«اقتاۋ تەڭىز پورتى» ارنايى ەكونوميكالىق ايماعى 2002 جىلعى قر پرەزيدەنتىنىڭ جارلىعىمەن قۇرىلعان. ونى قۇرۋداعى باستى ماقسات ەكسپورتتى دامىتۋ جانە جوعارعى تەحنولوگيالىق ءوندىرىستى قۇرۋعا باعىتتالعان. ايماق قۇرىلىسى باستالعالى بەرى 1200 جۇمىس ورنى اشىلعان. كەلەر جىلى جالپى قۇنى 69,59 ملرد. تەڭگەنى قۇرايتىن 6 جاڭا جوبا ىسكە اسىرىلىپ,1062 جاڭا جۇمىس ورنى قۇرىلادى دەپ جوسپارلانىپ وتىر. ماڭعىستاۋ وبلىستىق ءماسليحات دەپۋتاتى مەرەكە دۇيسەنباەۆ ارنايى ەكونوميكالىق ايماقتىڭ ەرەكشە بولۋى ەل ەكونوميكاسىنا قارجى تارتۋعا ىڭعايلى جاعداي جاسايتىندىعىن اتاپ ءوتتى.
- «نۇر وتان» پارتياسىنىڭ سايلاۋالدى باعدارلاماسى بويىنشا قۇرىلعان «يندۋستريالىق دامۋ» ساراپتامالىق كوميسسياسى «اقتاۋ تەڭىز پورتى» ارنايى ەكونوميكالىق ايماعىنداعى ينۆەستيتسيالىق جوبالارمەن تانىستى. وڭىرىمىزدە قولايلى ينۆەستيتسيالىق كليمات قالىپتاسقان. بۇل جوبالار ەلىمىزدىڭ ەكونوميكاسىنا ەلەۋلى ۇلەس قوساتىن جوبالار بولىپ تابىلادى.
ايماقتا 17 جوبا جۇزەگە اسىرىلۋدا, دەدى ول. 2018 جىلى جالپى قۇنى 10,5 ملرد. تەڭگەنى قۇرايتىن 4 جوبا – «Steelworking Center» جشس بولات ونىمدەرىن ءوندىرۋ, «اقتاۋ-ەنەرگوماش» جشس كابەلدەر مەن ترانسفورماتورلار وندىرەتىن زاۋىت, «Satex Chemie» جشس بيتۋم ەمۋلسياسى نەگىزىندە گيدرووقشاۋلاعىش ماتەريالداردى ءوندىرۋ جانە پوليمەرلى وراۋ ءوندىرىسى جۇزەگە اسىرىلىپ, 262 جاڭا جۇمىس ورنى اشىلادى دەپ جوسپارلانعان.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
