قازاقستان مۇسىلماندارى ءدىني باسقارماسى «ۋاقىپ» قايىرىمدىلىق قورىمەن بىرلەسە 2018 جاڭا وقۋ جىلى قارساڭىندا ەلىمىز بويىنشا 20 248 بالاعا مەكتەپ سومكەسىن ۇلەستىردى. وقۋ قۇرالدارى سالىنعان سومكە مەشىتكە ءوتىنىش بىلدىرگەن وتباسىلار مەن جەرگىلىكتى اكىمدىكتىڭ ۇسىنعان ءتىزىمى بويىنشا الەۋمەتتىك از قامتىلعان وتباسىلارعا تاراتىلدى.
استاناداعى «ازىرەت سۇلتان» مەشىتىندە وتكەن قايىرىمدىلىق اكتسياسىنا باس ءمۇفتي سەرىكباي قاجى وراز قاتىستى. وقۋشىلاردى جاڭا وقۋ جىلىمەن قۇتتىقتاپ, بالالارعا ارنالعان سىيلىقتى ءوز قولىمەن تابىستادى.
ء«بىزدىڭ حالقىمىز: «بەرسەڭ, بالاعا بەر», دەگەن. بالانىڭ قۋانىشى – بارىنەن قىمبات. جاڭا وقۋ جىلىندا وقۋشىلارعا سىيلىق ۇلەستىرۋ – ءدىني باسقارمانىڭ جىل سايىنعى ءداستۇرلى جوباسى. بالا – ەل بولاشاعى. بولاشاعىن ويلاعان ەل بالانىڭ ءبىلىمى مەن تاربيەسىنە ءمان بەرەدى», دەپ اتاپ ءوتتى قمدب توراعاسى, باس ءمۇفتي سەرىكباي ساتىبالدى ۇلى.
قايىرىمدىلىق – قمدب-نىڭ نەگىزگى ماقساتتارىنىڭ ءبىرى. ايتا كەتەيىك, جۋىردا قازاقستان مۇسىلماندارى ءدىني باسقارماسى قۇربان ايت كۇندەرى (21-23 تامىز, 2018 جىل) ەلىمىز بويىنشا 61 191 وتباسىنا 439 توننا قۇرباندىق شالىنىپ, ەتىن ۇلەستىردى.
«ەگەمەن-اقپارات»
