وسى كۇنى ن.نازارباەۆ تۇركيا رەسپۋبليكاسىنىڭ ىسكەر توپتار وكىلدەرىمەن كەزدەستى, سونداي-اق جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ءۇشىنشى وتىرىسىنا قاتىستى. ءىس-شارا بارىسىندا ساۋدا-ەكونوميكالىق جانە ينۆەستيتسيالىق ماسەلەلەر جان-جاقتى تالقىلاندى. ساپار قورىتىندىسى بويىنشا ەكىجاقتى ىنتىماقتاستىقتى ودان ءارى نىعايتاتىن بىرنەشە قۇجاتقا قول قويىلدى.
قول قويۋ ءراسىمى اياقتالعاننان كەيىن مەملەكەتتەر باسشىلارى جۋرناليستەرگە ارنالعان ءباسپاسوز جيىنىن وتكىزدى.
تۇركى تاتۋ بولسا, تابىس كوپ
قازاقستان پرەزيدەنتى ىسكەر توپتار وكىلدەرىمەن كەزدەسۋ بارىسىندا تۇركيانىڭ بيزنەس وكىلدەرى الدىندا سويلەگەن سوزىندە ەكى مەملەكەت اراسىنداعى ساۋدا-ەكونوميكالىق ىنتىماقتاستىق وڭ قارقىن الىپ كەلە جاتقانىن اتاپ ءوتتى.
– قازاقستان مەن تۇركيا اراسىنداعى قاتىناستار ءوزارا دوستىققا, باۋىرلاستىق پەن سەنىمگە نەگىزدەلگەن. ساۋدا اينالىمى جونىنەن تۇركيا قازاقستاننىڭ ستراتەگيالىق سەرىكتەستەرىنىڭ العاشقى وندىعىنا كىرەدى. ەكى ەل اراسىنداعى تاۋار اينالىمى 2017 جىلى 27 پروتسەنتكە ءوسىپ, 2 ميلليارد اقش دوللارىنا جۋىقتادى, – دەدى نۇرسۇلتان نازارباەۆ.
مەملەكەت باسشىسى ينۆەستيتسيالىق ىنتىماقتاستىق پەن ەكونوميكانىڭ ءتۇرلى سالالارىنداعى بىرلەسكەن جوبالاردى ىسكە اسىرۋ ماسەلەلەرىنە توقتالدى. اتاپ ايتقاندا, تاۋەلسىزدىك العاننان بەرى ەلىمىزگە تۇركيا 3 ميلليارد اقش دوللارىنان استام ينۆەستيتسيا قۇيعانىن جانە بۇگىندە قازاقستاندا تۇرىك كاپيتالىنىڭ قاتىسۋىمەن 2 مىڭعا جۋىق كاسىپورىن جۇمىس ىستەپ وتىرعانىن اتاپ ءوتتى.
سونىمەن قاتار قازاقستان پرەزيدەنتى ەكى ەل كاسىپكەرلەرىن قولداۋعا باعىتتالعان «جاڭا سينەرگيا» باعدارلاماسىنىڭ جۇزەگە اسىرىلۋ ناتيجەلەرى جونىندە ايتتى.
– وسى باعدارلاما اياسىندا قۇنى 800 ميلليون دوللار بولاتىن 23 جوبا ىسكە قوسىلىپ, 3 مىڭ جاڭا جۇمىس ورنىنىڭ اشىلۋىنا مۇمكىندىك بەردى. كەشە ەلدەرىمىزدىڭ بيزنەس وكىلدەرى قۇنى 1,7 ميلليارد دوللاردان اساتىن 24 كەلىسىمشارتقا قول قويدى. بۇل – ءبىزدىڭ ءوزارا سەنىم مەن ىنتىماقتاستىعىمىزدىڭ جارقىن مىسالى, – دەدى نۇرسۇلتان نازارباەۆ.
كەزدەسۋ بارىسىندا مەملەكەت باسشىسى قازاقستاننىڭ ەكونوميكالىق ارتىقشىلىقتارىنا جانە ەلىمىزدە بيزنەس جۇرگىزۋ ءۇشىن جاسالعان قولايلى جاعدايلارعا نازار اۋداردى.
