ءبىر پارتادا – ءۇش وقۋشى
وبلىستىق ءبىلىم بەرۋ باسقارماسىنىڭ باسشىسى قايىرعالي كەنجەعاليەۆتىڭ ايتۋىنشا, وڭىردە 193 مەملەكەتتىك, 4 جەكەمەنشىك مەكتەپ بار. ونىڭ ىشىندە 4 مەكتەپ اپاتتى جاعدايدا دەپ تانىلعان. جاڭا وقۋ جىلى قارساڭىندا 2 مەكتەپ, 3 بالاباقشا اشىلدى. سونىڭ وزىندە وقۋشى سانىنىڭ كوپتىگىنەن ءۇش اۋىسىمدا وقيتىن ءبىلىم ۇيالارىنىڭ قاتارى كەمىر ەمەس. كەرىسىنشە, ءوسىپ بارادى. بىلتىر 9 مەكتەپ ءۇش اۋىسىمدا وقىسا, بيىل بۇل كورسەتكىش 11-گە جەتتى. 600 وقۋشىعا ارنالعان ءبىلىم وشاعىندا 2 مىڭ بالا ساباق وقۋعا ءماجبۇر. وسى ولقىلىقتىڭ ورنىن تولتىرۋ ءۇشىن وبلىس ورتالىعىنداعى №34, 17, 27, 22 مەكتەپتەرگە قوسىمشا عيمارات سالۋعا جوبالاۋ-سمەتالىق قۇجاتتاما دايىندالىپ جاتىر. اپاتتى جاعدايداعى م.جۇماباەۆ پەن ع.مۇراتباەۆ مەكتەپتەرىنىڭ شاكىرتتەرى كورشىلەس مەكتەپتەرگە بارىپ وقىپ ءجۇر. الدا قاھارلى قىس كەلە جاتقانىن ەسكەرسەك, بۇل جاعداي بالالار مەن اتا-انالار ءۇشىن قولايسىزدىق تۋدىرارى انىق. مۇنايلى وڭىردە جىل سايىن جاڭا مەكتەپ, بالاباقشالار سالىنادى, ەسكىلەرى جاڭارتىلادى, قوسىمشا عيماراتتار تۇرعىزىلادى, سونىڭ وزىندە ورىن جەتپەۋ ماسەلەسى كۇن تارتىبىنەن تۇسەر ەمەس. ءا.مولداعۇلوۆا اتىنداعى ورتا مەكتەپ ديرەكتورى اقسۇلۋ ساليەۆا ءۇش اۋىسىمدا وقىتۋدىڭ كەدەرگىلەرى كوپ ەكەنىن ايتادى. وقۋشى سانىنىڭ نورماعا ساي بولماۋى, ءۇش-ءتورت بالانىڭ ءبىر پارتادا تىعىلىسىپ وتىرۋى ءبىلىم ساپاسىنا اسەر ەتەتىنى تاعى بار.
380 مۇعالىم كەرەك
مۇنايلى ايماقتاعى مەكتەپتەردە 380 مۇعالىمنىڭ ورنى بوس تۇر. اسىرەسە باستاۋىش سىنىپ پەن ماتەماتيكا ءپانىنىڭ مۇعالىمىنە سۇرانىس جوعارى. ورىس تىلىندە وقىتاتىن ءبىلىم مەكەمەلەرىنە دە پەداگوگ كادرلار كەرەك. ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى 19 پەداگوگيكالىق ماماندىق بويىنشا وقىتادى. «وتكەن وقۋ جىلىندا 248 جاس مامان ۋنيۆەرسيتەت ءبىتىردى. جىل سايىن تۇلەكتەردى جۇمىسقا ورنالاستىرۋعا ارنالعان جارمەڭكە بولادى. وسى شارادا 136 قازاق, 22 ورىس سىنىپتارىنىڭ مۇعالىمدەرى شاقىرتۋ الدى. ورىسشا ساباق بەرەتىن 222 مۇعالىمگە سۇرانىس تۇسكەن ەدى, بىراق سونىڭ 10 پروتسەنتىمەن عانا قامتاماسىز ەتۋگە مۇمكىندىگىمىز بولدى», دەيدى ۋنيۆەرسيتەتتىڭ اكادەميالىق ماسەلەلەر دەپارتامەنتىنىڭ باسشىسى اسحات شۇكىروۆ. ورىس ءتىلدى مەكتەپتەرگە مۇعالىم جەتىسپەۋ پروبلەماسى بۇرىننان بار. سول ءۇشىن وبلىستىق اكىمدىك تاراپىنان مۇعالىم بولامىن دەگەن جاستارعا قولداۋ ۇيىمداستىرىلادى, مىسالى وتكەن جىلى 158, بيىل 187 گرانت بولىنگەن. گرانتپەن وقىپ جاتقان ستۋدەنتتەر ەندى ەكى جىلدان كەيىن وقۋ بىتىرەدى, مۇمكىن سول كەزدە سەڭ ازداپ بولسا دا قوزعالار. ازىرگە ماسەلە اشىق كۇيىندە قالىپ وتىر. ءبىلىم بەرۋ باسقارماسى كورشىلەس وڭىرلەردەگى وقۋ ورىندارىنىڭ تۇلەكتەرىن اتىراۋعا شاقىرىپ, جۇمىس ۇسىنۋدى دا قولعا العان. سونىڭ وزىندە, جاعداي جوعارىداعىداي.
