2010 جىلى باستالعان «مەديتسينالىق پويىزدار» جوباسى جەمىستى جۇمىس اتقارىپ, جۇرتشىلىقتىڭ كوڭىلىنەن شىعىپ كەلەدى. ون جىلعا جۋىق ۋاقىت ارالىعىندا كونسۋلتاتيۆتىك-دياگنوستيكالىق پويىزدار رەسپۋبليكانىڭ بارلىق وبلىسىندا بولىپ, 1326 ستانسانىڭ 379 مىڭنان استام تۇرعىنىنا مەديتسينالىق كومەك كورسەتكەن. ماماندار سونىڭ ىشىندە 8 3806 بالانى تەكسەرۋدەن وتكىزگەن. دارىگەرلىك قابىلداۋدىڭ جالپى سانى 2,5 ملن ادامدى قۇراعان.
يگىلىگى مەن ىزگىلىگى مول جوبا بيىل دا ءوز جۇمىسىن قارقىندى جالعاستىرىپ وتىر. جۋىردا قاراعاندى جانە الماتى قالالارىنان «دەنساۋلىق» جانە «سالاماتتى قازاقستان» مەديتسينالىق پويىزدارى جولعا شىقتى. ءۇش اي بويى پويىزدار ەلىمىزدىڭ شالعايداعى تەمىر جول بەكەتتەرىندە توقتاپ, ەلدى مەكەن تۇرعىندارىنا مەديتسينالىق كومەك كورسەتەدى. پويىزداردىڭ مەديتسينالىق بريگادا قۇرامىنا تەراپەۆت, پەدياتر, نەۆروپاتولوگ, وكۋليست, لور, گينەكولوگ, حيرۋرگ, ۋرولوگ, ماممولوگ, ستوماتولوگ سياقتى بىلىكتى دارىگەرلەر كىرەدى.
پويىز زاماناۋي دياگنوستيكالىق قۇرالدارمەن جابدىقتالعان, ونىڭ ىشىندە كومپيۋتەرلىك سپيرومەترلىك جۇيەمەن, ەحوەنتسەفالوگرافپەن, دياگنوستيكالىق جۇكتەمە سىناقتارىن جۇرگىزۋ ءۇشىن كارديولوگيالىق مونيتورينگ جۇيەسىمەن, سونداي-اق رەنتگەن, ستوماتولوگيالىق, لور جانە وفتالمولوگيالىق جابدىقتاردىڭ سوڭعى ۇلگىلەرىمەن قامتاماسىز ەتىلگەن.
بيىل «دەنساۋلىق» پويىزى اتىراۋ, ماڭعىستاۋ, قىزىلوردا, تۇركىستان جانە الماتى وبلىستارى بويىنشا, بارلىعى 82 بەكەتكە توقتايدى. «سالاماتتى قازاقستان» پويىزىمەن شىعىس قازاقستان, پاۆلودار, قاراعاندى جانە قوستاناي وبلىستارىنىڭ شالعايداعى 57 ستانسانىڭ تۇرعىندارىن قامتۋ جوسپارلانىپ وتىر.
ستانسا تۇرعىندارى جوعارى بىلىكتى مەديتسينالىق كومەك, سونىڭ ىشىندە شاعىن حيرۋرگيالىق وپەراتسيالار, سونداي-اق جوعارى ساپالى ستوماتولوگيالىق كومەك الا الادى.
جوبا «سامۇرىق-قازىنا» اق كومپانيالار توبىنىڭ «Samruk-Kazyna Trust» الەۋمەتتىك جوبالاردى دامىتۋ قورى جانە دەنساۋلىق ساقتاۋ مينيسترلىگى, سونىمەن قاتار «قازاقستان تەمىر جولى» ۇك» اق-تىڭ «الەۋمەتتىك جوبالار» كورپوراتيۆتىك قورىنىڭ قولداۋىمەن جۇزەگە اسىرىلادى.
ميراس اسان,
«ەگەمەن قازاقستان»
