اۋەلى بايتاق تەرريتورياسى مەن ونداعى حالىقتىڭ ورنالاسۋ تىعىزدىعىنىڭ ازدىعىنا بايلانىستى قازاقستاننىڭ تسيفرلى حابار تاراتۋعا ءوتۋ جوسپارىنا سەنىمسىزدىكپەن قاراۋشىلار كوپ بولعانى راس. جۋىردا تسيفرلى ەفيرلىك حابار تاراتۋعا ءوتۋ بويىنشا بىرقاتار دايەك پەن جوسپار ايتىلعان ۇكىمەت وتىرىسىندا اقپارات جانە كوممۋنيكاتسيا ءمينيسترى داۋرەن اباەۆ تا وسى ماسەلەنى تىلگە تيەك ەتتى. «بىزگە قيانداعى اۋىلدار مەن شەكارا ماڭىنداعى اۋماقتا تۇراتىن تۇرعىنداردى 100 پروتسەنت قامتۋ مۇمكىن ەمەس سياقتى كورىندى. بىراق پرەزيدەنت تاپسىرماسى جانە قارجىلىق ماسەلەلەردى شەشۋدە ساياسي جىگەرلىلىك تانىتۋدىڭ ناتيجەسىندە تەلەكوممۋنيكاتسيا سالاسىنداعى ينفراقۇرىلىمدى دامىتۋدىڭ مۇمكىندىگى تۋدى», دەدى مينيستر.
تسيفرلى حابار تاراتۋعا جاپپاي ءوتۋ قازاقستاندىقتارعا وبلىس ورتالىقتارىندا 30 وتاندىق تەلەارناعا جانە اۋىلدىق جەرلەردە 15 ارناعا دەيىن وتە جوعارى ساپاداعى كەسكىن مەن دىبىسقا قول جەتكىزۋگە مۇمكىندىك بەرەدى. وتاندىق پاكەتكە جاڭالىقتار, بالالارعا ارنالعان ارنا, مادەنيەت, سپورت جانە باسقا دا تەلەونىمدەر ەنگىزىلگەن. جاڭا فورماتقا ءوتۋدىڭ تاعى ءبىر باسىمدىعى, راديوتولقىنداردىڭ بوساۋى بولماق. بوساعان تولقىندار بازاسىندا بايلانىس سالاسىنداعى جاڭا تەحنولوگيالاردى دامىتۋ جوسپارلانىپ وتىر. بۇل ءۇشىن بايلانىس وپەراتورلارىمەن جان-جاقتى جۇمىس اتقارىلۋدا.
اقپارات جانە كوممۋنيكاتسيا ءمينيسترىنىڭ ايتۋىنشا, بىلتىر «تەلەراديوحابار تاراتۋ تۋرالى» زاڭعا وزگەرىستەر ەنگىزىلدى. بۇل شارا ينفراقۇرىلىمدارىنىڭ دايىن بولۋىنا سايكەس وڭىرلەردىڭ جاڭا فورماتقا كەزەڭ-كەزەڭىمەن وتۋىنە مۇمكىندىك بەرەدى. ماسەلەن, 2018 جىلدىڭ قازان ايىندا ماڭعىستاۋ وبلىسى, جەلتوقسان ايىندا جامبىل, وڭتۇستىك قازاقستان وبلىستارى قامتىلادى. ال الداعى جىلدارى اتىراۋ, قىزىلوردا, الماتى وبلىستارى قوسىلماق. سونداي-اق شىعىس قازاقستان, پاۆلودار, سولتۇستىك قازاقستان, قوستاناي, قاراعاندى وبلىستارىن قامتۋ دا جوسپاردا بار. بۇدان كەيىنگى كەزەڭ بويىنشا باتىس قازاقستان, اقمولا, اقتوبە وبلىستارى, استانا جانە الماتى قالالارىن قامتۋ كوزدەلىپ وتىر.
تسيفرلى حابار تاراتۋعا تۇتاس ءوتۋ ءۇشىن ەلىمىزدە 827 راديوتەلەۆيزيالىق ستانسا سالۋ قاجەتتىلىگى تۋدى. سونىڭ ىشىندە بۇگىنگە دەيىن 356 ستانسا سالىنسا, جىل سوڭىنا دەيىن تاعى 200 ستانسانىڭ قۇرىلىسىن اياقتاۋ جوسپارلانىپ وتىر. ال قالعانى 2019-2020 جىلدار ارالىعىندا سالىنىپ بىتەدى.
