«ەگىننىڭ قازىرگى جاعدايى استىقتىڭ كولەمى بىلتىرعىدان كەم تۇسپەيدى دەۋگە بولادى. ءبىز بارلىق كۇش-جىگەردى جۇمساپ, استىقتى توكپەي-شاشپاي, بارىنشا قىسقا مەرزىمدە جيناپ الۋىمىز قاجەت. كۇزگى جيىن-تەرىنگە دايىندىق جوسپار بويىنشا جۇرگىزىلىپ كەلەدى. جانار-جاعار ماي جەتكىلىكتى بولادى. وبلىسقا 1 ءليترى 172 تەڭگەدەن 76 مىڭ توننا ديزەل وتىنى ءبولىندى», دەدى ءوڭىر باسشىسى.
وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆتىڭ ايتۋىنشا, بيىل بارلىعى 4,7 ملن القاپقا ءداندى داقىلدار ەگىلگەن. بىلتىرعا قاراعاندا بيىل ءداندى داقىلدار القابى 100 مىڭ گەكتارعا ازايىپ, ونىڭ ورنىنا 101 مىڭ گەكتارعا ارپا, 21 مىڭ گەكتارعا بۇرشاق تۇقىمداستار, 78 مىڭ گەكتارعا مايلى داقىلدار سەبىلگەن.
«بيىل ەگىن ءۇشىن اۋا رايى اسا قولايلى بولمادى. سولتۇستىك اۋدانداردا ىلعالدىڭ تىم كوپ ءتۇسۋى مەن كۇننىڭ سالقىندىعى, وڭتۇستىك اۋداندارداعى قۋاڭشىلىق ەگىننىڭ جەتىلۋىنە كەرى اسەر ەتتى. قازىر 2,6 ملن گەكتار جەردىڭ ەگىنى وتە جاقسى, 1,3 ملن گەكتاردىڭ ەگىنى قاناعاتتانارلىق كۇيدە. دەگەنمەن استىقتىڭ ءتۇسىمى جامان بولمايدى دەگەن ۇمىتتەمىز», دەدى عاۋەز تورسان ۇلى.
وبلىس بويىنشا تەحنيكا پاركىنىڭ دايىندىعى دا جاقسى. بيىل استىق القابىنا 9,6 مىڭ كومباين شىعادى. ونىڭ 3 مىڭى جوعارى ءونىمدى جاڭا تەحنيكالار بولىپ سانالادى. 3 مىڭ جاتكا, 8 مىڭ استىق تاسيتىن ماشينالار, تاعى باسقا دا تەحنيكالار قاتىسپاق.
مامانداردىڭ بولجامىنشا, استىق جيناۋ ناۋقانى 25-30 كۇندە, ياعني قىركۇيەكتىڭ 25-نە دەيىن تولىق اياقتالادى.
ءنازيرا جارىمبەت,
«ەگەمەن قازاقستان»
قوستاناي
