6 جاسقا تولماعاندار دا مەكتەپكە بارادى
وقۋ جىلىنىڭ 1 قىركۇيەكتەن باستالاتىنىنا قاراماستان, بالانى مەكتەپكە بەرۋ شارالارىن الدىن-الا ويلاستىرعان ءجون. بيىلدان باستاپ ەلىمىزدەگى جالپى ءبىلىم بەرەتىن ۇيىمداردىڭ ۇيعارىمى بويىنشا ءبىرىنشى سىنىپقا جەتى جاسقا تولعان بالالار جانە اعىمداعى كۇنتىزبەلىك جىلى التى جاسقا تولاتىن بالالار دا قابىلداناتىن بولادى. ياعني قىركۇيەك-جەلتوقسان ايلارىندا تۋعان بالالار ءبىرىنشى سىنىپقا بارا الادى. سەبەبى كۇنتىزبەلىك جىلدىڭ سوڭىنا دەيىن ولار تولىق التى جاسقا تولادى جانە مەكتەپكە قابىلدانۋعا قۇقىعى بار. سونداي-اق تيپتىك ەرەجەلەرگە سايكەس, ءبىلىم الۋشىلاردىڭ دايارلىق دەڭگەيى جانە دامۋ دارەجەسى بويىنشا سىنىپتاردى تولىقتىرۋعا جول بەرىلمەيدى, ءبىر سىنىپتاعى وقۋشىلار سانى 25-تەن اسپاۋى ءتيىس.
ديرەكتورلار ورتاق كەلىسىممەن تاعايىندالادى
اعىمداعى جىلى ەلىمىزدەگى مەكتەپتەردى اككرەديتتەۋ جانە مەكتەپ ديرەكتورلارىن تاعايىنداۋ ماسەلەسىندە بىرقاتار وزگەرىس بولماق. ۆيتسە-مينيستر اسحات ايماعامبەتوۆتىڭ ايتۋىنشا, ەندىگى ۋاقىتتا ءبىلىم باسقارمالارى مەن بولىمدەرى مەكتەپ ديرەكتورلارىن دەربەس تاعايىنداي المايدى. بۇدان بىلاي ولار «دارىن» ورتالىعىمەن ورتاق كەلىسىمگە كەلۋگە مىندەتتى.
اعىلشىن تىلىندە ساباق بەرىلە باستايدى
جاڭا وقۋ جىلىندا كەيبىر مەكتەپتەر 10 جانە 11 سىنىپتار ءۇشىن بىرنەشە ءپاندى اعىلشىن تىلىندە وقىتپاق. مينيسترلىكتىڭ جوسپارىنا سۇيەنسەك, تاياۋ ۋاقىتتا قازاقستاندىقتار پاندەردىڭ 80%-ءىن اعىلشىن تىلىندە وقىپ ۇيرەنۋى كەرەك. بۇگىنگى تاڭدا ولارعا ءدارىس بەرۋ ءۇشىن اعىلشىن ءتىلىن ۆ2 دەڭگەيىندە بىلەتىن 7 مىڭ پەداگوگ دايىن. اتالعان مۇعالىمدەر حيميا, فيزيكا, بيولوگيا, ينفورماتيكا پاندەرىن اعىلشىن تىلىندە وقىتادى. سوندىقتان 2018-2019 وقۋ جىلىندا جالپى ءبىلىم بەرەتىن 2 مىڭ مەكتەپ نەمەسە مەكتەپتەر سانىنىڭ 41 پروتسەنتى ءتورت ءپاندى اعىلشىن تىلىندە وقىتۋدى باستايدى. الايدا بۇل ەكى مىڭ مەكتەپ قىركۇيەكتەن باستاپ اعىلشىن تىلىندە وقىتۋعا تولىق كوشەدى دەگەن ءسوز ەمەس. مينيسترلىكتىڭ ايتۋىنشا, مۇندا ارنايى ادىستەمە مەن تەحنولوگيا بار. كەلەسى جىلى 12 مىڭ پەداگوگ اعىلشىن تىلىندە ساباق بەرۋگە دايىن بولادى دەپ كۇتىلۋدە.
جاڭا پاندەر ەنگىزىلەدى
سونداي-اق كەلەسى 2019-2020 وقۋ جىلىنان باستاپ ەلىمىزدىڭ بارلىق ورتا مەكتەپتەرىندە «كاسىپكەرلىك نەگىزدەرى» ءپانى 10-11 سىنىپ وقۋشىلارىنا اپتاسىنا ەكى رەت وقىتىلادى. بيىلعى وقۋ جىلىنان باستاپ وسى ءپان بويىنشا باعدارلاما جانە وقۋلىق اپروباتسيادان وتپەك. اپروباتسيا ەلىمىزدىڭ بارلىق 17 وڭىرىندە جۇرگىزىلىپ, مەكتەپ مۇعالىمدەرى ءتيىستى كۋرستاردى اياقتادى. مينيسترلىك اتالعان ءپان وقۋلىعىنىڭ ءبىرىنشى نۇسقاسى دايىن ەكەندىگىن جەتكىزدى.
