TRT Haber اگەنتتىگى ن.نازارباەۆتى تۇركيا پرەزيدەنتى رەجەپ تايپ ەردوعان ءوزىنىڭ ورداسىندا سالتاناتپەن قارسى العانىن جازادى. «ەردوعان مەملەكەت باسشىسىنىڭ «كۇليەسى» الدىندا ن.نازارباەۆتى كۇتىپ الدى. پرەزيدەنتتەر ارنايى ورىنعا كەلگەندە ەكى ەلدىڭ ءانۇرانى ويناپ, 21 رەت زەڭبىرەك وعى اتىلدى. قازاقستان پرەزيدەنتى ن.نازارباەۆ قۇرمەتتى قاراۋىلدارعا تۇرىكشە «سالەم, اسكەر» دەپ امانداستى. سونداي-اق الاڭدا تاريحتا قۇرىلعان 16 تۇرىك مەملەكەتى مەن ولاردىڭ تۋىن ۇستاعان ارنايى اسكەر دە بولدى», دەيدى TRT Haber.
اگەنتتىكتىڭ مالىمەتىنە سۇيەنسەك, تۇركيا سىرتقى ىستەر ءمينيسترى مەۆلۋت چاۆۋشوعلۋ, ۇلتتىق قورعانىس ءمينيسترى ۋلۋسي اكار, ەنەرگەكتيكا جانە تابيعي رەسۋرستار ءمينيسترى فاتيح دونمەز, مادەنيەت جانە تۋريزم ءمينيسترى مەحمەت نۋري ەرسوي, ترانسپورت جانە ينفراسترۋكتۋرا ءمينيسترى مەحمەت جاحيت تۋرحان دا ەلباسىنى قارسى العان دەلەگاتسيانىڭ قۇرامىندا بولعان.
اگەنتتىك ەكى ەل باسشىلارىنىڭ ءباسپاسوز جيىنىندا بىرقاتار ماڭىزدى ماسەلەلەر تالقىلاعانىن, قازاقستان مەن تۇركيا قارىم-قاتىناسىن نىعايتا ءتۇسۋ ءۇشىن ءالى دە اتقاراتىن شارالاردىڭ مول ەكەنىنە كەڭىنەن توقتالىپ وتكەن.
«مەملەكەت باسشىسى ەردوعان بەشتەپەدە قازاقستان پرەزيدەنتى نۇرسۇلتان نازارباەۆپەن جەكە كەزدەسۋدەن كەيىن جوعارى دەڭگەيلى ستراتەگيالىق ارىپتەستىك جيىنىنا قاتىسىپ, توراعالىق ەتتى. ەردوعان نازارباەۆپەن وتكەن ەكى جاقتى كەزدەسۋلەردە بىرقاتار ماسەلەلەردى تالقىلادى», دەپ حابارلايدى Hurriet.
باسىلىم بىرقاتار ماڭىزدى قۇجاتتارعا قول قويىلعانىن, تاراپتار ەكونوميكا, ساۋدا سالالارىن دامىتا تۇسۋگە كەلىسكەنىن, سونداي-اق جالپى سوماسى شامامەن 2 ميلليارد دوللاردان اساتىن 20-دان استام قۇجاتقا ەكى ەلدىڭ جاۋاپتى مەكەمەلەرى مەن جەكەمەنشىك سەكتورى وكىلدەرى قول قويعانىن جەتكىزدى.
Yeni Akit گازەتى قازاقستان پرەزيدەنتى نۇرسۇلتان نازارباەۆتىڭ تۇركياعا رەسمي ساپارى بارىسىندا تۇركيا پرەزيدەنتى رەجەپ تايپ ەردوعانمەن كەزدەسىپ, 2 ميلليارد دوللارلىق كەلىسىمگە كەلگەنىن حابارلادى.
ء«باسپاسوز جيىنىندا «مارتەبەلى, مەملەكەت باسشىسى», «قۇرمەتتى, اقساقالىم» دەگەن ەردوعان قازاقستاندا باستاۋ العان جوعارى دەڭگەيلى ستراتەگيالىق ىنتىماقتاستىق كەڭەسىنىڭ ءۇشىنشى جيىنىنا قاتىسىپ وتىرعانى جانە ن.نازارباەۆ باستاعان دەلەگاتسيانى ءوز ورداسىندا كۇتىپ العانىنا قۋانىشتى ەكەنىن جەتكىزدى», دەيدى Yeni Akit.
باسىلىمنىڭ حابارلاۋىنشا, ر.ەردوعان ەلباسى ن.نازارباەۆپەن تۇركى كەڭەسىنىڭ VI سامميتىندە جولىققانىن ەسكە سالىپ ءوتىپ, كۇن تارتىبىندە تۇرعان ەڭ ماڭىزدى ماسەلەلەردى تالقىلاعانىن اتاپ وتكەن. سونداي-اق تۇركيا پرەزيدەنتى ەكى ەل اراسىندا 5 ماڭىزدى قۇجاتقا قول قويىلعانىن دا ايتقان.
«مەملەكەت باسشىسى ەردوعان اتاجۇرت قازاقستاننان نازارباەۆ باستاعان دەلەگاتسيانىڭ كەلۋى وزدەرىن قۋانتقانىن مالىمدەپ, «تامىرى تەرەڭ تاريحىمىزدان باستاۋ العان تۇركيا-قازاقستان قارىم-قاتىناستارىنىڭ كەلەشەگى ودان ءارى دامي تۇسەتىنىنە سەنىم بىلدىرەمىن», دەدى. سونداي-اق ەكى ەل اراسىنداعى ديپلوماتيالىق بايلانىستار بۇدان كەيىن دە جالعاسا بەرەتىنىنە سەنىم ءبىلدىردى», دەپ حابارلايدى Yeni Akit.
دايىنداعان
اباي اسانكەلدى ۇلى,
«ەگەمەن قازاقستان»
