«جول مۇراتى – جەتۋ» ەكەنىن كەز كەلگەن جولاۋشى جاقسى تۇسىنەدى. ساپارعا شىققاندا دىتتەگەن مەجەگە جەتىپ اياق شالدىرعانشا تاعات تاپپايتىنى سوندىقتان. اراقاشىقتىق جاقىن بولسا, ءبىر ءسارى. ال «جول ازابىن جۇرگەن بىلەدى» دەمەكشى, ۇشقان قۇستىڭ قاناتى, جۇگىرگەن اڭنىڭ تۇياعى تالاتىن قازاقتىڭ سايىن دالاسىنىڭ ءبىر شەتىنەن ەكىنشى شەتىنە بارۋ ءۇشىن تالاي قىردى ارتقا تاستاپ, نەبىر قيىندىقتار مەن اۋىرتپالىقتاردى ەڭسەرۋگە تۋرا كەلەدى. ونىڭ ۇستىنە ۇلتىمىزدىڭ ۇيدەن قىرىق قادام ۇزاپ شىققان جولاۋشىنى مۇساپىرگە تەڭەيتىنى بار. وسىندايدا جول بويىنداعى سەرۆيستىك نىساندار ۇزاق جولدان شارشاپ, قاجىپ كەلە جاتقان جاندى وتباسىنا ورالعانداي قۇشاق جايا قارسى الىپ, ءدامدى اس-سۋىن, جايلى جاتىن ورنىن ۇسىنىپ, ءمىنسىز قىزمەت كورسەتىپ جاتسا, كانەكي! دەمنىڭ اراسىندا قىرىسقان قاباق جازىلىپ, بوي دا, وي دا سەرگىپ, ەڭسەنى ەزگەن, جۇيكەنى جۇقارتقان جايسىزدىق ءاپ-ساتتە ۇمىتىلار ەدى. جانە دە قازاقستان ەۋرازيالىق ەكونوميكالىق وداققا, بىرىڭعاي كەدەن كەڭىستىگىنە قوسىلعالى الىس, جاقىن ەلدەرمەن ساۋدا-ساتتىق, باسقاداي دا بايلانىستار ارتىپ, بۇگىندە ءارلى-بەرلى تىنىمسىز اعىلعان, جەلدەي جۇيتكىگەن جۇك كولىكتەرىنەن كوز سۇرىنەدى. دەمەك, الىس شاقىرىمداردى بەتكە الىپ, ارتقا تاستايتىن جۇرگىزۋشىلەر دە ءبىر مەزەت كوز شىرىمىن الىپ, جاقسىلاپ تىنىعىپ الۋعا بەيىل دەگەن ءسوز.
جاسىراتىنى جوق, وبلىستىڭ جول بويىندا ورنالاسقان سەرۆيس قىزمەتىنە, اسىرەسە ءدامحانالاردا دايىندالاتىن تاماقتىڭ ساپاسىزدىعىنا, گيگيەنالىق-تازالىقتىڭ تومەندىگىنە رەنىش كوپ ايتىلاتىن. ارنايى كوميسسيا بىرنەشە مارتە تەكسەرۋ رەيدتەرىن جۇرگىزىپ, كەمشىلىكتەردى انىقتاعانمەن ۋاقىت وتە بۇرىنعى «تاز قالپىنا» قايتا تۇسەتىن. سوڭعى كەزدەرى بۇل باعىتتا ءتارتىپ كۇشەيتىلىپ, ناقتى شارالاردىڭ جۇزەگە اسىرىلۋى ارقاسىندا جولاۋشىلارعا ساپالى سەرۆيستىك قىزمەت كورسەتۋ جولعا قويىلا باستادى. رەسپۋبليكالىق ماڭىزعا يە استانا-پەتروپاۆل باعىتىنداعى كۇرە جول كۇردەلى جوندەۋدەن ءوتىپ, قالپىنا كەلتىرىلگەلى جاۋىننان كەيىن ساڭىراۋقۇلاقتاي پايدا بولعان قىزمەت كورسەتۋ ورىندارى اراسىندا ءوزارا باسەكەلەستىكتىڭ سەرپىن العانى سەزىلەدى. باستى تاسجولدىڭ جۇزدەگەن شاقىرىمدارى تايىنشا اۋدانىن كوكتەي وتەتىندىكتەن بيزنەسكە قولايلى اۋماق ەكەنىن بىردەن اڭعارعان مىرزاحان قامالوۆ جول بويىنداعى سەرۆيستىك قىزمەتتى دامىتۋدى العاشقىلاردىڭ قاتارىندا