كاسىپكەرلەرگە ارنالعان «باستاۋ» جوباسىنىڭ دا ماقساتى وسى. مەملەكەت وقىتادى, كاسىپ باستاۋعا قاجەت قاراجاتتى بەرەدى, تەك مۇمكىندىكتى ءتيىمدى پايدالانۋىڭىز كەرەك. مىسالى, اتىراۋ وبلىسى بويىنشا «باستاۋ» جوباسىنا 663 ادام قاتىسىپ, كاسىپكەرلىك نەگىزدەرىن مەڭگەرگەن, الايدا سونىڭ 64-ءى عانا جەڭىلدەتىلگەن نەسيەگە قول جەتكىزدى. «بۇل – وتە تومەن كورسەتكىش, – دەيدى «اتامەكەن» ۇلتتىق كاسىپكەرلەر پالاتاسىنىڭ وكىلى باۋىرجان ورازعاليەۆ. – «باستاۋ» جوباسىنىڭ ءوڭىر ءۇشىن ماڭىزى زور. جۇمىستان بوساعان ازاماتتاردى ەكونوميكانىڭ باسقا سالالارىنداعى جوبالارعا تارتىپ, بيزنەسكە وقىتۋعا بولادى. ياعني مۇنى الەۋمەتتىك جوبا رەتىندە قاراستىرۋ كەرەك. وقىتۋ مەن قارجىلاندىرۋدى كوزدەيتىن مەملەكەتتىك باعدارلاما قازىرگى تاڭدا اتىراۋدا تولىق ىسكە اسپاي تۇر. سوندىقتان وبلىستىق كاسىپكەرلەر پالاتاسىنا جەرگىلىكتى اتقارۋشى ورگانداردىڭ بەلسەندى قاتىسۋىمەن حالىق اراسىندا ءتۇسىندىرۋ جۇمىستارىن جانداندىرۋ قاجەت».
ال وبلىستىق كاسىپكەرلەر پالاتاسىنىڭ باسشىسى ابدوللا يدريسوۆ بيىل جوسپار بويىنشا 1325 ادامدى وقىتۋ قاراستىرىلعانىن, بۇگىنگە دەيىن مەجە 50 پروتسەنتكە عانا ورىندالعانىن ايتادى. 22 بيزنەس-جوبا قارجىلاندىرىلۋعا جىبەرىلگەن, 43 جوبا قارالىمدا جاتىر.
پالاتا تاراپىنان جۇرگىزىلگەن تالداۋ جۇمىستارى قارجى الۋ كەزىندە ەكىنشى دەڭگەيلى بانكتەرمەن ارادا پروبلەما تۋىندايتىنىن انىقتاعان. اتىراۋ, قۇلسارى قالالارىنىڭ تۇرعىندارى قارجىلاندىرۋدى «دامۋ» قورى ارقىلى جەرگىلىكتى «سبەربانك» اق فيليالىنان الا الادى. بىراق كەپىلزاتتىڭ بولماۋى نەمەسە تالاپتارعا ساي كەلمەۋى, قوسىمشا كەپىلدىڭ قاجەتتىلىگى, وتىنىمدەردى ۇزاق قاراۋ سەكىلدى ماسەلەلەر كاسىپكەرلەردىڭ باستامالارىنا كەدەرگى كەلتىرىپ تۇر. وسى ءتۇيىندى تۇستار تارقاتىلسا, «باستاۋعا» قىزىعاتىن كاسىپكەرلەر قاتارى دا كوبەيەر ەدى.
باقىتگۇل باباش,
«ەگەمەن قازاقستان»
اتىراۋ
