سۋرەتتەردى تۇسىرگەن ەرلان ومار
ادەبي كەشكە جازۋشى-دراماتۋرگ, قازاقستاننىڭ ەڭبەك سىڭىرگەن قايراتكەرى روزا مۇقانوۆا, اقىن وڭايگۇل تۇرجان, كينوتانۋشى, ونەرتانۋ كانديداتى ءنازيرا راحمانقىزى جانە «ەگەمەن قازاقستان» گازەتىنىڭ جۋرناليستەرى مەن ادەبيەت الەمىندە جۇرگەن شىعارماشىل جاستار قاتىستى. ايتۋلى كەزدەسۋدى باس باسىلىمنىڭ باسقارما توراعاسى دارحان قىدىرالى قر اقپارات جانە كوممۋنيكاتسيالار ءمينيسترى داۋرەن اباەۆتىڭ قۇتتىقتاۋ سوزىمەن اشىپ بەردى.
«قادىرلى اكىم ءۇرتاي ۇلى! ءسىزدى 85 جاسقا تولعان مەرەيتويىڭىزبەن شىن جۇرەكتەن قۇتتىقتايمىن! ۇلت ادەبيەتىنە ورنەك سالعان ءسىز وسىناۋ بەلەستى قادىرلى تۇلعا, رۋحانياتىمىزدىڭ شوقتىعى بيىك وكىلى رەتىندە قارسى الىپ وتىرسىز. ءسىزدىڭ شىعارماشىلىعىڭىز قالىڭ وقىرماننىڭ ىستىق ىقىلاسىنا يە بولدى. بىرقاتار تۋىندىلارىڭىزدىڭ جەلىسى بويىنشا تۇسىرىلگەن كوركەم فيلمدەر كورەرمەن كوزايىمىنا اينالدى. «تۇلپاردىڭ ءىزى», «قاراش-قاراش», «مۇستافا شوقاي» – قازاق كينوسىنىڭ التىن قورىندا ساقتالاتىن وتە قۇندى دۇنيەلەر. ىزگىلىك, وتانسۇيگىشتىك, ۇلتتىق قۇندىلىقتاردى ۇلىقتاۋ ماسەلەلەرىن ءسىز دراماتۋرگيادا دا كەڭىنەن ناسيحاتتاپ كەلەسىز. وسىناۋ تولاعاي تابىستارىڭىز شابىتىڭىزعا شابىت قوسىپ, ءتول ادەبيەتىمىز تىڭ تۋىندىلارىڭىزبەن تولىسا بەرسىن دەي كەلە, بۇگىنگى مەرەيتويىڭىزدا سىزگە زور دەنساۋلىق, شىعارماشىلىق تابىس, ۇزاق تا باياندى عۇمىر, اۋلەتىڭىزگە باق-بەرەكە تىلەيمىن!» دەلىنگەن قۇتتىقتاۋ حاتتا.
كەزدەسۋ بارىسىندا قادىرلى قوناقتار ءسوز الىپ, مەرەيتوي يەسىنىڭ شىعارماشىلىق الەمىنەن جان-جاقتى سىر قوزعاسا, جاستار جاعى وسى ءساتتى پايدالانىپ سۇيىكتى قالامگەرىنە كوكەيىندە جۇرگەن قىزىقتى ساۋالدارىن قويىپ, تۇشىمدى جاۋاپ الدى. سىرلاسۋ ستيلىندە وتكەن جۇزدەسۋدىڭ ەرەكشەلىگى دە سول – مۇندا جازۋشى بۇعان دەيىن ەشبىر جەردە ايتىلماعان تىڭ دەرەك, قىزىقتى ساتتەرىمەن بۇكپەسىز ءبولىستى.
وقىرماندارىنا جان سىرىن اقتاردى. كەش سوڭىندا «ەگەمەن قازاقستان» گازەتىنىڭ باسقارما توراعاسى دارحان قۋاندىق ۇلى مەرەيتوي يەسىنە جۇرەكجاردى لەبىزىن ءبىلدىرىپ, بارشا ۇجىم اتىنىن شاپان جاۋىپ, قۇرمەت كورسەتتى. شىنايى وربىگەن ادەبي اڭگىمەدەن رۋحاني ءلاززات العان وقىرمان قاۋىم دا كەزدەسۋدەن مارقايىپ تارقاستى.
