وسى ۋاقىتقا دەيىن تاڭعى ساۋىندى كەشكى ساۋىنعا قوسىپ تاسىمالداۋدىڭ رەتى كەلمەدى. ارقايسىسىن جەكە تاسۋ وزىندىك قۇنىن ءوسىرىپ, شىعىندى كوبەيتىپ جىبەرەتىن ەدى. بىرلىك اۋىلىنداعى يرينا يسيۋك بۇعان دەيىن ون شاقتى ساۋىن سيىر باعىپ كەلگەن بولاتىن. ساۋعانىمەن, ءسۇتىن وتكىزەتىن جەر جوق. بار قيىندىق وسىندا. اۋىلدىق كووپەراتيۆكە بىرىگۋ, ءسويتىپ مال ونىمدەرىن ەل يگىلىگىنە جاراتۋ تۋرالى جاڭا باستامانى قۋانا قابىلداعان. وتكەن جىلى بىرلىك اۋىلىندا ءسۇت قابىلدايتىن پۋنكت اشۋعا نيەت ەتتى. قابىلدانعان ءسۇتتى توڭازىتاتىن قۇرىلعىنىڭ قۇنى بەس ميلليون تۇرادى. ەكى جارىم ميلليونىن مەملەكەت ءوزى وتەپ بەرەدى, قالعان قارجىنىڭ جىلدىق ۇستەمەسى – التى-اق پروتسەنت.
كووپەراتيۆكە وسى ەلدى مەكەننىڭ جيىرمادان استام تۇرعىنى بىرىكتى. قازىر بارلىعى ساۋىلعان سۇتتەرىن قابىلداۋ ورنىنا تاپسىرىپ, ءتاپ-ءتاۋىر تابىس تابۋدا. يرينا يۆانوۆنا كووپەراتيۆ مۇشەلەرىنەن ءسۇتتىڭ ءار ءليترىن 75 تەڭگەدەن قابىلداپ الىپ, ءار ون بەس كۇن سايىن ەسەپ ايىرىسادى. مال باعۋدىڭ شىنىمەن تابىستى ەكەندىگىنە كوزى جەتكەننەن كەيىن 3 ميلليون تەڭگە نەسيە الىپ, 11 ساۋىن سيىر ساتىپ الدى. ءسۇتى بۇلاقتاي كىلەڭ قارا الا سيىرلار يگىلىكتىڭ باسى بولىپ ورالدى. ءار سيىردان تاۋلىگىنە شامامەن 20 ليتر ءسۇت ساۋىلادى. مەملەكەت ءسۇتتىڭ ليترىنە 10 تەڭگەدەن سۋبسيديا تولەيدى. ەندى تابىستىڭ كولەمىن دە ەپتەپ ەسەپتەي بەرۋگە بولار.
ءسۇت قابىلداۋ پۋنكتىنىڭ مەڭگەرۋشىسى تۇرعىنداردىڭ ءسۇتىن قابىلداۋ كەزىندە ساپاسى مەن مايلىلىعىنا ءجىتى كوڭىل اۋدارادى. ازىرگە ءشوپ بوياۋى قاشا قويعان جوق, ءسۇتتىڭ مايلىلىعى 3,8 پروتسەنتتەن اينالىپ تۇر. اۋىل حالقى ءسۇتتى مول الۋ ءۇشىن مال تۇقىمىن اسىلداندىرۋعا بەت بۇرعان. بۇرىنعى اتاسى سيىر بولعانىمەن, ەشكىنىڭ سۇتىندەي عانا ءسۇت بەرەتىن ونىمسىزدەرىنەن قۇتىلماق. يرينا يسيۋك باسشىلىق ەتەتىن «اق نيەت» كووپەراتيۆى اسىل تۇقىمدى ەكى بۇقا ساتىپ الدى. ونىڭ بىرەۋى ءسۇتتى قارا الا بولسا, ەكىنشىسى قازاقتىڭ اقباس تۇقىمدى بۇقاسى. جالعىز سۇتكە عانا يەك ارتپاي, ەت وندىرۋگە دە ۇمتىلىپ وتىر.
كووپەراتيۆ قوجاسىنىڭ مەنشىگىندە 150 گەكتار جايىلىمدىق جەر بار. مال ازىعىنا قاجەتتى شابىندىق تۇنىپ تۇر. ەندىگى جەتپەي جاتقانى تەحنيكا. الداعى ۋاقىتتا ەت پەن ءسۇتتى قاتار ءوندىرىپ, جەم-ءشوپ دايىنداۋعا قاجەتتى تەحنيكا ساتىپ الۋعا كوڭىلدەرى اۋىپ وتىر. ايتپەسە, ءشوپتىڭ ءار تىركەمەسىن 25-30 مىڭ تەڭگەدەن ساتىپ الاتىن بولسا, باعىمداعى مالىن قىستان شىعارۋعا ءبىر ميلليونعا جۋىق قاراجات كەتەدى ەكەن. ءسۇت بۇلاعى سارقىلماسا, وعان دا قولدارىنىڭ جەتەتىندىگىنە سەنىمدى.
مەملەكەت تاراپىنان كورسەتىلىپ جاتقان قولداۋدىڭ ارقاسىندا اۋىلدىق كووپەراتيۆ قۇرىپ, تابىستى ەڭبەك ەتىپ جاتقان حالىقتىڭ قارەكەتىنىڭ ەكىنشى جاعى بار. بۇعان دەيىن ساۋدا سورەلەرىندە قۇرعاق سۇتتەن دايىندالعان ءسۇتتى ءىشىپ كەلگەن اۋدان تۇرعىندارى تاياۋداعى ۋاقىتتا جەرگىلىكتى ونىممەن جەتكىلىكتى قامتاماسىز ەتىلەدى. ەل ىشىندە تۇرىپ, باعىمىنداعى مالدىڭ يگىلىگىن كورمەۋ ۇيات ەمەس پە؟!
بايقال ءبايادىل,
«ەگەمەن قازاقستان»
اقمولا وبلىسى,
ساندىقتاۋ اۋدانى
