قازاق اقىل-ويىنىڭ كەمەڭگەرى قازاق ولەڭىنىڭ قاسيەتى اباي قۇنانباي ۇلىنىڭ شىعارماشىلىعى تالاي بۋىندى تاربيەلەپ كەلەدى. دانىشپان اقىننىڭ ولەڭدەرى مەن ناقىل سوزدەرى تالاي جاستىڭ ساناسىنا ساۋلە قۇيىپ, ولاردى رۋحانيات دۇنيەسىنە جەتەلەيدى. بيىل ۇلى اقىننىڭ تۋعانىنا 173 جىل تولۋىنا وراي تاراز قالالىق «جاس وتان» جاستار قاناتىنىڭ ۇيىمداستىرۋىمەن «اباي سالعان دارا جول» اتتى كۆەست ويىنى ءوتتى.
اتالعان ادەبي شارانىڭ وزىندىك ەرەكشەلىگى بار. كۆەست ويىنعا التى توپقا بولىنگەن 24 جەتكىنشەك قاتىسىپ, سەگىز بەكەتتى ارالاپ كوردى. ويىن شارتى بويىنشا قاتىسۋشىلار اتالعان بەكەتتەردى ارالاپ قانا قويماي, اباي جازعان ولەڭ جولدارىن ىزدەۋى ءتيىس. بۇل رەتتە توپ جەتەكشىلەرىنە كارتا جانە بەكەتتەردەن ءوتۋ قۇجاتى بەرىلىپ, ءار بەكەتكە ۇيىمداستىرۋشىلار تاراپىنان وكىلدەر تاعايىندالدى. ولار ويىنعا قاتىسۋشىلارعا اقىننىڭ ءومىرى مەن شىعارماشىلىعىنا قاتىستى سۇراقتار قويىپ, لايىقتى جاۋاپ الىپ وتىردى.
بۇدان كەيىن بارلىق قاتىسۋشىلار تاراز قالالىق اباي اتىنداعى ورتالىق كىتاپحاناعا كەلىپ, كۆەست ويىندى ءارى قاراي جالعاستىردى. ناتيجەسىندە, ويىن شارتىن تۇگەل ورىنداعان «جاس الاش» توبى جەڭىمپاز اتاندى. شارا بارىسىندا اتالعان كىتاپحانا ديرەكتورى روزا بوستايقىزى اقىننىڭ ءومىر جولى مەن شىعارماشىلىعى تۋرالى ايتا كەلىپ, اباي مۇرالارىنىڭ حالقىمىز ءۇشىن تاعىلىمى مول ەكەنىن جەتكىزدى. ءوز كەزەگىندە جامبىل وبلىستىق «جاس وتان» جاستار قاناتى توراعاسىنىڭ ورىنباسارى باقكەلدى تۇرسىنبەك پەن تاراز قالالىق «جاس وتان» جاستار قاناتى توراعاسىنىڭ مىندەتىن اتقارۋشى باقىتجان قۇتجان جەڭىمپاز توپتى جانە قاتىسۋشىلاردى ماراپاتتاپ, ولارعا ارنايى ديپلومدارمەن قاتار باعالى سىيلىقتار تابىس ەتتى.
حاميت ەسامان,
«ەگەمەن قازاقستان»
جامبىل وبلىسى
