىپ, سيۋجەتتى عانا قۋىپ كەتسەڭ, ول وقۋ ەمەس. مەن كىتاپتىڭ, ونداعى وقيعانىڭ ىشىنەن وزىمە ۇستاز ادامنىڭ مىنەزىن ىزدەيمىن. كىتاپ – ۇستاز.
شەبەرلىك دەگەننىڭ ءوزى بىلىمگە بايلانىستى. كوپ وقۋ ارقىلى ءوز ءستيلىڭدى قالىپتاستىراسىڭ. ءومىردى كوشەدەن عانا ءبىلىپ قالماڭدار, ءومىردى ادەبيەتتەن قابىلداۋ, سودان ۇيرەنۋ كەرەك. ودان كەيىن تاعى ءبىر ايتارىم – جازۋشىعا ءومىربايان قاجەت. ەگەر بولماسا, قولدان جاساۋ كەرەك. قيىندىقتان, وزگەرۋدەن قورىقپاعان, اعىسقا قارسى جۇزۋدەن جۇرەكسىنبەيتىن ادامنان جاقسى جازۋشى شىعادى» دەگەن قالامگەر كەزدەسۋگە جينالعان جاستارعا اقىلىن ايتىپ, شىعارماشىلىق تاجىريبەسىمەن ءبولىستى.
اكىم تارازي – ادەبيەت الەمىنىڭ عانا الىبى ەمەس, كينو مەن تەاتر دراماتۋرگياسىندا دا سۋرەتكەر سالعان سارا جول سايراپ جاتىر. قالامگەر ستسەناريى بويىنشا كورەرمەنگە جول تارتقان «تۇلپاردىڭ ءىزى», «قاراش-قاراش وقيعاسى», «مۇستافا شوقاي» فيلمدەرىنىڭ قاي-قايسىسى دا مازمۇن تەرەڭدىگى, تاريحي دەرەكتەردى كوركەمدىك تۇرعىدان شەبەر سويلەتۋىمەن جانە دە ءبىر-بىرىنە ۇقسامايتىن تىڭ دا كۇردەلى بەينەلەردى شىنايى جەتكىزۋىمەن قۇندى. اكىم تارازي بويىنداعى شىعارماشىلىق تىڭ قۋات پەن شىنايى شەبەرلىكتەن بولەك, جازۋشىنىڭ ازاماتتىق بولمىسىنداعى باتىلدىق پەن بىربەتكەيلىك, وجەتتىك تە ءاربىر تۋىندىسىنىڭ تابيعاتىنا بەرىك ورنىعىپ, سونىسىمەن دە قالامگەردىڭ وزىنە عانا ءتان دارالىق تۇزگەن. سول مىنەزىمەن, ءوز كوزقاراسىنان اينىماس ادالدىعىمەن كەزىندەگى قىلىشىنان قان تامعان قيىن كەزەڭدەردىڭ وزىندە تاس جارعان تارازي تالانتى, تارازي شەبەرلىگى وقىرمانىنا سونىسىمەن ىستىق, سونىسىمەن اياۋلى.
«بۇل كىسى – ادەبيەت الەمىنىڭ اكىمى! اكىم اعامىز اۋليەاتا ءالى «دجامبۋل» اتالىپ جۇرگەندە تاراز اتاۋىن تىرىلتكەن تۇلعا! داموللا ءاشىمنىڭ ءۇمىتىن ارقالاعان ول كىسىنىڭ ازان شاقىرىپ قويعان اتى – حاكيم. دالىرەك ايتقاندا, حاكىم! حاكىم – دۇنيەنىڭ تۇپكى ءمانىن تەرەڭ ۇققان عۇلاما, xيكمەت-سىردىڭ يەسى دەگەن ماعىنا بەرەدى. ابايدى xاكىم دەيتىنىمىز سوندىقتان. اكىم اعامىز – راسىندا, ابايشا ايتقاندا, «اقىرىن ءجۇرىپ, انىق باساتىن, قالىبى وزگەرمەيتىن, مىنەزى ءمىنسىز, اينىمايتىن اسىل ادام» دەپ قۇتتىقتاۋ لەبىزىن جەتكىزگەن باسىلىم باسشىسى دارحان قۋاندىق ۇلى تاعىلىمدى كەش سوڭىندا مەرەيتوي يەسىنە بارشا ۇجىم اتىنان شاپان جاۋىپ, قۇرمەت كورسەتتى. شىنايى وربىگەن ادەبي اڭگىمەدەن رۋحاني ءلاززات العان وقىرمان قاۋىم دا كەزدەسۋدەن مارقايىپ تارقاستى.
نازەركە جۇماباي,
«ەگەمەن قازاقستان»
