الەمنىڭ ەڭ ۇزدىك ويىنشىلارى كوشىن قىتايدىڭ قوس ساڭلاعى – فان چجەندۋن مەن سيۋي سين باستاپ تۇر. بۇگىنگى تاڭدا بۇل سپورتشىلاردىڭ داڭقى دۇركىرەپ تۇر. اتاپ ايتساق, 21 جاستاعى فان چجەندۋن – الەمنىڭ ءتورت دۇركىن چەمپيونى جانە سول جارىستىڭ ءۇش مارتە جۇلدەگەرى. الەم كۋبوگىن ءۇش مارتە ولجالاپ, 2014 جىلى ينچحوندا وتكەن ازيا ويىندارىندا ءبىر التىن مەن قوس كۇمىس مەدالدى يەمدەندى. 28 جاستاعى سيۋي سين بولسا, ريو وليمپياداسىنىڭ كوماندالىق سايىسىنىڭ جەڭىمپازى, الەم چەمپيوناتىندا توعىز رەت توپ جارىپ, ءۇش رەت جۇلگەرلەر قاتارىنا قوسىلدى. الەم كۋبوگىندا جەتى مارتە تەڭدەسسىز دەپ تانىلىپ, ازيا ويىندارىندا باس جۇلدەنىڭ ەكەۋىن ءوز قانجىعاسىنا بايلادى.
ءۇشىنشى ورىنعا تابان تىرەگەن گەرمانيالىق تيمو بوللدا وتە مىقتى ويىنشى رەتىندە ءوزىن الدەقاشان مويىنداتقان. 37 جاستاعى ارداگەر تەننيسشىسى سوڭعى ءۇش وليمپيا ويىندارىنىڭ كوماندالىق سايىسىندا جۇلدە الدى. سوڭعى 16 جىلدا ۇيىمداستىرىلعان الەم چەمپيوناتتارىنا ۇزدىكسىز قاتىسىپ جۇرگەن ول ايتۋلى جارىستى التى كۇمىس جانە ەكى قولامەن قورىتىندىلادى. الەم كۋبوگىندا ەكى رەت التىن تۇعىرعا كوتەرىلىپ, ەۋروپا بىرىنشىلىگىندە 17 مارتە دارا شىقتى.
سونىمەن قاتار, ۇزدىك ون ويىنشىنىڭ ساناتىنا قىتايلىق لين گاويۋان, گەرمانيالىق دميتري وۆچاروۆ, جاپونيالىق توماكادزۋ حاريموتو, قىتايلىق ما لۋن, كورەيالىق لي سان سۋ, برازياليالىق حيۋگو كالدەرانو جانە گونكونگتىق ۆون چۋن تين سىندى ساڭلاقتار ەنىپ وتىر. ەسىمدەرى اتالعان وسى جىگىتتەردىڭ بارلىعى دا اسا ءىرى حالىقارالىق دودالاردا جۇلدە الىپ جۇرگەن ساقا سپورتشىلار.
جالپى ەرلەردىڭ ەڭ وزىق 50 تەنيسشىسى قاتارىندا جاپونيانىڭ – 9, گەرمانيانىڭ – 7, قىتايدىڭ – 6, وڭتۇستىك كورەيانىڭ – 5, تايپەيدىڭ – 4, فرانتسيا, پورتۋگاليا, شۆەتسيا, ءۇندىستاننىڭ – 2, گونكونگ, نيگەريا, دانيا, ەگيپەت, ۋكراينا, قازاقستان, حورۆاتيا, يسپانيا, انگليا, برازيليا جانە اۆستريانىڭ –1 وكىلى بار.
ايەلدەر رەيتينگىندە دە قىتاي وزگەلەردەن قارا ءۇزىپ تۇر. اسپاناستى ەلىنىڭ ءۇش ارۋى الەمدىك رەيتينگتە اعارىپ الدا كەلەدى. ولار – جۋ يۋلين, ليۋ شيۆەن جانە چەن مەن. قىتايدىڭس تاعى ءۇش قىزى – ۆان مان يۋ (5 ورىن), دين نين (7 ورىن) جانە چەن سين تۋن (10 ورىن) ۇزدىك وندىقتىڭ ساناتىنا ەركىن ەنىپ وتىر. سونداي-اق, بۇل تىزىمدە جاپونيالىق كاسۋمي يشيكاۆا (4 ورىن), ميما يتو (6 ورىن), ميۋ حيرانو (9 ورىن) جانە تايپەيلىك چەن ي-چين (8 ورىن) سىندى سۇلۋلار بار.
ايەلدەر اراسىنداعى «توپ-50» تەننيسشىنىڭ قاتارىنا جاپونيانىڭ – 12, قىتايدىڭ – 8, وڭتۇستىك كورەيا, گونكونگ, سينگاپۋردىڭ – 3, تايپەي, رۋمىنيا, گوللانديا, گەرمانيا, اۆستريانىڭ – 2, كانادا, شۆەتسيا, پولشا پورتۋگاليا, ۆەنگريا, پۋەرتو-ريكو, تايلاند, ليۋكسەمبۋرگ, ەگيپەت, سولتۇستىك كورەيا جانە رەسەيدىڭ –1 وكىلى قوسىلىپ وتىر. وكىنىشكە قاراي, قازاقستان قۇراماسى ساپىنداعى قىزداردىڭ قارقىنى وتە باياۋ. جەرلەستەرىمىزدىڭ اراسىنان ەڭ ۇزدىك كورسەتكىش ءاليا كەلمەنبەتوۆا مەن زاۋرەش اقاشەۆاعا تيەسىلى. ولار ازىرگە 350 جانە 375 ورىنداردى قاناعات تۇتۋدا.
عالىم سۇلەيمەن,
«ەگەمەن قازاقستان»
الماتى
