1 قىركۇيەكتەن باستاپ, قازاقستاندىق ستۋديانىڭ جۇزدەن استام فيلمنەن تۇراتىن كاتالوگى بۇكىل الەمگە قول جەتىمدى بولادى. ءباسپاسوز وتىرىسىنداعى سپيكەرلەر: «قازاقفيلم» اتىنان ساتۋ جانە ماركەتينگ سەكتورى جەتەكشىسىنىڭ مىندەتىن اتقارۋشى جاننا ماناباي, اتالعان سەكتوردىڭ مەنەجدەرى مارجان بەيبىتوۆا, ءباسپاسوز قىزمەتىنىڭ جەتەكشىسى اينۇر يساەۆا جانە MEGOGO كومپانياسى اتىنان ۆيدەوسەرۆيستىڭ ورتالىق ازياداعى كەڭسەسىنىڭ باس ديرەكتورى نۇرلان چۋكۋباەۆ بولدى.
ۆيدەوسەرۆيستىڭ ورتالىق ازياداعى كەڭسەسىنىڭ باس ديرەكتورى نۇرلان چۋكۋباەۆ: «MEGOGO-ءدىڭ كونتەنت ساياساتىنىڭ ءبىر باعىتى – جەرگىلىكتى وندىرىلگەن فيلمدەردىڭ كورسەتىلىمى. بۇعان الەۋمەتتىك سۇرانىس بار جانە مادەني ماڭىزى دا بار,» -دەدى. «سوڭعى جىلدارداعى قازاقستاندىق فيلمدەر الەمدىك دەڭگەيدە مويىنداۋعا لايىقتى. بىزدە كورسەتەتىن دۇنيە بار. ەگەر بارلىق فيلم شەتەلدىك كينوتەاترلاردا كورسەتىلمەسە, جيناقتالعان كاتالوگقا كورەرمەن ونلاين تۇردە قول جەتكىزە الادى. ونىڭ ۇستىنە, كاتالوگ حح عاسىردىڭ شەدەۆرلەرىنە تولى,» - دەپ نۇرلان چۋكۋباەۆ ەرەكشە اتاپ ءوتتى.
قازىرگى ۋاقىتتا «قازاقفيلم» اق-نىڭ ونلاين-كينوتەاترعا ۇسىنعان ۇلتتىق كينومۇراعاتىندا 150 فيلم بار. ونىڭ ىشىندە 148 كوركەم فيلم, 1 دەرەكتى فيلم («مادەني مۇرا» اتتى 10 سەريالىق تسيكل), 1 سەريال («استانا – ماحابباتىم مەنىڭ» كوپ سەريالى فيلم) بار. قول جەتىمدى كارتينالار پلاتفورماسىندا قازاق كينوسىنىڭ التىن قورىنا ەنگەن: «مەنىڭ اتىم قوجا», «قىز-جىگىت», ء«بىزدىڭ سۇيىكتى دارىگەر», «تاقيالى پەرىشتە», «كوكسەرەك», «قىز جىبەك» جانە ت.ب. كوپتەگەن فيلمدەر بار. 2018 جىلدىڭ 28 شىلدەدە جاسالعان كينوستۋديا مەن MEGOGO ۆيدەوسەرۆيسىنىڭ اراسىنداعى كەلىسىم-شارتقا سايكەس كونتەنتتى پايدالانۋ اقىلى بولادى. «قازاقفيلمنىڭ» كونتەنتىن ورنالاستىرۋدان باسقا كەلىسىم-شارت نەگىزىندە MEGOGO ۆيدەوسەرۆيسىندە كينوستۋديانىڭ جوبالارىنا اقپاراتتىق قولداۋ كورسەتىلەدى, سونداي-اق وسى ۆيدەوكونتەنتتى ليتسەنزياسىز قولدانۋعا قارسى كۇرەستى قامتاسىز ەتەدى.
«كينوستۋديا وندىرگەن فيلمدەرگە ينتەرنەت جەلىسىندە سۇرانىس بار. سوندىقتان دا ءبىز اتالعان ۆيدەوسەرۆيسكە كونتەنتىمىزدى شىعارىپ وتىرمىز. فيلمدەر قازاق جانە ورىس تىلدەرىندە قول جەتىمدى بولادى. بۇل جوبانىڭ ىسكە اسۋى قازاق كينوسىن ناسيحاتتاۋدا ماڭىزى زور دەپ بىلەمىز», دەدى «قازاقفيلم» اق ءباسپاسوز قىزمەتىنىڭ جەتەكشىسى اينۇر يساەۆا.
MEGOGO-ءدىڭ ءبىر ايداعى اۋديتورياسىن 40 ملن. پايدالانۋشى قۇرايدى. رەسۋرس كاتالوگىندا 77 000 ۆيدەو بار: 5000 كوركەم فيلم جانە سەريال, 1500-دەن استام مۋلتفيلم, شامامەن 45 000 تەلەۆيزيالىق شوۋ, كونتسەرتتەر مەن مۋزىكالىق ۆيدەو, سونداي-اق 20 000 جاڭالىق باعدارلاماسى بار.
