– ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسىندا قويىلعان مىندەتتەر ۇدەسىنەن شىعۋىمىز ءۇشىن شارۋانى ساتىمەن ساباقتاپ جاتىرمىز,–دەدى وبلىس اكىمى مالىك مىرزالين,–مۇنىڭ الدىندا اكادەميك-جازۋشى مالىك عابدۋلليننىڭ 11 تومدىعىن وسى قازاق حالىقارالىق قازاق پەن-كلۋبى ارقىلى شىعارعان بولاتىنبىز. سول قۋانىشقا بۇگىنگى ءسات ۇلاسىپ وتىر.
ساكەن سەرى ءجۇنىسوۆتىڭ ءساتتى تۋىندىلارىنىڭ ءبىرىنىڭ ساناتىنداعى «زاماناي مەن اماناي» پوۆەسىنىڭ قازاق پروزاسىنداعى ورنى ەرەكشە ەكەندىگىن كوزى قاراقتى وقىرماننىڭ ءبارى بىلەدى. بۇل پوۆەستە جيىرماسىنشى عاسىردىڭ وتىزىنشى جىلدارىنداعى ەل ىشىندەگى احۋال سيپاتتالعان. سول ءبىر تار جول, تايعاق كەشۋ زامانىندا تۋعان توپىراعىنان ۇدەرە كوشكەن قالىڭ قازاقتىڭ زار-مۇڭى. باستارىنا تۇسكەن تاعدىر تالكەگىنەن تورتكۇل دۇنيەگە تارىداي شاشىلعان بەيكۇنا ادامداردىڭ تۋعان جەرگە دەگەن سارىتاپ ساعىنىشى. وتاندى ءسۇيۋ, تۋعان جەر مەن ەلگە دەگەن ماحاببات جيناقتىڭ ءار جولىندا جان دۇنيەڭدى ۋىلجىتىپ, كوكىرەگىڭدى ۋداي اشىتىپ, كىلكىلدەپ تۇر.
ساكەن سەرىنى اعىلشىن تىلىندە سويلەتۋگە زور ۇلەس قوسقان حالىقارالىق قازاق پەن-كلۋبىنىڭ پرەزيدەنتى بيگەلدى عابدۋللين ءوز سوزىندە اۋدارما ماسەلەسىنە توقتالدى. سودان سوڭ شەكسپير تىلىنە اۋدارىلعان ساكەن سەرى ارقىلى قازاق ادەبيەتىنىڭ كەسەك تۋىندىسىنىڭ كەمەل بەينەسىن جارتى الەمنىڭ جۇرتشىلىعى تانىپ بىلەتىندىگىن باسا ايتتى. سول ءبىر زامانداعى ەل باسىنا تۋعان ادام ايتقىسىز اۋىرتپالىقتى دا.
ال, سايمون گەيگان, سايمون حوللينگسۆورتا ءتارىزدى اۋدارماشىلار ساكەن سەرىنىڭ شۇرايلى شىعارماسىنا ءوز تاڭدانىستارىن بىلدىرە كەلە, الەمدىك ادەبيەتكە سارا جول اشىلعاندىعىن ايتىپ ءوتتى. اعىلشىن ءتىلدى جۇرتشىلىق قالامگەرلەرى ارقىلى قازاقتى تانيتىن بولادى. ءيسى قازاقتىڭ ءسوز ونەرىن, ءسوز ونەرىنە قوسا تاريحى مەن تاعدىرىن. مۇنىڭ الدىندا مۇحتار اۋەزوۆ, ءابىش كەكىلباەۆ, ورالحان بوكەەۆ ءتارىزدى قازاقتىڭ قابىرعالى قالامگەرلەرى اعىلشىن تىلىنە اۋدارىلسا, ەندى مىنە ساكەن سەرى ءجۇنىسوۆتىڭ قالامىنان تۋعان تاماشا شىعارما تورتكۇل دۇنيەگە جول تارتىپ وتىر. تۇساۋكەسەر ءراسىمىنىڭ سوڭىندا جازۋشىنىڭ قارىنداسى روزا ءجۇنىس, جەرلەسى مەيرام عيباديلوۆتار ءسوز سويلەپ, ەستەن كەتپەس ەستەلىكتەرىمەن ءبولىستى.
بايقال ءبايادىل,
«ەگەمەن قازاقستان»
كوكشەتاۋ
