تالاپكەر جىگىت بىلىكتى ۇستازداردان العان ءتالىمىن ازداعان ۋاقىتتا ىسكە اسىردى. ول «تۋعان جەرگە – تاعزىم» باعدارلاماسى نەگىزىندە اۋىلىنان جەكە مەنشىك وقۋ ورنىن اشتى.
قانداي ءىستى باستاساڭ دا قارجىعا تىرەلەتىندىگى ايقىن. قۋانىش «بيزنەستىڭ جول كارتاسى-2020» مەملەكەتتىك باعدارلاماسىنداعى يننوۆاتسيالىق جوبالارعا ارنالعان بايقاۋعا قاتىسادى. كەزىندە وسى بايقاۋ كوميسسياسىنىڭ مۇشەسى بولعاندىقتان بۇل جاعدايدى جاقسى بىلەمىز. مەملەكەت تاراپىنان يننوۆاتسيالىق جاڭالىعى بار تىڭ جوبالاردى قارجىلاندىرۋعا بەرىلەتىن تەگىن گرانتقا «قوراجاي سالىپ, بورداقىلاۋعا مال بايلايمىن, باسسەين قازىپ بالىق وسىرەمىن, سپورت الاڭىن سالامىن بولماسا الدىما مال سالامىن», دەگەن جوسپار كىرمەيدى. بۇل ماقساتقا جەڭىلدەتىلگەن نەسيە بار. تەگىن گرانت ۇتۋ ءۇشىن قولعا العان كاسىبىڭ ەلگە پايدالى ءارى تىڭ دۇنيە بولۋ كەرەك. قۋانىش داۋرەنبەكوۆ بايقاۋدا جەڭىسكە جەتىپ, العاشقى بيزنەس كاپيتالىن قۇراپ الدى.
قىزىلجارما اۋىلىنان اشىلعان جەكەمەنشىك مەكتەپتە 4 مۇعالىم مەن 1 لوگوپەد جۇمىس ىستەيدى.
وقۋ ورتالىعىندا باستاۋىش جانە جوعارى سىنىپ وقۋشىلارىنا تەرەڭدەتىلگەن ماتەماتيكا, اعىلشىن ءتىلى جانە مەنتالدى اريفمەتيكا ساباقتارى جۇرگىزىلەدى. كاسىپكەر اۋىل تۇرعىندارىنىڭ وتىنىشىمەن لوگوپەد كابينەتىن اشىپ, اقتوبەدەن ارنايى مامان شاقىرعان ەكەن. بالانىڭ ءبارى قابىلەتتى ەمەس. ارالارىندا ءسوزدى بۇزىپ سويلەيتىن نەمەسە كەيبىر ارىپتەردى دۇرىس ايتا المايتىن ءتىلى مۇكىس بۇلدىرشىندەر دە بار. اۋىلدا تۇرىپ قالاداعى بىلىكتى ماماندارعا كورسەتۋ, وقىتۋ وڭاي شارۋا ەمەس.
اقتوبەدەن ارنايى كەلگەن لوگوپەد مامان گۇلناز ەرلانقىزى ءبىرتالاي بالانىڭ ءتىل مۇكىسى تۇزەلىپ قالعاندىعىن ايتادى.
اپتاسىنا التى كۇن ساباق وتكىزىلەتىن ورتالىقتا بۇگىندە 50-گە جۋىق وقۋشى ءبىلىم الىپ جاتىر. وقۋ اقىسى دا اۋىلدىقتاردىڭ قالتاسىن قاعا قويمايدى.
قۋانىش داۋرەنبەكوۆ بۇل جەتىستىكتەرىنە توقمەيىلسىپ وتىرعان جوق. ول بولاشاقتا IT پاركتە رەزيدەنت بولىپ, ۆيرتۋالدى وقىتۋ جۇيەسىن ەنگىزۋگە جانە قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ بيزنەس-ينكۋباتور وقۋ ورتالىعىمەن بىرىگىپ, ءموبيلدى جۇمىس جۇيەسىن ىسكە قوسۋعا جۇمىس ىستەپ جاتىر.
«بىلىكتى ءبىردى, ءبىلىمدى مىڭدى جىعادى» دەگەن حالىق ماتەلىنىڭ ءتۇيىنى وسى. جاڭا جوبامەن جۇمىس ىستەۋگە تاۋەكەلى جەتكەن كاسىپكەر وسىلايشا بيزنەسىن وركەندەتىپ قانا قويماي, تۋعان اۋىلىنىڭ قاجەتىنە جاراپ كەلەدى.
باقتيار تايجان,
«ەگەمەن قازاقستان»
قىزىلوردا وبلىسى
