ۇستىنەن ويۋلى شاپانىن تاستامايتىن داڭقتى بوكسشىمىزدى قولداۋعا شاھار تۇرعىندارىمەن بىرگە وسكەمەن اكىمى جاقسىلىق ومار, بىرنەشە دۇركىن وليمپيادا جۇلدەگەرى, جەڭىل اتلەت ولگا رىپاكوۆا, بەيجىڭ وليمپياداسىنىڭ كۇمىس جۇلدەگەرى نۇرباقىت تەڭىزباەۆ تا كەلدى.
ء«الى ەسىمدە, لوندون وليمپياداسىندا جارىس جولىنا شىققانىمدا وسكەمەندىكتەر سپورت سارايىنىڭ الدىنا جينالىپ, ەرەكشە قولداۋ كورسەتكەن ەدى. بۇل ماعان ەرەكشە كۇش-جىگەر بەردى. سول سەكىلدى بۇگىن ەلىمىزدىڭ تۇكپىر-تۇكپىرىندە جانكۇيەرلەرى گەناعا قولداۋ ءبىلدىرىپ جاتىر. ءبىزدىڭ قولداۋىمىز دا سپورتشىنىڭ جەڭىسكە جەتۋىنە اسەر ەتەتىنى انىق. جەرلەسىمىزگە تەك ساتتىلىك تىلەيمىز», - دەدى امفيتەاتردا كورەرمەندەر الدىنا ءسوز سويلەگەن ولگا رىپاكوۆا.
وسكەمەن قالاسىنىڭ اكىمى جاقسىلىق ومار دا بوكسشىعا ساتتىلىك تىلەدى. «بارلىق قازاقستاندىقتار بۇگىن گەناعا جانكۇيەر. گەننادي گولوۆكين – بۇكىل ەلگە سۇيكىمى ارتقان, ەلىمىزدىڭ ابىرويىن الەمگە اسقاقتاتقان بەلگىلى سپورتشى. ءبىزدىڭ ۇلتتىق برەندىمىزگە اينالدى دەۋگە بولادى. ءبىز ارقاشان گەناعا جانكۇيەر بولعانبىز. بولا دا بەرەمىز. ويتكەنى, ول – ءبىزدىڭ جەرلەسىمىز, ءبىزدىڭ ماقتانىشىمىز», - دەدى قالا اكىمى.
الاڭعا جينالعان كورەرمەندەردەن جەكپە-جەكتە كىمنىڭ جەڭىسكە جەتەتىنىنە قاتىستى پىكىرلەرىن دا سۇرادىق. «مەنىڭشە, جەكپە-جەك 12 راۋندقا دەيىن سوزىلادى. گولوۆكين ۇپاي سانىمەن جەڭىسكە جەتەدى», - دەيدى قوعام بەلسەندىسى ءادىل سايلاۋبەك.
ازامات قاسىم,
«ەگەمەن قازاقستان»
وسكەمەن