– قازاقستاندا ينۆەستيتسيالىق احۋالدى جاقسارتۋ جونىندە كەشەندى جۇمىستار جۇرگىزىلۋدە. كاسىپكەرلىكتى دامىتۋ ءۇشىن زاڭناماعا ءتيىستى وزگەرىستەر ەنگىزىلدى. دۇنيەجۇزىلىك بانكتىڭ «بيزنەس جۇرگىزۋ جەڭىلدىگى» رەيتينگىندە قازاقستان 190 ەلدىڭ اراسىندا 36-ورىندا. ءبىزدىڭ مەملەكەت ەكونوميكالىق ىنتىماقتاستىق جانە دامۋ ۇيىمى ينۆەستيتسيالىق كوميتەتىنىڭ مۇشەسى بولىپ سانالادى, – دەدى قازاقستان پرەزيدەنتى.
سونداي-اق نۇرسۇلتان نازارباەۆ قازاقستان رەسپۋبليكاسىنىڭ پرەزيدەنتى جانىنداعى شەتەلدىك ينۆەستورلار كەڭەسى مەن «قازاق ينۆەست» كومپانياسىنىڭ جۇمىسى جانە ينۆەستورلار ءۇشىن قاراستىرىلعان ءتۇرلى جەڭىلدىكتەر جونىندە ايتتى.
– قازاقستاندا 11 ارنايى ەكونوميكالىق جانە 24 يندۋستريالىق ايماق بار. ولاردىڭ جۇمىسىنا قاتىسۋشىلار ءۇشىن سالىقتىق جانە وزگە دە جەڭىلدىكتەر قاراستىرىلعان. تۇرىك كومپانيالارىن قازاقستاندا ءوز بيزنەستەرىن وركەندەتۋگە شاقىرامىن, – دەدى مەملەكەت باسشىسى.
سونىمەن قاتار قازاقستان پرەزيدەنتى ەلىمىزدىڭ كولىك-ترانزيت الەۋەتىنىڭ مۇمكىندىكتەرىنە جان-جاقتى توقتالدى.
– قازاقستان ەۋروپا مەن ازيا اراسىنداعى ترانسكونتي-نەنتالدى مۋلتيمودالدى جۇك تاسىمالىن بەلسەندى دامىتۋدا. ەلىمىز ارقىلى 5 تەمىر جول جانە 6 حالىقارالىق اۆتوموبيل جولى وتەدى. ترانسكاسپي مۋلتيمودالدى جۇك تاسىمالىن دامىتۋ ءۇشىن كوپ جۇمىس اتقارىلۋدا. اقتاۋ پورتىن جاڭعىرتىپ, ونىڭ مۇمكىندىكتەرىن كەڭەيتتىك, – دەدى نۇرسۇلتان نازارباەۆ.
مەملەكەت باسشىسى قازاقستانداعى ونەركاسىپ كاسىپورىندارىن جەكەشەلەندىرۋ ۇدەرىسىنە جانە اگروونەركاسىپ كەشەنىندەگى يننوۆاتسيالىق جوبالاردى ىسكە اسىرۋعا شەتەلدىك ينۆەستورلاردىڭ قاتىسۋ مۇمكىندىگى بار ەكەنىن دە اتاپ ءوتتى.
سونىمەن بىرگە قازاقستان پرەزيدەنتى تۇرىك بيزنەسمەندەرىن نازارباەۆ ۋنيۆەرسيتەتى مەن يننوۆاتسيالىق تەحنولوگيالار پاركى بازاسىندا قۇرىلعان يننوۆاتسيالىق كلاستەرلەردىڭ جۇمىسىنا اتسالىسىپ, تۋريستىك سالاداعى بىرلەسكەن جوبالاردى جۇزەگە اسىرۋ مۇمكىندىكتەرىن قاراستىرۋعا شاقىردى.
– ەكسپو-2017 كورمەسىنىڭ بازاسىندا «استانا» حالىقارالىق قارجى ورتالىعى جۇمىس ىستەي باستادى. بۇل ورتالىق نيۋ-يورك, سينگاپۋر, لوندون جانە دۋباي قالالارىنداعى قارجى ورتالىقتارىنىڭ ۇزدىك مودەلى نەگىزىندە جۇمىس جۇرگىزەدى. ونىڭ قۇقىقتىق مارتەبەسى كونستيتۋتسيالىق زاڭمەن بەكىتىلدى, جۇمىس ءتىلى – اعىلشىن ءتىلى. بۇل – وڭىردەگى قىزمەتى اعىلشىن قۇقىعىنا نەگىزدەلگەن بىردەن-ءبىر ورتالىق, – دەدى نۇرسۇلتان نازارباەۆ.
