ەلوردامىزدا كوشەگە ۇلى جازۋشى شىڭعىس ايتماتوۆتىڭ اتىنىڭ بەرىلۋى باۋىرلاس ەلدەر — قازاقستان مەن قىرعىزستان اراسىنداعى دوستىق-تۋىستىق بايلانىستىڭ تاماشا ۇلگىسى.
شىڭعىس ايتماتوۆتىڭ بۇكىل شىعارماشىلىعى مەن ءومىر جولى قازاق توپىراعىمەن تىكەلەي بايلانىستى. ول ءوزىنىڭ ەستەلىكتەرىندە: «مەن شەتكە شىققاندا ارقاشان قاستەرلەپ جۇرەتىن ەكى اسىلىم بار – ءبىرىنشىسى ماناس ەپوسى, ەكىنشىسى – مۇحتار اۋەزوۆ», دەپ كەزدەيسوق جازعان جوق.
«شىڭعىس ايتماتوۆ – ەكى ەلگە تەڭ تۇلعا, ءبارىمىزدىڭ ورتاق ماقتانىشىمىز. ءبارىمىز ۇلى قالامگەردىڭ شىعارماشىلىعىن قاتار وقىپ وستىك. بۇگىندە دە وسكەلەڭ جاس ۇرپاق شىڭعىس اعامىزدى ءسۇيىپ وقيدى. ويتكەنى ونىڭ شىعارمالارى بىزگە وتە جاقىن. وندا ەكى تۋىسقان حالىقتىڭ قيلى تاعدىرى مەن تەرەڭ تامىرى جاتىر», — دەدى باقىتجان ساعىنتاەۆ.
قىرعىزستان پرەمەر-ءمينيسترى م. ابىلگازيەۆ قازاقستان پرەزيدەنتى نۇرسۇلتان نازارباەۆقا استانا كوشەلەرىنىڭ بىرىنە ۇلى جازۋشىنىڭ ەسىمىن بەرۋ تۋرالى شەشىم قابىلداعانى ءۇشىن شىن جۇرەكتەن العىسىن ءبىلدىردى.
«شىڭعىس ايتماتوۆ قازاق-قىرعىز حالىقتارىنىڭ ۇلتتىق يگىلىگى. قازاقستان ەلورداسى كوشەلەرىنىڭ بىرىنە جازۋشى ەسىمىنىڭ بەرىلۋى وتە قۋانىشتى جاعداي, سەبەبى استانا – ەۋرازيانىڭ باستى ءارى كۇن سايىن گۇلدەنىپ جاتقان قالالارىنىڭ ءبىرى. بارلىق قازاقستاندىقتاردى تاۋەلسىز قازاقستاننىڭ سيمۆولى – استانانىڭ 20 جىلدىق مەرەيتويىمەن قۇتتىقتايمىن. باۋىرلاس قازاق حالقىنىڭ بارلىق جەتىستىكتەرىنە شىن جۇرەكتەن قۋانامىز», — دەدى مۋحاممەدكالىي ابىلگازيەۆ.
قازىرگى تاڭدا بىشكەك قالاسىندا اباي, ش. ءۋاليحانوۆ جانە م. اۋەزوۆ اتىنداعى كوشەلەر بار.
ايتا كەتۋ كەرەك, ش. ايتماتوۆ اتىنداعى كوشە (ەسك. بۇرىنعى اتاۋى — №199 كوشە) جالپى ماڭىزى بار ماگيسترالدى جول, سەگىز قوزعالىس جولاعى بار. كوشە 2016 جىلى 1,8 شاقىرىم ۇزىندىقتا قورعالجىن تاس جولىنان ە-10 (سىعاناق) كوشەسىنە دەيىنگى ۋچاسكەدە سالىنىپ, پايدالانۋعا بەرىلدى. بۇگىندە كوشەنى ە-10 (سىعاناق) كوشەسىنەن ۇلى دالا كوشەسىنە دەيىن 3 شاقىرىمعا ۇزارتىپ سالۋ جۇمىستارى جۇرگىزىلىپ جاتىر. اتالعان جول ۋچاسكەسىندە كولىك قوزعالىسى 2019 جىلى باستالادى, ال قۇرىلىس جۇمىستارىن تولىق اياقتاپ, پايدالانۋعا بەرۋ 2020 جىلعا جوسپارلانعان.
كوشە مەن ونىڭ اۋماعىن دامىتۋ جونىندەگى الداعى جوسپارلار تۋرالى استانا ق. باس ساۋلەتشىسىنىڭ ورىنباسارى انتون ماكسيموۆ باياندادى.