بالاباقشاعا – ونلاين كەزەك
بالاباقشاعا ءوتىنىشتى قانشالىقتى ەرتە بەرسەڭىز, جولداما الۋ مۇمكىندىگى دە جاقىنداي تۇسەدى. وقۋ جىلىنىڭ باسىندا garden.atyrau.gov.kz سايتى ىسكە قوسىلدى. ەندى ينتەرنەتپەن بالاباقشا تاڭداۋعا, مەكتەپكە دەيىنگى مەكەمەلەرگە كەزەگىڭىزدى قاداعالاۋعا, sms, e-mail حابارلاما ارقىلى كەرى بايلانىس ورناتۋعا مۇمكىندىك بار. «بۇل اتا-انالاردىڭ ۋاقىتىن ۇنەمدەۋگە, سىبايلاس جەمقورلىق تاۋەكەلىن بولدىرماۋعا سەپتىگىن تيگىزەدى», دەيدى اتىراۋ قالالىق ءبىلىم ءبولىمى باسشىسىنىڭ مىندەتىن اتقارۋشى المابەك ابدولوۆ. بۇرىن بالاباقشاعا كەزەك ەلەكتروندى جۇيەدە كورسەتىلگەنىمەن, جولدامانى قالالىق ءبىلىم ءبولىمى بەرەتىن. ەندى رەسپۋبليكا بويىنشا ەنگىزىلگەن بىرىڭعاي ستاندارتتىڭ نەگىزىندە جۇيە اۆتوماتتى تۇردە ءبارىن ءوزى رەتتەپ وتىرادى. ءبىلىم ءبولىمىنىڭ مالىمەتىنە سۇيەنىپ ايتار بولساق, وبلىس ورتالىعىنداعى 42 مەملەكەتتىك بالاباقشاعا 13 مىڭنان استام بالا بارىپ ءجۇر. ال كەزەكتە ءالى دە 22 408 بالا تۇر.
ارينە مۇنايلى وڭىردەگى ءبىلىم بەرۋ سالاسىندا جاقسى جاڭالىقتار دا بار. جاقىندا ءبىلىم كۇنىنە ارنالعان سالتاناتتى شارادا وبلىس اكىمى نۇرلان نوعاەۆ وتكەن وقۋ جىلىندا 71 اتىراۋلىق وقۋشىنىڭ ءتۇرلى ونەر, ءبىلىم جارىستارىندا جۇلدەگەر اتانىپ, 20 وقۋشىنىڭ حالىقارالىق بايقاۋلاردا توپ جارعانىن ەرەكشە اتاپ ايتقان ەدى. «زامان تالابىنا ساي جاڭا تەحنولوگيالاردى دامىتۋعا جانە ونى بالالاردىڭ مەڭگەرۋىنە كوڭىل ءبولىپ كەلەمىز. ءىت-سىنىپتار اشىلىپ جاتىر, وقۋ ورىندارىنىڭ 90%-تەن استامى كەڭ جولاقتى ينتەرنەت جۇيەسىنە قوسىلعان. بيىلدان باستاپ وبلىستاعى مەكتەپتەردە 45 روبوتتەحنيكا سىنىپتارى جۇمىس ىستەيدى. جىل سوڭىنا دەيىن ءبىلىم بەرۋ سالاسىندا تاعى دا جاڭا نىساندار اشىلادى», دەگەن ەدى ءوڭىر باسشىسى. قازىر وڭىردە 5 مەكتەپتىڭ قۇرىلىسى ءجۇرىپ جاتىر, جىل سوڭىنا دەيىن پايدالانۋعا بەرىلەدى دەگەن جوسپار بار. قۇرىلىس قارقىنى وسى باعىتىنان تايماسا, جاقىن جىلدارى مەكتەپ مەن بالاباقشادا ورىن تاپشىلىعى ماسەلەسى دە وتكەن كۇننىڭ ەنشىسىندە قالار دەگەن ءۇمىت باسىم.
باقىتگۇل باباش,
«ەگەمەن قازاقستان»
اتىراۋ
