نۇرسۇلتان نازارباەۆ جوعارى دەڭگەيدەگى تۇراقتى كەزدەسۋلەر ەكى تاراپتىڭ دا ستراتەگيالىق سەرىكتەستىكتى ودان ءارى نىعايتۋعا مۇددەلى ەكەندىگىنىڭ ايقىن كورىنىسى سانالاتىنىن ايتتى.
– مەملەكەتتەرىمىز ارقىلى وتەتىن ءامۋداريا مەن سىرداريا وزەندەرى باسسەيندەرىنىڭ ماسەلەلەرىن تالقىلايمىز. بۇل ەكى وزەن ءبىزدىڭ بالالارىمىز بەن نەمەرەلەرىمىزگە ءومىر سىيلايدى. وسى پروبلەمالاردى بىرلەسە تالقىلاۋدىڭ ماڭىزى زور, – دەدى نۇرسۇلتان نازارباەۆ.
مەملەكەت باسشىسى ءسامميتتىڭ تۇرىكمەنستاندا دەر كەزىندە وتكىزىلىپ وتىرعانىنا توقتالىپ, حالىقارالىق ارالدى قۇتقارۋ قورىنىڭ بۇعان دەيىنگى ءسامميتى 2009 جىلى وتكەنىن اتاپ ءوتتى.
– مەن باۋىرلاس تۇرىكمەنستاننىڭ دامۋ بارىسىن ءجىتى قاداعالاپ وتىرامىن. تۇرىكمەن حالقىنا بار جاقسىلىقتى تىلەيمىن, – دەپ تۇيىندەدى قازاقستان پرەزيدەنتى.
گۋربانگۋلى بەردىمۇحامەدوۆ نۇرسۇلتان نازارباەۆقا ءىلتيپات ءبىلدىرىپ, حالىقارالىق ارالدى قۇتقارۋ قورىنىڭ قۇرىلتايشى مەملەكەتتەرى باسشىلارىنىڭ وتىرىسىنا شاقىرۋىن قابىل العانى ءۇشىن العىس ايتتى.
– قۇرمەتتى نۇرسۇلتان ءابىش ۇلى, باۋىرلاس ەلدەرىمىزدى بىرىكتىرەتىن كاسپي تەڭىزىنىڭ جاعاسىنا – تۇرىكمەنستانعا قوش كەلدىڭىز! – دەدى تۇرىكمەنستان پرەزيدەنتى.
تۇرىكمەنستان باسشىسى قازاقستان پرەزيدەنتىن بەسىنشى كاسپي ءسامميتىنىڭ تابىستى وتۋىمەن جانە تاريحي قۇجات – كاسپي تەڭىزىنە قاتىستى كونۆەنتسياعا قول قويىلۋىمەن قۇتتىقتادى.
ەكى ەل كوشباسشىلارى جول كارتاسىن ىسكە اسىرۋ, كولىك-ترانزيت سالاسىنداعى ىنتىماقتاستىقتى دامىتۋ, سونداي-اق وڭىرلىك قاۋىپسىزدىك ماسەلەلەرىن قاراستىردى.
سوڭىندا گۋربانگۋلى بەردىمۇحامەدوۆ نۇرسۇلتان نازارباەۆتى جانە بارشا قازاقستان حالقىن قۇربان ايت مەرەكەسىمەن قۇتتىقتادى.
