اعىمداعى جىلى ەلىمىزدىڭ كاسىپوداقتار فەدەراتسياسى باستاۋىش كاسىپوداق ۇيىمدارىمەن ءوزارا بايلانىسقا نەگىزدەلگەن بىرقاتار اۋقىمدى تاجىريبەلىك ءىس-شارالار وتكىزۋدە. «الاكول-2018» جازعى كاسىپوداق لاگەرى دە فەدەراتسيانىڭ كاسىپوداق جۇيەسى ءۇشىن وسى جازدىڭ باستى وقيعالارىنىڭ ءبىرى دەۋگە بولدى.
جازعى لاگەردە كاسىپوداق قوزعالىسىنىڭ 100-دەن استام بەلسەندىسى ارنايى وقۋدان ءوتتى. ولاردىڭ ىشىندە جاڭادان قۇرىلعان «SENIM» دەنساۋلىق ساقتاۋ قىزمەتكەرلەرىنىڭ سالالىق كاسىپوداعى, ءبىلىم جانە عىلىم قىزمەتكەرلەرىنىڭ سالالىق كاسىپوداعى, مادەنيەت, سپورت جانە اقپارات قىزمەتكەرلەرىنىڭ سالالىق كاسىپوداعىنىڭ مۇشەلەرى بولدى.
جازعى لاگەر اياسىندا قازاقستان كاسىپوداقتار فەدەراتسياسى توراعاسىنىڭ ورىنباسارى ەرلان سايروۆ, «SENIM» دەنساۋلىق ساقتاۋ قىزمەتكەرلەرىنىڭ سالالىق كاسىپوداق توراعاسى ساپاربەك دۇيسەنوۆ, شىعىس قازاقستان وبلىسى كاسىپوداقتار ورتالىعىنىڭ توراعاسى مەيىرحان تىلەۋباەۆ قاتىسۋشىلار الدىندا ءسوز سويلەدى.
ەرلان سايروۆ ءوز سوزىندە قازاقستان كاسىپوداقتار فەدەراتسياسىنىڭ ەلىمىزدەگى كاسىپوداق ۇيىمدارىنىڭ جۇمىس ساپاسىن جان-جاقتى دامىتۋدى جانە جاقسارتۋدى كوزدەيتىنىن جەتكىزدى. «كاسىپوداقتار قىزمەتكەرلەرى بەلسەندى جانە جان-جاقتى بىلىكتى ماماندار بولۋى ءتيىس. بەلسەندى اقپاراتتىق جۇمىس – كاسىپوداقتار قىزمەتىنىڭ ماڭىزدى بولىگى. شىنىندا بۇل ماڭىزدىلىعى جاعىنان كاسىپوداق جۇمىسىنىڭ ءداستۇرلى باعىتتارىنا تەڭ كەلەتىن, جارعىلىق مىندەتتەردى شەشۋدىڭ اجىرامايتىن بولىگى. اقپاراتتىق جۇمىس كاسىپوداق مۇشەسىنە كاسىپوداققا مۇشەلىككە سانالى كوزقاراسقا يە بولۋى ءۇشىن قاجەتتى تولىق مالىمەت بەرۋى ءتيىس» دەپ اتاپ ءوتتى كاسىپوداقتار فەدەراتسياسى توراعاسىنىڭ ورىنباسارى.
اتقارۋشى بيلىك وكىلدەرىنەن شىعىس قازاقستان وبلىسى اكىمىنىڭ ورىنباسارى اسەم ءنۇسىپوۆا, مەملەكەتتىك ەڭبەك ينسپەكتسياسى باسقارماسىنىڭ باسشىسى باقىتبەك قيزاتوۆ ءسوز سويلەدى.
«كاسىپوداقتار الەۋمەتتىك-ەڭبەك قاتىناستارىن شەشۋدىڭ ماڭىزدى بۋىنى. جۇمىسشىلاردىڭ ءال-اۋقاتى مەن الەۋەتى, ولاردىڭ الەۋمەتتىك كەپىلى مەن قۇقىعىنىڭ قورعالۋى تەك كاسىپوداقتاردىڭ بەلسەندىلىگىنە بايلانىستى», دەدى ءا.ءنۇسىپوۆا.
سونداي-اق قولدانبالى عىلىم سەكتورىنىڭ وكىلدەرى دە ءوز تاجىريبەلەرىمەن ءبولىستى. ولاردىڭ اراسىندا Academy of labour relations جشس باس ديرەكتورى بيبىگۇل نۇراشەۆا جانە باسقا دا عالىمدار بار.
«الاكول-2018» جازعى لاگەرى اياسىندا تاقىرىپتىق ترەنينگتەر, تيمبيلدينگ جانە باسقا دا شارالار ۇيىمداستىرىلدى.
2018 جىلدىڭ باسىنان باستاپ كاسىپوداقتار فەدەراتسياسى باستاۋىش كاسىپوداق ۇيىمدارىمەن ءوزارا بايلانىسقا جانە جۇمىس جۇرگىزۋگە باسا نازار اۋدارۋدا. سەبەبى كاسىپوداقتار قوزعالىسىنىڭ جانە جۇمىس توپتارىنىڭ ماسەلەلەرى مەن سۇرانىستارىنىڭ بارلىق سپەكترى باستاۋىش كاسىپوداق ۇيىمدارىندا شوعىرلانعان.
بيىل قركف باسشىلىعى فەدەراتسيا قىزمەتىنىڭ جاڭا ساياساتى مەن جول كارتاسىنىڭ نەگىزگى باعىتتارىن ءتۇسىندىرۋ ماقساتىندا ەلىمىزدىڭ بارلىق وڭىرىنە جۇمىس ساپارىمەن باردى. 2018 جىلعى قاڭتار-شىلدە ايلارىنىڭ ارالىعىندا باستاۋىش كاسىپوداق ۇيىمدارىمەن 139 كەزدەسۋ ءوتتى.
ازامات قاسىم,
«ەگەمەن قازاقستان»
شىعىس قازاقستان وبلىسى
