حالىق قالاۋلىلارى اۋەلى مەركى اۋدانىنداعى «مەركى ەت» كومبيناتىنا بارىپ, مۇندا مال سويىپ, ەت ءوندىرىپ جاتقان ىرگەلى كاسىپورىننىڭ جۇمىسىن كوردى. وندىرگەن ءونىمىن ءوز ەلىمىزگە عانا ەمەس, يران مەن باحرەين ەلدەرىنە ەكسپورتتايتىن كومبيناتتىڭ كۇن سايىن 1000-1500 قوي مەن 250-300 ءىرى قارا مالىن سويۋعا مۇمكىندىگى بار. الايدا مۇندا سويۋعا اكەلىنەتىن مال باسى بۇگىندە ازداۋ بولعاندىقتان, ازىرگە بۇل مۇمكىندىك 30 پايىزعا عانا ورىندالىپ وتىر ەكەن.
ال اتالعان كومبيناتتىڭ ۆيتسە-پرەزيدەنتى سۇلتان الياسقاروۆ يران مەن باحرەين مەملەكەتتەرىنە وتكەن جىلى 214 توننا ەت جىبەرىلگەنىن, ال بيىلعى جىلى بۇل كورسەتكىش 360 تونناعا دەيىن ارتقانىن, سونىمەن قاتار جىل سوڭىنا دەيىن ەكسپورتتى 1000 تونناعا دەيىن جەتكىزۋ جوسپاردا بار ەكەنىن ايتىپ ءوتتى. سونداي-اق, ول مۇندا 80 ادام جۇمىس ىستەيتىنىن, جۇمىسشىلاردىڭ ورتاشا ايلىعى 60 مىڭ تەڭگە ەكەنىن جەتكىزدى.
جۇمىس ساپارى بارىسىندا حالىق قالاۋلىلارى مەركى اۋدانىنداعى «ترانسفەر» جانە «سىپاتاي باتىر» شارۋا قوجالىقتارىنىڭ ەگىس القابىنا باردى. ون گەكتار جەرگە ءتاتتى ءتۇبىر وتىرعىزعان «ترانسفەر» شارۋا قوجالىعىنىڭ جەتەكشىسى ۆلاديمير بوندارەنكو وتكەن جىلى ءار گەكتاردان 700-800 تسەنتنەرگە دەيىن ءونىم العانىن, ال بيىل ودان دا جوعارى كورسەتكىشكە قول جەتكىزۋ ءۇشىن ەڭبەكتەنىپ جاتقانىن جەتكىزدى.
ال «سىپاتاي باتىر» شارۋا قوجالىعى 300 گەكتار جەرگە تەحنيكالىق داقىل وتىرعىزعان ەكەن. قوجالىق جەتەكشىسى قانات شايحيەۆتىڭ ايتۋىنشا, شارۋاشىلىق بارىنشا جاڭا تەحنيكالارمەن قامتىلعان. سونىمەن قاتار, مۇنداعى قىزىلشا القابى تولىعىمەن جاڭبىرلاتىپ سۋارۋ جۇيەسىنە كوشكەن.
بۇدان كەيىن سەناتورلار ت.رىسقۇلوۆ اۋدانىنداعى جىلقى جانە ءىرى قارا مالدارىن بايلاپ, بورداقىلاۋمەن اينالىسىپ وتىرعان ء«سۇيىن» شارۋا قوجالىعىنىڭ جۇمىسىمەن تانىستى. اتالعان قوجالىقتىڭ مال بورداقىلاۋ كەشەنىندە قازىر 100-دەن اسا مال بورداقىلانۋدا. كەشەن باسشىسى ءاليحان دارمەنقۇلوۆ بورداقى مالدارىنىڭ الماتى جانە تاراز قالالارىنىڭ بازارلارىندا ساتىلىپ جاتقانىن ايتتى.
سونىمەن قاتار, مۇندا جۇمىس ىستەيتىن 10 ادام تۇراقتى تۇردە 50 مىڭ تەڭگە ايلىق الادى. بۇل رەتتە دەپۋتات مۇراتباي جولداسباەۆ وسىنداي تىرلىكتى وزگەلەرگە ۇلگى ەتۋ كەرەكتىگىن ايتسا, دەپۋتات ابدالى نۇراليەۆ سوڭعى جىلدارى ەلىمىزدە مەملەكەتتىك باعدارلامالاردىڭ ارقاسىندا اۋىل شارۋاشىلىعى سالاسى ايتارلىقتاي دامىعانىن, سوندىقتان دا شارۋالاردىڭ ەڭبەگى ەرەن ەكەنىن جەتكىزدى.
سونىمەن قاتار, جوعارعى پالاتا دەپۋتاتتارى اۋدانداعى «ايانا» جەكەمەنشىك بالاباقشاسىندا جانە «شاۋشەن» شارۋا قوجالىعىنىڭ مال سويۋ, ەتتى توڭازىتىپ ساقتاۋ كەشەنىندە بولدى. 2016 جىلى پايدالانۋعا بەرىلگەن بۇل كەشەن 250 ميلليون تەڭگەگە سالىنعان. مۇندا تاۋلىگىنە 200 قوي مەن 50 جىلقى سويۋعا, سونىمەن قاتار 35 تونناعا دەيىن ەت ساقتاۋعا مۇمكىندىك بار.
جامبىل وبلىسىنا جۇمىس ساپارى كەزىندە سەناتورلار تالاس اۋدانىنىڭ ورتالىعى قاراتاۋ قالاسىنداعى «شولاقتاۋ» تاۋ-كەن وڭدەۋ كەشەنىنىڭ جۇمىسىمەن تانىستى. اتالعان ءوندىرىس ورنىندا بۇگىندە 50 ادام جۇمىس ىستەيدى. سونىمەن قاتار, حالىق قالاۋلىلارى 10 ادامدى جۇمىسپەن قامتىپ وتىرعان «قاراتاۋ پرو» جاۋاپكەرشىلىگى شەكتەۋلى سەرىكتەستىگىندە بولدى. سونداي-اق, دەپۋتاتتار اۋداندىق ورتالىق ەمحانانىڭ جانە اۋداندىق مۋزەيدىڭ جۇمىسىمەن تانىستى.
ساپار بارىسىندا جۋالى اۋدانىنا كەلگەن دەپۋتاتتار ب.مومىش ۇلى اۋىلىنداعى داتقا باتىر اللەياسىنىڭ جانە اۋدان ورتالىعىنداعى «حالىققا قىزمەت كورسەتۋ» ورتالىعىنىڭ جۇمىسىمەن تانىستى. سونىمەن قاتار, كوكباستاۋ اۋىلدىق وكرۋگىندە ورنالاسقان ورتاعاسىرلىق «باركۋاب» قالاشىعىنىڭ قازبا جۇمىستارىن جانە جاڭاتالاپ اۋىلىنداعى «جاڭاتالاپ ءححى» شارۋا قوجالىعىنىڭ جۇمىسىن كوردى.
ءوڭىردىڭ وندىرىسىمەن جانە وزگە دە سالالارىمەن تانىسقان حالىق قالاۋلىلارى تاراز قالاسىندا جۇمىس ساپارىن قورىتىندىلادى. دەپۋتاتتار وبلىس ورتالىعىنداعى «قازفوسفات», «الينا تاراز پرو», «تا-ماك» جاۋاپكەرشىلىگى شەكتەۋلى سەرىكتەستىگىندە بولىپ, وڭىردە اتقارىلىپ جاتقان جۇمىستارعا وڭ باعالارىن بەردى.
حاميت ەسامان,
«ەگەمەن قازاقستان»
جامبىل وبلىسى
