ءۆيتاليدىڭ قولىنان شىققان وزگە عالامشارلىقتار مەن دينوزاۆرلاردىڭ, ەرتەگى الەمىنىڭ باسقا دا كەيىپكەرلەرىنىڭ ۇلكەندى-كىشىلى مۇسىندەرى قازىرگى ۋاقىتتا ماڭايداعى بالالاردىڭ كوزقۋانىشىنا اينالعان. بالالار دەمەكشى, ولار ءۆيتاليدىڭ اۋلاسىنا ەمىن-ەركىن كىرىپ, ونداعى عاجايىپ تۋىندىلاردى قالاعاندارىنشا تاماشالاي الادى. بۇعان ءۇي يەسى تاراپىنان ەش قارسىلىق جوق.
«الەمدى جاقسى جاعىنا وزگەرتۋ ءۇشىن جانە وندا جاقسىلىق كوبىرەك بولسىن دەسەك, وزگەرىستى الدىمەن وزىمىزدەن باستاۋىمىز كەرەك», – دەيدى ۆيتالي حلەبوۆ.
ون ساۋساعىنان ونەر تامعان ءۆيتاليدىڭ بۇل ىسىنە سونشالىقتى كوپ قارجى كەتە قويماپتى. سەبەبى ول مۇسىندەردىڭ كوبىسىن پەنوپلاست ماتەريالىنان جاساعان ەكەن.
حلەبوۆتىڭ ماماندىعى – سۋرەتشى. ءوزىنىڭ ايتۋىنشا, مۇسىندەردى جاساۋ كەزىندە اجەپتاۋىر تەر توگىپ, ەڭبەكتەنۋگە تۋرا كەلگەن. كەيىپكەرلەرىنىڭ كىم ەكەندىگى تۇسىنىكتى بولۋ ءۇشىن ءارى ولاردىڭ بالالاردى باۋراپ الاتىنداي تارتىمدى شىعۋى ءۇشىن ۇساق-تۇيەك بولشەكتەردى جاساۋدىڭ وزىنە ءمان بەرىپ, اياماي كۇش جۇمساپتى. سودان دا بولار, شەبەردىڭ قولىنان شىققان تۋىندىلار تۇرعىندار تاراپىنان زور سۇيىسپەنشىلىككە بولەنگەن.
ءوزىنىڭ بۇل ءىسىن «رۋحاني جاڭعىرۋ» باعدارلاماسىنا قوسقان تامشىداي بولسا دا ۇلەسىم دەپ بىلەتىن جەزقازعاندىق شەبەر ەلباسىنىڭ ازاماتتاردى ەل ءۇشىن قانداي دا ءبىر پايدالى ءىس جاساۋعا شاقىرعان ۇندەۋىن تولىعىمەن قولدايتىنىن ايتادى. «پاتريوت بولعاننان جاماندىق كورگەن ادامدى كەزدەستىرمەدىم. مەنىڭشە, ءاربىر ادامنىڭ ميسسياسى – جاقسىلىق جاساۋ, اينالاڭا قۋانىش سىيلاۋ. ءبىز بۇل ومىرگە قوناقپىز, سوندىقتان سوڭىمىزدان ماعىنالى ءىز قالدىرا ءبىلۋىمىز كەرەك», – دەيدى جانى جومارت حلەبوۆ مىرزا فيلوسوفيالىق وي تۇيىندەپ.
قايرات ءابىلدا,
«ەگەمەن قازاقستان»
جەزقازعان
