فينالدا ناومي وساكا الەمدەگى ەڭ ايگىلى تەننيسشىلەردىڭ ءبىرى ءارى بىرەگەيى 36 جاستاعى سەرەنا ۋيليامسپەن كەزدەستى. «ۇلكەن دۋلىعا» ساناتىنداعى تۋرنيرلەردىڭ جەكەلەگەن سايىندا 23 مارتە توپ جارىپ, جۇپتىق باسەكەدە 15 رەت دارا شىققان داڭقتى قارسىلاسىنان ەش قايمىقپاعان 20 جاستاعى جاپون قىزى بۇل ماتچتى 6:2, 6:4 ەسەبىمەن ءوز پايداسىنا شەشتى. وسى ويىن بارىسىندا اقش تەننيسشىسىنىڭ جۇيكەسى سىر بەرىپ, جانجال شىعارعانىن دا ايتا كەتۋگە ءتيىسپىز. سەرەنا قولىنداعى راكەتكانى سىندىرىپ, بىرنەشە رەت تورەشىنى بالاعاتتادى. ەندى ول وسى ارەكەتى ءۇشىن 17 مىڭ دوللار كولەمىندە ايىپپۇل تولەيتىن بولدى. ال ناومي وساكا ءوزىنىڭ سپورتىق عۇمىرىنداعى ازىرگە ەڭ ءىرى تابىسقا قول جەتكىزىپ وتىر. وسى كۇنگە دەيىن بىردە-ءبىر جاپونيانىڭ وكىلى ءدال وسىنداي دارەجەگە جەتكەن جوق ەدى.
ەرلەردىڭ فينالدىق سايىسى ىڭ-شىڭسىز ءوتتى. اقتىق سىندا سەربيالىق نوۆاك دجوكوۆيچ پەن ارگەنتينالىق حۋان-مارتين دەل پوترو شەبەرلىك بايقاستى. «ۇلكەن دۋلىعا» دوداسىندا 13 مارتە دارا شىعىپ, بارلىق 9 «ماستەرس» تۋرنيرلەرىندە الدىنا جان سالماعان قارت قۇرلىقتىڭ وكىلىنە وڭتۇستىك امەريكانىڭ وعلانى جارىتىپ قارسىلىق كورسەتە المادى. ءۇش سەتتىك سايىس 6:3, 7:6, 6:3 ەسەبىمەن اياقتالدى.
جەكەلەگەن سايىستا جەڭىمپاز اتانعان قوس تەننيسشى – ناومي وساكا مەن نوۆاك دجوكوۆيچ 3,8 ميلليون اقش دوللارىن ولجالادى. فينالدا ونەر كورسەتكەن سەرەنا ۋيليامس پەن حۋان-مارتين دەل پوترو $1,85 ميلليوندى يەمدەنەدى. جارتىلاي فينالعا جولداما العان ويىنشىلار $925 مىڭدى ەنشىلەسە, شيرەك فينالعا شىققاندار $475 مىڭدى قالتاعا باستى.
اقش-تىڭ اشىق بىرىنشىلىگىندە قازاقستاننىڭ ءۇش تەننيسشىسى ونەر كورسەتتى. سولاردىڭ اراسىنان ەڭ ءتاۋىر ناتيجەگە ميحايل كۋكۋشكين قول جەتكىزدى. ءۇشىنشى كەزەڭدە كۇش سىناسقانى ءۇشىن ول $156 مىڭدى يەلەندى. يۋليا پۋتينتسەۆا مەن زارينا دياس وزدەرىنىڭ تۇساۋكەسەر كەزدەسۋلەرىندە ۇتىلىپ قالدى. دەسەك تە ولار دا نيۋ-يوركتەن قۇر الاقان قايتقان جوق. وسى دودانىڭ العاشقى اينالىمىندا باق سىناعان ويىنشىلار ءۇشىن $54 مىڭ كولەمىندە سىياقى قاراستىرىلعان.
عالىم سۇلەيمەن,
«ەگەمەن قازاقستان»