قولعا العان ەدى. كاسىپكەرلىك قادامىن وسىدان 22 جىل بۇرىن دراگوميروۆ ەلدى مەكەنىنە تاقاۋ 100 ورىندى ءدامحانانى ءوز قاراجاتىنا سالۋدان باستاعان. كاسىبىن تۇراقتى ناسىپكە اينالدىرۋدى ماقسات ەتكەن ول كەيىن جەڭىلدىكتى باعدارلامالارعا قاتىسىپ, قىزمەت اياسىن كەڭەيتتى. «Bastau بيزنەس» جوباسى اياسىندا ءبىلىمىن جەتىلدىرىپ, «اگروكرەديت» كورپوراتسياسى ارقىلى 18 ميلليون تەڭگە دەمەۋقارجى الدى. بۇل قاراجاتقا كولىك جۋ نىسانىن ىسكە قوسىپ, ەكىقاباتتى قوناق ءۇيى مەن تەحنيكالىق قىزمەت كورسەتۋ ستانساسىن تۇرعىزۋعا كىرىسىپ كەتتى. قۇرال-جابدىقتارعا تاپسىرىس بەرىلىپتى. ونداعان اۋىلداستارىن تۇراقتى جۇمىسپەن قامتاماسىز ەتكەن.
كۇرە جولدىڭ بويىندا «مانسۇر» شاعىن بيزنەس كەشەنىنىڭ بوي كوتەرگەنىنە حالىقارالىق رەيستەرگە قاتىنايتىن جۇرگىزۋشىلەر دە, قوعامدىق كولىك جۇرگىنشىلەرى دە, جەرگىلىكتى تۇرعىندار دا ءدان ريزا. سولاردىڭ ءبىرى استانالىق سىرىم يمانباەۆتىڭ ايتۋىنشا, بۇرىندارى تۇستەنەتىن, تاماقتاناتىن ورىندار تازدىڭ سيرەپ قالعان شاشىنداي ءار-ءار جەردە عانا كەزدەسىپ, امالسىزدان ات باسىن بۇراتىن. ءتىپتى كەشەدەن قالعان سۋىق تاعامدى تالعاجاۋ ەتىپ, بارعا قاناعات ەتەتىن. ەندى شەكەسىنەن شەرتىپ ءجۇرىپ تاڭدايتىن, تالعايتىن بولىپتى. جولاۋشىلار اراسىندا قازىر «مانسۇر» كەشەنى تانىمالدىلىققا يە. ونىڭ اتىن اتاسا باس بارماعىن كورسەتىپ, جەتكەنشە اسىق. مۇندا تاماقتىڭ نەشە ءتۇرى قولما-قول ازىرلەنىپ, بۋى بۇرقىراعان كۇيى داستارقانعا قويىلادى. «تاعام شىنى اينەكتىڭ ارعى جاعىندا كوز الدىمىزدا ازىرلەنەتىندىكتەن ساپاسى كۇمان تۋدىرمايدى. دامدىلىگى ءتىل ۇيىرەتىن سامسا-كۇلشەلەردى, ءيىلىپ قىزمەت كورسەتەتىن اسپازداردىڭ كىشىپەيىلدىگىن ايتساڭشى. قالىپتى دەمالۋعا بارلىق جاعداي جاسالعاندىقتان, تاڭداۋىمىز وسىعان تۇسەدى, دەيدى ەلوردالىق مەيمان.
مىرزاجان قامالوۆ جەكە شارۋاسىن ۇرشىقشا ۇيىرۋمەن قاتار قايىرىمدىلىق شارالارعا دا بەلسەنە قاتىسىپ تۇرادى. دراگوميروۆ مەكتەپ ءۇيىن جوندەۋگە جاردەمدەسىپ, قارتتارعا, كوپ بالالى وتباسىلارعا ماتەريالدىق قولداۋ كورسەتىپتى. بىلتىر ەكسپو-2017 حالىقارالىق مامانداندىرىلعان كورمەسىنە جەرلەستەرىنىڭ ساياحاتتاپ بارىپ-قايتۋىنا قارجىلىق دەمەۋ جاساپتى.
كاسىپكەرلىك قادامىن كاۋاپ ساتۋدان باستاعان ول قازىر جول بويىنداعى سەرۆيستىك قىزمەتتىڭ اياسىن كەڭەيتۋمەن قاتار ساپاسىنا دا ەرەكشە ءمان بەرەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
