اتاپ ايتقاندا, بىرقاتار ەلدەر تولقۇجاتتىق-ۆيزالىق باقىلاۋدان وتكىزۋدى جانە جەكە تۇلعانى راستاۋ ۇلگىلەرىن جەتىلدىرىپ, بۇگىندە بيومەتريالىق مالىمەتتەرى بار قۇجاتتار (تسيفرلى فوتوسۋرەتتەر, ساۋساق تاڭباسى, كوز شاراسىنىڭ كەسكىندەمەسى جانە ت.ب) بەرۋگە كوشە باستادى.
وعان قوسا 16 جاسقا دەيىنگى بالالاردان دا جەكە تولقۇجات تالاپ ەتەتىن مەملەكەتتەردىڭ دە قاتارى كوبەيىپ كەلەدى. ماسەلەن, شەنگەن اۋماعىنداعى ەۋروپالىق مەملەكەتتەر, اقش, ءباا جانە باسقا دا مەملەكەتتەر قاۋىپسىزدىك شارالارىن العا تارتىپ, شەتەلدىكتەردى ءوز اۋماعىنا كىرگىزۋ تارتىبىنە وسى تالاپتى ەنگىزگەن.
وسىعان وراي, ىشكى ىستەر مينيسترلىگى دە قازاقستان ازاماتتارىنىڭ باسقا ەلدەردىڭ شەكاراسىنان ەركىن ءوتۋىن قامتاماسىز ەتۋ ءۇشىن قازىرگى قولدانىستاعى قۇجاتتاندىرۋ ءتارتىبىن وزگەرتۋگە نيەتتى.
ناقتىراق ايتقاندا, مينيسترلىك «جەكە باستى كۋالاندىراتىن قۇجاتتار تۋرالى» زاڭعا وزگەرتۋلەر مەن تولىقتىرۋلار ەنگىزۋ ارقىلى 16 جاسقا دەيىنگى بالالار شەتەلگە شىعاتىن جاعدايدا تولقۇجات الۋدى مىندەتتەۋدى قۇپ كورىپ وتىر. ال قازىرگى ۋاقىتتا شەتەلگە ساپارلاعان بالالاردىڭ فوتوسۋرەتتەرى اتا-انالارىنىڭ تولقۇجاتتارىنا جاپسىرىلۋدا.
ىشكى ىستەر مينيسترلىگىنىڭ ءباسپاسوز قىزمەتى تاراتقان مالىمەتتەرگە سۇيەنسەك, شەتەلگە شىعاتىن بالالاردىڭ جەكە تولقۇجات الۋىن مىندەتتەيتىن ءتارتىپ 2019 جىلدىڭ 1 قاڭتارىنان باستاپ كۇشىنە ەنۋى مۇمكىن.
ايتا كەتەرلىگى, بيىلدان باستاپ قازاقستان تولقۇجاتىن راسىمدەۋ قۇنى 2017 جىلمەن سالىستىرعاندا ەكى ەسەگە قىمباتتاپ 8 اەك (19240 تەڭگە, 1 اەك – 2405) قۇرادى. ال تولقۇجاتتى ءبىر كۇن ىشىندە راسىمدەپ, قول جەتكىزۋگە بولادى.
سەرىك ابدىبەك,
«ەگەمەن قازاقستان»