مەملەكەت باسشىسى «استانا» حالىقارالىق قارجى ورتالىعىنىڭ نەگىزگى ارتىقشىلىقتارى جونىندە ايتىپ, بۇل ورتالىقتىڭ جۇمىسىنا قاتىسۋشىلار ءۇشىن ارنايى سالىق, ۆاليۋتا, ۆيزا جانە ەڭبەك رەجىمدەرى ەنگىزىلگەنىن اتاپ ءوتتى.
سوڭىندا قازاقستان پرەزيدەنتى ەكى ەل بيزنەسمەندەرىن بۇگىنگى جاسالىپ وتىرعان مۇمكىندىكتىڭ ءبارىن پايدالانا وتىرىپ, مەملەكەتارالىق بايلانىستاردى دامىتۋ جانە نىعايتۋ ىسىنە بەلسەندى اتسالىسۋعا شاقىردى.
ينۆەستيتسيالىق ارىپتەستىك نىعايا تۇسەدى
بۇدان سوڭ مەملەكەت باسشىسى قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ءۇشىنشى وتىرىسىنا قاتىستى.
قازاقستان پرەزيدەنتى وتىرىسقا قاتىسۋشىلار الدىندا سويلەگەن سوزىندە ەكىجاقتى ىنتىماقتاستىقتىڭ قازىرگى ماسەلەلەرىنە جان-جاقتى توقتالدى.
– قازاقستان مەن تۇركيا اراسىنداعى قارىم-قاتىناس ستراتەگيالىق سەرىكتەستىك رۋحىندا دامىپ كەلەدى. ساۋدا-ەكونوميكالىق بايلانىستار ىنتىماقتاستىعىمىزدىڭ ماڭىزدى بولىگى سانالادى, – دەدى مەملەكەت باسشىسى.
نۇرسۇلتان نازارباەۆ تۇركيانىڭ ماڭىزدى ينۆەستيتسيالىق ارىپتەستەرىمىزدىڭ ءبىرى ەكەنىن ايتتى.
قازاقستان پرەزيدەنتى ەكىجاقتى بايلانىستاردى ودان ءارى نىعايتۋدىڭ ناقتى شارالارىنا توقتالدى.
نۇرسۇلتان نازارباەۆ ءوزارا ىنتىماقتاستىق ماسەلەلەرىن شەشۋ ءۇشىن قازاقستان مەن تۇركيا اراسىنداعى ۇكىمەتارالىق كوميسسيانىڭ مۇمكىندىكتەرىن ءتيىمدى پايدالانۋ قاجەتتىگىن اتاپ ءوتتى.
سونىمەن قاتار مەملەكەت باسشىسى «جاڭا سينەرگيا» اتتى بىرلەسكەن باعدارلامانى جۇزەگە اسىرۋ ناتيجەلەرىنە توقتالىپ, ينۆەستيتسيالىق ارىپتەستىكتى دامىتۋ پەرسپەكتيۆالارى تۋرالى اڭگىمەلەدى.
– بۇگىندە قازاقستان «نۇرلى جول» باعدارلاماسى اياسىندا كولىك ينفراقۇرىلىمىن جاڭارتۋدا. ءبىز وسى باعدارلامانى ىسكە اسىرۋ ناتيجەسىندە ورتالىق ازياداعى جەتەكشى لوگيستيكالىق حابقا اينالۋدى جوسپارلاپ وتىرمىز. وسىعان بايلانىستى بىزگە ەلدەرىمىزدىڭ ترانزيتتىك الەۋەتىن ءتيىمدى پايدالانۋ قاجەت, – دەدى قازاقستان پرەزيدەنتى.
