دەلەگاتسيا قۇرامىندا امەريكالىق باسقا دا ەكونوميكالىق ۇيىمداردىڭ وكىلدەرى جانە اقش-تىڭ قازاقستانداعى ەلشىلىگىنىڭ قىزمەتكەرلەرى بولدى. شاراعا «اتامەكەن» ۇكپ, قازاقستاننىڭ سىرتقى ساۋدا پالاتاسى, استانانىڭ كاسىپكەرلەر پالاتاسى بىرلەسىپ مۇرىندىق بولعانىن ايتا كەتەيىك. كەزدەسۋ وتكىزۋدەگى باستى ماقسات قازاقستان بيزنەسىنىڭ وكىلدەرىنە اقش-تاعى ارتىقشىلىقتاردىڭ باس جۇيەسى (GSP) باعدارلاماسىن كەڭىرەك تانىستىرۋعا باعىتتالدى. اتالعان باعدارلاما ەلىمىزدە وندىرىلەتىن 3500-دەن استام تاۋار ءتۇرىن مۇحيتتىڭ ارعى جاعىنداعى ەلدىڭ نارىعىنا باج سالىعىنسىز ەنگىزۋگە جول اشاتىنىن ايتا كەتەيىك.
كەزدەسۋ بارىسىندا اقش ساۋدا وكىلىنىڭ ساۋدا جانە ەكونوميكا ساياساتى جونىندەگى كومەكشىسى ەدۆارد گرەسسەر ەكى مەملەكەتتىڭ اراسىنداعى ساۋدا قاتىناستارىنا قاتىستى بىرقاتار دەرەكتى تىلگە تيەك ەتتى. ال ەلىمىزدىڭ سىرتقى ساۋدا پالاتاسىنىڭ باسقارما توراعاسى ايان ەرەنوۆتىڭ ايتۋىنشا, بۇگىنگى تاڭدا اقش-قا تۇراقتى تاۋار ەكسپورتتاۋمەن 2 مىڭعا جۋىق قازاقستاندىق ءوندىرۋشى اينالىسادى. قازاقستاننىڭ تاۋار اينالىمىندا الەم مەملەكەتتەرى اراسىندا اقش 6-ورىندى يەلەنەدى. قازاقستان مەن اقش اراسىنداعى تاۋار اينالىمى 2017 جىلى 1 ملرد 645 ملن اقش دوللارىن قۇرادى. بۇگىنگى تاڭدا GSP باعدارلاماسىن تۇتىناتىن ەلدەردىڭ ىشىندە قازاقستان تاۋار تاسىمالىنىڭ كولەمى بويىنشا 12-ورىن الاتىنىن ايتا كەتەيىك.
ارنۇر اسقار,
«ەگەمەن قازاقستان»
