جىل سايىن ناعىز شەبەر شىعارمالاردىڭ باسىن قوساتىن ونەر جارمەڭكەسى بيىل قازاقستان سۋرەتشىلەر وداعىنىڭ 85 جىلدىعىنا ارنالىپ وتىر. ساراي ءىشىن كومكەرگەن كوپ كارتينالاردىڭ ونە بويىنان وتكەن تاريحتىڭ سارىنىن, ءار زاماننىڭ اقيقاتىن كورگەندەي بولدىق. حالقىمىزدىڭ رۋحاني قۇندىلىقتارى, ەلدىڭ ماقسات-مۇراتى مەن ۇلتتىق قاسيەت سۋرەتشىلەر شىعارماشىلىعىنداعى ءتۇرلى جانرلاردا ءار قىرىنان كورىنىس تاپقان. اعا بۋىن مەن جاستار اراسىنداعى ۇرپاقتار ساباقتاستىعىن جالعاعان ايتۋلى كورمەدەن ءمۇسىن, قولونەر, كەسكىندەمە, اكۆارەلدى جۇمىستار, گرافيكا سياقتى ءتۇرلى جانرداعى ونەر تۋىندىلارىن تۇگەل تاباسىز.
– ونەر تاريحىنداعى ءاربىر اعىم – زامان تولقىنىسى دەسەك, سونىڭ جارشىسى – سۋرەتشى. 1970-80 جىلدارى قازاق كلاسسيكالىق بەينەلەۋ ونەرىندەگى ديناميكالىق سەرپىلىستە كاسىبي قولدانبالى ونەر سالاسىنداعى سۋرەتشىلەر فورما مەن كەڭىستىكتى رەاليستىك, اۆانگاردتىق, ابستراكتسيالىق مانەردە ەركىن كوزقاراستاعى شىعارماشىلىقتارىمەن ەرەكشەلەنەدى. ءار تۋىندىدا شىنايىلىق اۋەنى اسقاقتادى. زامان كەلبەتى تانىلدى. سونداي-اق جالپى قازاق بەينەلەۋ ونەرىندە زاڭدىلىقتار ايتارلىقتاي وزگەرىپ, ۇلتتىق تاريحتىڭ سىرىن شەرتتى. بۇگىنگى كورمەگە سۋرەتشىلەرىمىزدىڭ قازىرگى كوزقاراسىمەن تاريحتى بايلانىستىرا وتىرىپ كرەاتيۆتى يدەياسىمەن سومداعان ءتۇرلى جۇمىستارى قويىلعان. بۇل شارانىڭ سۋرەتشىلەردىڭ شىعارماشىلىق تۇرعىدان وسۋىنە تيگىزەر ۇلەسى زور, – دەيدى كورمە جەتەكشىسى, ونەرتانۋشى گۇلنار قۋاندىققىزى.
كورمەدەن قازاقستان سۋرەتشىلەر وداعى قۇرىلعان كەزدەن باستاپ قولىنان قىلقالامى تۇسپەي كەلە جاتقان بەلگىلى سۋرەتشى تۇرسىن ءابۋوۆ, كەستە ونەرىن كەسكىندەمەمەن ۇشتاستىرىپ, حالقىمىزدىڭ رۋحاني بايلىعى مەن تاريحىن ءوز شىعارماشىلىعىنا ارقاۋ ەتكەن مۇحامەدجان زەينەلحان, ودان بولەك راحمان بەرتىلەۋوۆ, ومىربەك جۇبانيازوۆ سىندى ونەر يەلەرىنىڭ, تاعى باسقا دا سۋرەتشىلەردىڭ شوقتىعى بيىك تۋىندىلارىن ايرىقشا اتاۋعا بولادى.
ارمان وكتيابر,
«ەگەمەن قازاقستان»
الماتى
