وتىرىس بارىسىندا قازاقستان ەلشىسى ساپالى وزگەرىستەردى, بۇۇ-نىڭ بىتىمگەرلىك جۇيەسىن باعالاۋدىڭ يننوۆاتسيالىق تاسىلدەرى مەن جاڭا كريتەريلەرىن قولدانۋ قاجەتتىلىگىن اتاپ ءوتتى. ول بىتىمگەرلىك قىزمەت تيىمدىلىگىن ارتتىرۋدىڭ نەگىزگى شارتتارىنىڭ ءبىرى رەتىندە بۇۇ-نىڭ بارلىق قۇرىلىمدارىنىڭ ۇيلەستىگىن نىعايتۋ جانە ەسەپ بەرۋدى قامتاماسىز ەتۋگە نازار اۋداردى.
«بۇۇ-نىڭ بىتىمگەرلىك قىزمەتى پروتسەسىنە جاڭا ەلدەردىڭ بەلسەندى جۇمىلدىرىلۋى جانە قاتىسۋى, سونىڭ ىشىندە ءوز قۇرامىن ورنالاستىرۋ ارقىلى بۇۇ-نىڭ بەيبىتشىلىكتى قولداۋ جونىندەگى وپەراتسيالارىنا جاڭا ەنەرگيا جانە تيىمدىلىك بەرەتىنىنە سەنەمىز», - دەدى ق. وماروۆ. ونىڭ ايتۋىنشا, بۇل ۇدەرىس بۇۇ ميسسيالارىنىڭ بەدەلى مەن تيىمدىلىگىن سونداي-اق ەلدەردىڭ, وڭىرلىك ۇيىمداردىڭ جانە بۇكىل الەمدىك قاۋىمداستىقتىڭ ىنتىماقتاستىعى مەن ۇجىمدىق جاۋاپكەرشىلىگىن ارتتىرادى.
سونىمەن قاتار, قازاقستاندىق دەلەگاتسيا باسشىسى قاقتىعىستاردى بولدىرماۋ مەن ولاردى شەشۋدە وڭىرلىك قۇرىلىمدار اراسىنداعى ىنتىماقتاستىقتىڭ ماڭىزدىلىعىن اتاپ ءوتىپ, داۋلاردىڭ الدىن الۋ مەن ولاردىڭ تۇبەگەيلى سەبەپتەرىن الدىن الا ەسكەرۋ بويىنشا قازاقستان ۇسىنعان ۇشجاقتى ستراتەگيانى ەسكە سالدى.
ستراتەگيا حالىقارالىق قاۋىمداستىقتىڭ تۇراقتاندىرۋ شارالارىنىڭ تيىمدىلىگىن ارتتىرۋ ماقساتىندا قاۋىپسىزدىك پەن دامۋدىڭ ءوزارا بايلانىسىن كۇشەيتۋ, وزەكتى ماسەلەلەردى شەشۋدە ستراتەگيالىق وڭىرلىك ءتاسىلدى قولدانۋ جانە جەرگىلىكتى قولداۋدىڭ تيىمدىلىگىن ارتتىرۋ مەن اشىقتىقتى قامتاماسىز ەتۋ ماقساتىندا بۇۇ-نىڭ ءتۇرلى قۇرىلىمدارى مەن اگەنتتىكتەرىنىڭ ۇيلەستىرۋىن نىعايتۋ ءۇشىن الەۋەتتى قۇرۋعا نەگىزدەلگەن.
قاۋىپسىزدىك كەڭەسىنىڭ وتىرىسىندا بۇۇ باس حاتشىسىنىڭ بىتىمگەرلىك وپەراتسيالار جونىندەگى ورىنباسارى جان-پەر لاكرۋا ءسوز سويلەدى. ول وزىق اسكەري الەۋەتكە يە ەلدەردى بۇۇ-نىڭ ميسسيالارىنا بىتىمگەرلىك كۇشتەر مەن جابدىقتاردى جىبەرۋدى جانە لوگيستيكالىق قولداۋدى كورسەتۋدى جانە بىتىمگەرلىك دايىندىقتى كۇشەيتۋگە شاقىردى.
ۇستىمىزدەگى جىلدىڭ قازان ايىنىڭ سوڭىندا قازاقستان ءۇندىستاننىڭ بىتىمگەرلىك كۇشتەرىمەن بىرگە بۇۇ-نىڭ ليۆانداعى ۋاقىتشا كۇشتەرىنە 120 اسكەري قىزمەتشىلەردەن قۇرالعان بىتىمگەرلىك روتانى جىبەرەدى.
بۇۇ-نىڭ ليۆانداعى ۋاقىتشا كۇشى 1978 جىلى ناۋرىزدا ليۆان ۇكىمەتىنە ەلدەگى بيلىكتى قالپىنا كەلتىرۋگە كومەكتەسۋ جانە وسى ەلدەن يزرايل اسكەرلەرىنىڭ شىعارىلۋىن راستاۋ ءۇشىن قۇرىلعان. قازىرگى ۋاقىتتا بۇۇ-نىڭ ليۆانداعى بىتىمگەرلىك ميسسياسىندا 42 ەلدەن 10 000-نان استام اسكەري قىزمەتشى قىزمەتىن وتەۋدە.