وسى جىلدىڭ سوڭىنا دەيىن ماڭعىستاۋ, جامبىل جانە تۇركىستان وبلىستارى مەن شىمكەنت قالاسىندا انالوگتى حابار تاراتۋ ءوشىرىلىپ, تسيفرلى جۇيەگە ءوتۋ جۇزەگە اسىرىلادى. ءسويتىپ اتالعان وڭىرلەر حالقىنىڭ 99 %-ءى تسيفرلى حابار تاراتۋ جۇيەسىمەن قامتىلماق. قازىرگى كەزدە حالىقتى قۇلاقتاندىرۋ, سونىمەن قاتار الەۋمەتتىك كومەك الاتىنداردى تسيفرلى ارنالارعا قوسۋ ءۇشىن قابىلداعىشتارمەن قامتاماسىز ەتۋ جۇمىستارى جۇرگىزىلىپ جاتىر. قازاقستان بويىنشا تسيفرلى حابار تاراتۋعا ءوتۋ ۇدەرىسى 2021 جىلى تولىق اياقتالادى دەپ جوسپارلانعان.
جۋىردا «قازتەلەراديو» اق باسقارما توراعاسى ەسكەندىر تاجىبەكوۆ «تسيفرلى قازاقستان» مەملەكەتتىك باعدارلاماسىن جۇزەگە اسىرۋ اياسىندا اقپاراتتىق تەڭسىزدىكتىڭ ازايتىلعانىن جانە حابار تاراتۋدىڭ سپۋتنيكتىك جۇيەسى جاڭعىرتىلعانىن حابارلادى. ماسەلەن, ۇلتتىق سپۋتنيكتىك تەلەراديوحابار تاراتۋ رەسپۋبليكا اۋماعىن 100 %-كە قامتيدى. OTAU TV برەندىمەن سپۋتنيكتىك تەلەراديوحابار تاراتۋ ابونەنتتەرىنىڭ سانى 2010 جىلى 6300 بولسا, بۇگىنگى تاڭدا ونىڭ قاتارى 1,36 ملن ابونەنتكە جەتتى. قازىر 4 ملن-نان استام قازاقستاندىق ۇلتتىق سپۋتنيكتىك تەلەۆيزيانى قارايدى. ونىڭ ۇستىنە جۇرگىزىلگەن ستاتيستيكا قورىتىندىسى ابونەنتتەردىڭ 74 %-ءى اۋىل تۇرعىندارى ەكەنىن كورسەتىپ وتىر. سونىمەن قاتار ەلىمىزدە DVB-S2 زاماناۋي ستاندارتىمەن تسيفرلى ەفيرلىك تەلەحابار تاراتۋدى ەنگىزۋ جۇمىستارى جۇرگىزىلۋدە.
جالپى, بۇل ەلىمىزدەگى تەلەكورەرمەندەر كونتەنتىن ءبىر ارناعا بىرىكتىرەدى دەپ كۇتىلۋدە. ويتكەنى وسىعان دەيىن وڭتۇستىك وڭىرلەردەگى تۇرعىندار كوبىنەسە OTAU TV ارنالارىن كورىپ كەلسە, سولتۇستىك اۋماقتاعى تۇرعىندار ليتسەنزياسى جوق «نتۆ-پليۋس, «تريكولور تۆ» جانە باسقا دا سپۋتنيكتىك جەلىلەرگە قوسىلاتىن. سوندىقتان جاڭا تسيفرلى فورمات ارقىلى قازاقستان كونتەنتى نارىعىندا وتاندىق تەلەارنالاردىڭ ۇلەسى ۇلعايادى ءھام اقپاراتتىق قاۋىپسىزدىك ارتادى دەۋگە نەگىز بار. الەم ەلدەرىنىڭ باسىم بولىگى HD-حابار تاراتۋعا ءوتىپ جاتقاندىقتان زاماناۋي ۇردىسكە ىلەسۋدىڭ ارتىقشىلىعى كوپ. ءبىر عانا مىسال, ۇلتتىق وپەراتورلار ءۇشىن انالوگتى حابار تاراتۋدىڭ تەحنيكاسى 100 شارشى مەتر ورىندى السا, تسيفرلى ەفير قابىلداعىش ويماقتاي عانا ورىنعا ورنالاسادى. تسيفرلى تەلەۆيزياعا اۋىسۋ حالىقارالىق «جەنەۆا-2006» حالىقارالىق كەلىسىمى اياسىندا جۇزەگە اسىرىلادى. مەملەكەتتىك باعدارلامانى اتقارۋشى ۇلتتىق وپەراتور – «قازتەلەراديو» اق.
دۋمان اناش,
«ەگەمەن قازاقستان»
