شارانىڭ ماقساتى – بۇگىندە ۇمىت بولىپ, كوپتىڭ كوڭىلىنەن شىققان ۇلتتىق قۇندىلىقتاردى ناسيحاتتاۋ. ۇرپاقتان-ۇرپاققا امانات بولعان حالىق قازىنالارىنىڭ ۇلگىسىن كوپكە كورسەتۋ ءۇشىن اتالعان شاراعا تۇركىستان وبلىسى سارىاعاش قالاسىنىڭ «دومالاق انا» اجەلەر توبى ارنايى كەلىپ قاتىستى. شارا بارىسىندا رۋحاني مۇرالارىمىزدى زەرتتەۋ, ساقتاۋ مەن جاڭعىرتۋ بويىنشا كورمە, شەبەرلىك ساباقتارى, «ۇمىت قالعان اندەر» كونتسەرتتىك باعدارلاماسى, ء«داستۇرىڭدى ساقتاي ءبىل» ساحنالىق قويىلىمى ۇيىمداستىرىلدى.
بۇگىندە كۇنى ەل اراسىندا ۇمىت بولىپ بارا جاتقان سالت-ءداستۇر, ىرىم-تىيىم قاعيدالارى مەن قولونەر جۇمىستارىن تانىستىرعان ەلوردا قوناقتارى دا بارىنشا اشىلىپ, كورەرمەندەرمەن سىرلاسا كەتتى. سارىاعاش قالاسىنداعى ولكەلىك مۇراجايدىڭ مەڭگەرۋشىسى گۇلجاھان شەگەباەۆا: ء«بىز ءوز وڭىرىمىزدەگى قولونەر ءىسىنىڭ شەبەرلەرىن ارنايى الىپ كەلدىك. سونىمەن قاتار اۋىلدا ساقتالىپ قالعان سالت-داستۇرلەر ءبىزدىڭ قازاقى بولمىسىمىزدىڭ وزەگى. ءبىز ودان ايىرىلماۋىمىز كەرەك. قازاق قاشاندا سالتىمەن, داستۇرىمەن قازاق بولىپ قالادى. سول سەبەپتى يگى تاريحىمىزدى ناسيحاتتاۋ ءۇشىن ۇلتتىق مۋزەيدىڭ شاقىرتۋىن قابىل الىپ كەلدىك. بۇل ءبىز ءۇشىن ۇلكەن مارتەبە. وسىندا كەلگەن اجەلەر ءانسامبلى قازاقتىڭ ۇمىت بولا باستاعان حالىق اندەرىن دە ورىندايدى. وتكەنىن ۇلىقتاعان ۇلت ۇتىلمايدى», دەپ اقجارما ءسوزىن ايتتى.
«حالىق قازىناسى» عىلىمي-زەرتتەۋ ينستيتۋتىنىڭ بۇل يگى باستاماسى ءالى دە جالعاسىن تاپپاق. رۋحاني جاڭعىرۋ باعدارلاماسىنىڭ اياسىندا ەلىمىزىڭ ءار تاراپىنان قازىنا كەۋدە ۇلكەندەرىمىزدى شاقىرىپ, وسىنداي كەزدەسۋلەر مەن كەشتەر جالعاسىن تابادى دەپ سەنەمىز.
باعاشار تۇرسىنباي ۇلى,
«ەگەمەن قازاقستان»
