اتالعان باسقوسۋدا قازاقستان حالقى اسسامبلەياسى وبلىستىق حاتشىلىعىنىڭ مەڭگەرۋشىسى, توراعا ورىنباسارى بيبىگۇل اققوجينا, وبلىستىق تىلدەردى دامىتۋ باسقارماسىنىڭ ءبولىم مەڭگەرۋشىسى كەنجەعالي بيماعامبەتوۆ, وبلىستىق قوعامدىق كەلىسىم كەڭەسىنىڭ ءتورايىمى, اقىن الەكساندرا سۋسلوۆا, چەليابى مەملەكەتتىك ۋنيۆەرسيتەتى قوستاناي فيليالى ديرەكتورىنىڭ ورىنباسارى ءالىمجان بەكماعامبەتوۆ, چەليابى وبلىسىنىڭ ءبىلىم جانە عىلىم مينيسترلىگىنىڭ وكىلى ەۆگەنيا ماركينا, چەليابى ءبىلىم بەرۋ قىزمەتكەرلەرىنىڭ بىلىكتىلىگىن كوتەرۋ جانە قايتا دايارلاۋ ينستيتۋتىنىڭ كافەدرا مەڭگەرۋشىسى تاتيانا سولوۆەۆا, چەليابى وبلىسىنداعى «جاقسىلىق» قازاق ۇلتتىق-مادەني قوعامدىق بىرلەستىگىنىڭ ءتورايىمى يۋليت بايداۋلەتوۆا ءسوز سويلەدى.
«دوڭگەلەك ۇستەل» بارىسىندا قوستاناي وبلىسى اكىمدىگىنىڭ تىلدەردى دامىتۋ باسقارماسىنىڭ باسشىسى گۇلجان مەڭدەكەنوۆا قاتىسۋشىلارعا جىلى لەبىز ءبىلدىردى. باسقوسۋدا ەلىمىزدەگى ءتىل رەفورماسى جانە جالپى ءتىل ۇيرەنۋ, انا ءتىلىن ساقتاۋداعى كورشى ەكى ەلگە, ەكى ۇلتقا ورتاق ماسەلەلەر, سونىمەن قاتار قازاقستانداعى قازاق ءتىلى ءالىپبيىنىڭ لاتىن حارپىنە كوشىرىلۋى, ونىڭ جۇزەگە اسۋى تۋرالى ايتىلدى.
«قازاق ءتىلى ءالىپبيىنىڭ لاتىنعا كوشىرىلۋى ۋاقىت تالابى. ودان قازاق ءتىلىنىڭ وزىنە كەلەتىن ەشقانداي نۇقسان بولادى دەپ ويلامايمىن. مەن ورىس ادامىمىن, قازاقستاندا ورىس تىلىنە ءتونىپ تۇرعان قاۋىپتى كورىپ وتىرعان جوقپىن. ءتىل ۇيرەنۋ كەز كەلگەن ادامنىڭ بايلىعى, سونى ءبىلۋىمىز قاجەت. ال ءوزىڭ وتانىم دەپ ساناپ, ءومىر ءسۇرىپ وتىرعان ەلدە سول ەلدىڭ مەملەكەتتىك ءتىلىن ءبىلۋ پارىز» دەدى وبلىستىق قوعامدىق كەلىسىم كەڭەسىنىڭ ءتورايىمى الەكساندرا سۋسلوۆا.
چەليابى وبلىستىق ءبىلىم جانە عىلىم مينيسترلىگى نەگىزگى, ورتا جانە جالپى ءبىلىم بەرۋ ءبولىمىنىڭ كەڭەسشىسى ەۆگەنيا ماركينا قازاق دياسپوراسى وكىلدەرىنىڭ انا ءتىلىن ۇيرەنۋىنە وبلىستا ەشقانداي كەدەرگىنىڭ بولمايتىنىن, قايتا وسى ىستە بىرلەسىپ قىزمەت ەتۋگە دايىن ەكەنىن جەتكىزدى. چەليابى مەملەكەتتىك ۋنيۆەسريتەتى قوستاناي فيليالى ديرەكتورىنىڭ ورىنباسارى, زاڭ عىلىمدارىنىڭ كانديداتى ءالىمجان بەكماعامبەتوۆ ەلباسىنىڭ ماقالاسىنا سايكەس «رۋحاني جاڭعىرۋ» باعدارلاماسىنىڭ ماڭىزىنا توقتالدى. «اركىم ءتىل ۇيرەنۋدى, ۋاقىت تالابىنا قاراي جاڭعىرىپ, جاڭارۋدى وزىنەن باستاۋى قاجەت. ءتىل ۇيرەنۋ – قاجەتتىلىك. قازاق ءتىلى ءالىپبيىنىڭ لاتىن حارپىنە كوشىرىلۋىنە ۋاقىت يتەرمەلەپ وتىر. قازىر ءتورتىنشى ونەركاسىپ رەۆوليۋتسياسى كەزىندە تسيفرلاندىرۋدى لاتىن ءحارپىنسىز قالاي ەلەستەتە الامىز؟ دۇنيە جۇزىندە 80 پايىز ەل وسى ءحارىپتى پايدالانادى» دەدى ءالىمجان باۋىرجان ۇلى.
رەسەيدەن كەلگەن قوناقتار قازاق ءتىلىن وقىتۋ بويىنشا كوكەيدە جۇرگەن ساۋالدارىن ورتاعا سالىپ, پىكىر الماستى. اڭگىمەنى قورىتا كەلە ءتىل ۇيرەتۋدە شەكارالاس ەكى وبلىستىڭ ءتىل ماماندارى ىنتىماقتاسا جۇمىس ىستەۋگە كەلىستى.
ءنازيرا جارىمبەت,
«ەگەمەن قازاقستان»
قوستاناي