نۇرسۇلتان نازارباەۆ مۇناي-گاز جانە اسكەري-ونەركاسىپ سالالارىنداعى قاتىناستاردى نىعايتۋ ماسەلەلەرىنە نازار اۋداردى.سونداي-اق مەملەكەت باسشىسى اگروونەركاسىپ كەشەنىندە, تۋريستىك جانە عىلىمي-تەحنيكالىق سالالاردا ءتيىمدى بايلانىستار ورناتۋدىڭ ماڭىزدى ەكەنىن اتاپ ءوتتى.
كەڭەس بارىسىندا مادەني-گۋمانيتارلىق ىنتىماقتاستىق ماسەلەلەرىنە دە ەرەكشە ءمان بەرىلدى.
بەكەم باۋىرلاستىقتىڭ بەدەرلى بەلەسى
نۇرسۇلتان نازارباەۆ تۇركيا رەسپۋبليكاسىنا رەسمي ساپارىنىڭ قورىتىندىسى بويىنشا بۇقارالىق اقپارات قۇرالدارىنىڭ وكىلدەرى ءۇشىن بريفينگ وتكىزدى.
جۋرناليستەر الدىندا سويلەگەن سوزىندە مەملەكەت باسشىسى قوناقجايلىلىق كورسەتكەنى ءۇشىن تۇركيا رەسپۋبليكاسىنىڭ پرەزيدەنتى رەجەپ ەردوعانعا ريزاشىلىق ءبىلدىرىپ, وتكەن پرەزيدەنت سايلاۋىنداعى جەڭىسىمەن قۇتتىقتادى.
«رەسمي ساپارعا تۇرىك ەلىنە شاقىرىپ, قوناقجايلىلىق كورسەتكەندەرىڭىز ءۇشىن بارشالارىڭىزعا, ەڭ الدىمەن پرەزيدەنت مىرزاعا شىن جۇرەگىممەن العىسىمدى ايتامىن. باۋىرلاس تۇركيانىڭ ىشكى ساياسي تۇراقتىلىعى مەن تىنىشتىعى قازاقستان ءۇشىن وتە ماڭىزدى. رەجەپ تايپ ەردوعاندى بيىلعى ماۋسىمدا جاڭا جۇيە بويىنشا وتكەن پرەزيدەنتتىك سايلاۋداعى ايقىن جەڭىسىمەن تاعى دا شىن جۇرەكتەن قۇتتىقتايمىن.
سايلاۋ ناتيجەسى تۇرىك حالقى پرەزيدەنت مىرزانىڭ ەرەن ەڭبەگىن جوعارى باعالاپ, جۇرگىزىپ وتىرعان ساياساتى مەن ستراتەگيالىق باعىتتارىن قولداپ وتىرعاندىعىن الەم الدىندا كورسەتتى. بارشا قازاقستاندىقتاردىڭ اتىنان تۇركيا باسشىلىعىنىڭ جاڭا باستامالارىنا تابىس, باۋىرلاس تۇرىك حالقىنا باق-بەرەكە تىلەيمىن. تۇركيا – قازاقستاننىڭ ەڭ جاقىن ءارى سەنىمدى ستراتەگيالىق ارىپتەستەرىنىڭ ءبىرى. قازىر ورتاق تاريح پەن رۋحاني مۇراعا نەگىزدەلگەن قارىم-قاتىناسىمىز ورىستەي تۇسۋدە. بايلانىسىمىز بارلىق سالادا ىلگەرىلەپ, دامىپ كەلەدى», دەدى ەلباسى.
مەملەكەت باسشىسى تۇركيا پرەزيدەنتىمەن مازمۇندى ءارى ناتيجەلى كەلىسسوزدەر جۇرگىزگەنىن اتاپ ءوتىپ, وسى زاماننىڭ وزەكتى ماسەلەلەرى جونىندە وي-پىكىر الماسقانىن مالىمدەدى.
نۇرسۇلتان نازارباەۆ قازاقستان مەن تۇركيا اراسىنداعى قارىم-قاتىناستاردىڭ ستراتەگيالىق سيپاتىن اتاپ ءوتتى.
– ورتاق تاريح پەن رۋحاني قۇندىلىقتارعا نەگىزدەلگەن قارىم-قاتىناستارىمىز قارقىندى دامىپ, بارلىق باعىتتار بويىنشا نىعايا تۇسۋدە, – دەدى قازاقستان پرەزيدەنتى.