اعىمداعى جىلدىڭ قازان ايىنان باستاپ مەكتەپتەرگە جاڭادان «ولكەتانۋ» ءپانى ەنگىزىلەدى. ينتەگراتسيالانعان وقۋلىقتى 5-6-7 سىنىپ وقۋشىلارى قازاق جانە ورىس تىلدەرىندە وقيتىن بولادى. كىتاپتىڭ مازمۇنى ءبىلىم جانە عىلىم مينيسترلىگى مەن وڭىرلەردە قۇرىلعان ارنايى ساراپتامالىق كوميسسيانىڭ تەكسەرىسىنەن ءوتىپ ماقۇلدانعان. قۇراستىرۋشى 8 اۆتور جيىرما ساعاتتىق باعدارلامادا بالا ءوز بەتىنشە ىزدەنۋگە بەيىمدەلەتىندىگىن ايتادى. مينيسترلىك تاپسىرىسى بويىنشا دايىندالعان وقۋلىق ەلباسىنىڭ «رۋحاني جاڭعىرۋ» باعدارلاماسىن نەگىزگە العان. كىتاپقا تاريح, قازاق ادەبيەتى, گەوگرافيا, مۋزىكا سياقتى 4 ءپان كىرىپ وتىر.
ەلەكتروندى جۇيە جۇمىستى جەڭىلدەتەدى
جاڭا وقۋ جىلى قارساڭىندا بارلىق مەكتەپتىڭ وقۋلىقتارمەن 100 پروتسەنت قامتىلۋى, ونىڭ ىشىندە جاڭارتىلعان ءبىلىم بەرۋ مازمۇنى بار وقۋلىقتار سانىنىڭ جەتكىلىكتى بولۋى مينيسترلىك تاراپىنان قاتاڭ قاداعالانۋدا. سونىمەن قاتار جاڭا وقۋ جىلىنان باستاپ مەكتەپتەگى قاعازباستىلىق ماسەلەسىن دە قىسقارتۋ قولعا الىنباق. ەلەكتروندى كۇندەلىك پەن ەلەكتروندى جۋرنالدار, اتا-انالارمەن بايلانىس ورناتۋ ءۇشىن ارنايى دايارلانعان ۇيالى قوسىمشاسى قاعازباستىلىقتى ءبىرشاما ازايتپاق. 1 سىنىپقا ەلەكتروندى قابىلداۋ جۇيەسى دە ۇستازداردىڭ جۇمىسىن جەڭىلدەتەدى.
ۇستازدار قاۋىمى ءۇشىن تاعى ءبىر جاڭالىق – بيىل ءبىلىم بەرۋدىڭ جاڭا باعدارلاماسىنا سايكەس, اتتەستاتسيادان جالپى ءبىلىم بەرەتىن ورتا مەكتەپتەردىڭ مۇعالىمدەرى عانا وتسە, ەندى قاراشا ايىنان باستاپ پسيحولوگتار دا وتەتىنىن ايتا كەتكەنىمىز ءجون.
3 ملن بالاعا كومەك كورسەتىلدى
بيىل ون ءبىرىنشى رەت ۇيىمداستىرىلعان «مەكتەپكە جول» اكتسياسى 1 تامىزدان 30 قىركۇيەككە دەيىن جالعاسادى. مينيسترلىكتىڭ بالالاردىڭ قۇقىعىن قورعاۋ كوميتەتىنىڭ توراعاسى نۇربەك ورشىبەكوۆتىڭ مالىمدەۋىنشە, وسى ۋاقىت ارالىعىندا اكتسيا بويىنشا 3 ميلليونعا جۋىق بالاعا 17 ميلليارد تەڭگەدەن استام ماتەريالدىق كومەك كورسەتىلدى. «وتكەن جىلى اتالعان كومەككە قول جەتكىزگەن بالا سانى 316 مىڭ وقۋشىنى قۇراپ, قايىرىمدىلىق كومەكتىڭ سوماسى 3 ميلليارد تەڭگەگە جەتكەن. بۇگىندە كومەككە مۇقتاج بالالاردىڭ سانى شامامەن 323 مىڭ بالا, بۇل ءتىزىم ءالى دە تولىعادى», دەدى بالالاردىڭ قۇقىقتارىن قورعاۋ كوميتەتىنىڭ توراعاسى.
ميراس اسان,
«ەگەمەن قازاقستان»