«شىڭعىس ايتماتوۆ كوشەسى – ەلوردانىڭ باستى كوشەلەرىنىڭ ءبىرى, 2020 جىلى ىسكە قوسىلاتىن اينالما جولدىڭ ءبىر بولىگى بولىپ تابىلاتىن كولىك ماگيسترالى. سونىمەن قاتار, ول تالدىكول كولىندەگى “نۇرجول” جەلەكجولى ءوسىنىڭ باستاۋى, ونىڭ اۋماعىندا قۇرىلىس جۇمىستارى جۇرگىزىلىپ جاتىر. بۇل اۋداننىڭ بارلىق نىساندارى جاڭا, قايتا جوندەلگەن نىساندار جوق. كوشە بويىنشا 2 ملن م² تۇرعىن ۇيگە, جۇزدەگەن عيماراتتارعا, مىڭداعان پاتەرلەرگە شىڭعىس ايتماتوۆتىڭ ەسىمى بەرىلەدى», — دەدى ا. ماكسيموۆ.
بۇدان وزگە, استانانىڭ باس ساۋلەتشىسىنىڭ ورىنباسارىنىڭ مالىمدەۋىنشە, قورعالجىن تاس جولىنان باستاپ تالدىكول كولىنىڭ بويىندا, كوشەنىڭ ۇزىنا بويىمەن دەمالىس ساياباقتارى, ينفراقۇرىلىم نىساندارى ورنالاساتىن جاڭا رەكرەاتسيالىق ايماق قۇرۋ جوسپارلانعان.
«بيىل جوبالاۋ جۇمىستارىن اياقتاپ, وڭتۇستىك باعىتتا ۇلى دالا كوشەسىنە دەيىن كوشەنى جالعاستىرامىز. شىڭعىس ايتماتوۆ كوشەسىنىڭ شىعىس بولىگىنە – قۇرىلىس نىساندارى سالىنادى, ال باتىس بولىگى – رەكرەاتسيا ايماعى, قالپىنا كەلتىرىلۋى, كوگالداندىرۋى, اباتتاندىرىلۋى ءتيىس تالدىكول كولى. كەڭەس وداعىندا ەڭ كوگالداندىرىلعان قالالاردىڭ ءبىرى بولعان فرۋنزە قالاسى مەن قالاداعى ەڭ جاسىل كوشە بولۋى ءتيىستى استاناداعى شىڭعىس ايتماتوۆ كوشەسى اراسىندا ۇلكەن بايلانىس بار», — دەپ ءسوزىن قورىتىندىلادى ا. ماكسيموۆ.
شىڭعىس ايتماتوۆ (1928–2008) — تانىمال قىرعىز جازۋشىسى, مەملەكەت قايراتكەرى. ەۋروپا اكادەميالارىنىڭ قۇرمەتتى اكادەميگى, قىرعىزستاننىڭ جانە كسرو-نىڭ جوعارى كەڭەسىنىڭ دەپۋتاتى بولىپ بىرنەشە رەت سايلانعان. قر پرەزيدەنتى ن. ءا. نازارباەۆتىڭ بەيبىتشىلىك جانە رۋحاني كەلىسىم سىيلىعىنىڭ لاۋرەاتى (1993 ج.).
اشىلۋ سالتاناتى اياقتالعاننان كەيىن, پرەمەر-مينيسترلەر ب. ساعىنتاەۆ پەن م. ابىلگازيەۆ ەلوردانىڭ بىرقاتار ءىرى نىساندارىن ارالادى: بۇل «ەكسپو-2017» حالىقارالىق كورمەسىن وتكىزۋ اۋماعىندا ورنالاسقان «نۇر الەم» پاۆيلونى مەن ات-حاب, سونداي-اق قر تۇڭعىش پرەزيدەنتى – ەلباسىنىڭ كىتاپحاناسى جانە ۇلتتىق مۋزەي.
ەسكە سالا كەتەيىك, قىرعىزستان رەسپۋبليكاسىنىڭ پرەمەر-ءمينيسترى مۋحاممەدكالىي ابىلگازيەۆ استاناعا 2018 جىلعى 17 تامىزدا وتەتىن قازاقستان–قىرعىزستان ۇكىمەتارالىق كەڭەسىنىڭ جەتىنشى وتىرىسىنا قاتىسۋ ءۇشىن كەلدى.