مەملەكەت باسشىسى تۇركيا رەسپۋبليكاسىنىڭ پرەزيدەنتى رەجەپ ەردوعانمەن وتكەن كەلىسسوز ناتيجەلەرىنە جان-جاقتى توقتالدى.
– بۇگىن تۇركيا پرەزيدەنتىمەن مازمۇندى ءارى ناتيجەلى كەلىسسوز وتكىزدىك. بۇل كەزدەسۋ وزەكتى ماسەلەلەر جونىندە پىكىر الماسۋعا مۇمكىندىك بەردى. جالپى, استانا مەن انكارا وڭىرلىك جانە حالىقارالىق پروبلەمالاردى ءاردايىم اشىق تالقىلايتىنىن اتاپ وتكىم كەلەدى. بۇل ماسەلەلەر بويىنشا ءبىزدىڭ ۇستانىمدارىمىز ۇقساس, – دەدى قازاقستان پرەزيدەنتى.
سونداي-اق نۇرسۇلتان نازارباەۆ قازاقستان مەن تۇركيا اراسىنداعى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ءۇشىنشى وتىرىسى ەكىجاقتى قاتىناستارعا ودان ءارى تىڭ سەرپىن بەرەتىنىنە سەنىم ءبىلدىردى.
مەملەكەت باسشىسى ەكى ەلدىڭ ساياسي ديالوگ پەن باۋىرلاس حالىقتاردىڭ دوستىعىن ءارى قاراي نىعايتىپ, تەرەڭدەتە تۇسۋگە مۇددەلى ەكەنىن ايتتى.
سونىمەن قاتار قازاقستان پرەزيدەنتى ەكى مەملەكەت اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرىنە توقتالدى.
– قازىر ەلىمىزدە تۇرىك كاپيتالىنىڭ قاتىسۋىمەن قۇرىلعان 1800-دەن استام كاسىپورىن بار. تاۋار اينالىمىنىڭ كولەمى وتكەن جىلى شامامەن 2 ميلليارد دوللار بولدى. بۇل كورسەتكىشتى بولاشاقتا 5 ميلليارد دوللارعا جەتكىزەمىز دەپ كەلىستىك, – دەدى نۇرسۇلتان نازارباەۆ.
نۇرسۇلتان نازارباەۆ «جاڭا سينەرگيا» اتتى بىرلەسكەن باعدارلامانى جۇزەگە اسىرۋدىڭ ارالىق قورىتىندىلارىن اتاپ ءوتىپ, «تۇرىك بيزنەسىنىڭ كاپيتاندارىمەن» جۇرگىزىلگەن كەلىسسوزدەردىڭ ناتيجەلەرىنە توقتالدى.
– جالپى, ساپارىم بارىسىندا قۇنى 2 ميلليارد دوللارعا جۋىق كوممەرتسيالىق جوبالارعا قاتىستى كەلىسىمدەرگە قول قويىلدى. الداعى ۋاقىتتا بۇگىنگى قول جەتكىزگەن ۋاعدالاستىقتاردى جۇزەگە اسىرۋ ءۇشىن كۇش جۇمىلدىرۋىمىز قاجەت, – دەدى مەملەكەت باسشىسى.
قازاقستان پرەزيدەنتى تۇرىك ينۆەستورلارىن اقتاۋ جانە قۇرىق پورتتارى نەگىزىندە جۇمىس ىستەپ جاتقان كولىك-لوگيستيكا حابىن دامىتۋعا بەلسەندى اتسالىسۋعا شاقىردى.
– بۇگىنگى كەلىسسوزدەر بارىسىندا ءبىز كولىك-ترانزيت, مۇناي-گاز, اسكەري-تەحنيكالىق, اۋىل شارۋاشىلىعى, تۋريزم, مادەنيەت, ءبىلىم, عىلىم جانە تەحنولوگيا سالالارىنداعى ىنتىماقتاستىعىمىزدى تالقىلادىق. ءبىز وسى باعىتتار بويىنشا ءوزارا ىقپالداستىعىمىزدى نىعايتۋعا ۋاعدالاستىق, – دەدى نۇرسۇلتان نازارباەۆ.
اتاجۇرتقا قۇرمەت
جيىن بارىسىندا ءسوز العان تۇركيا پرەزيدەنتى ر.ەردوعان قازاقستان پرەزيدەنتىنە رەسمي ساپارى ءۇشىن ريزاشىلىق ءبىلدىرىپ, كەزدەسۋلەر ناتيجەسىن جوعارى باعالادى.
تۇركيا رەسپۋبليكاسىنىڭ پرەزيدەنتى ساۋدا-ەكونوميكالىق بايلانىستاردى كەڭەيتۋ, ءبىلىم جانە مادەنيەت سالالارىنداعى ىنتىماقتاستىقتى تەرەڭدەتۋ ماسەلەلەرىنە قاتىستى كەلىسسوزدەردىڭ ماڭىزدى ناتيجەلەرىنە توقتالىپ, ونىڭ وڭ قارقىنىن اتاپ ءوتتى.
ءوز سوزىندە رەجەپ تايپ ەردوعان اتاجۇرتتان كەلگەن دەلەگاتسيانى ءوز رەزيدەنتسياسىندا قابىلداعانىنا قۋانىشتى ەكەنىن جەتكىزىپ, ەلباسى ن.نازارباەۆتى تۇركى الەمىنىڭ اقساقالى دەپ سانايتىنىن تاعى ءبىر مارتە ەسكە سالىپ ءوتتى.
«تۇركى الەمىنىڭ اقساقالىنا تاعى ءبىر رەت قوش كەلدىڭىز دەيمىن. 2015 جىلى قازاقستاندا باستالعان جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ءۇشىنشى وتىرىسىن انكارادا وتكىزدىك. ن.نازارباەۆپەن سوڭعى رەت 3 قىركۇيەكتە قىرعىزستاندا وتكەن تۇركىتىلدەس مەملەكەتتەر ىنتىماقتاستىق كەڭەسىنىڭ VI ءسامميتى بارىسىندا باس قوسقان ەدىك. قۇرمەتتى ارىپتەسىممەن جەكە كەزدەسۋدە جانە دەلەگاتسيالىق باسقوسۋدا ەكىجاقتى, كۇن تارتىبىندە تۇرعان بۇكىل ماسەلەلەردى شىنايى تۇردە تالقىلادىق. وتە اۋقىمدى ءارى ءتيىمدى كەزدەسۋ ءوتتى», دەدى ر.ەردوعان.
سونداي-اق وسى ساپار بارىسىندا بىرقاتار ماڭىزدى قۇجاتتارعا قول قويىلعانىن اتاپ ءوتىپ, سوعان سايكەس جالپى سوماسى شامامەن 2 ميلليارد دوللاردان اساتىن 20-دان استام قۇجاتقا ەكى ەلدىڭ جاۋاپتى مەكەمەلەرى مەن جەكەمەنشىك سەكتورى وكىلدەرى قول قويعانىن جەتكىزدى.
«كەلىسسوزدەر بارىسىندا ەكونوميكا, ساۋدا, قورعانىس جانە ءبىلىم بەرۋ سالالارىنا قاتىستى ەكىجاقتى ماسەلەلەردى جان-جاقتى ءارى ايرىقشا تالقىلادىق. تۇركيا مەن قازاقستان قارىم-قاتىناستارىنىڭ بارلىق سالادا جوعارى دەڭگەيگە جەتۋى ءۇشىن الداعى ۋاقىتتا قارقىنىمىز بەن ىنتامىزدى ارتتىرا تۇسەمىز. قازاقستانمەن ەكىجاقتى ىنتىماقتاستىقتى دامىتۋعا جانە تۇركى كەڭەسىنىڭ جۇمىسىنا قارقىن بەرۋ جونىندە كەلىستىك», دەدى تۇركيا پرەزيدەنتى.
سوڭىندا ر.ەردوعان قازاقستاندى اتاجۇرت دەپ سانايتىنىن تاعى ءبىر مارتە قايتالاپ, ەلباسى ن.نازارباەۆقا العىسىن ءبىلدىردى. تەرەڭ دە تامىرلى تاريحىمىزدان ءنار العان تۇركيا مەن قازاقستان قارىم-قاتىناسىنىڭ بولاشاقتا ودان ءارى نىعايىپ, داميتىنىنا سەنىم ءبىلدىردى.
اباي اسانكەلدى ۇلى,
«ەگەمەن قازاقستان» – انكارادان (تۇركيا)
