مەرەكەلىك شاراعا مينيستردەن باستاپ وليمپيادا چەمپيونى, بالۋان جاقسىلىق ۇشكەمپىروۆ, اتاقتى اياقدوپشى سەيىلدا بايشاقوۆ, قىزدار اراسىنداعى ەركىن كۇرەستەن وليمپيا ويىندارىنىڭ كۇمىس جانە قولا جۇلدەگەرى گيۋزەل مانيۋروۆا, بوكستان ريو وليمپياداسىنىڭ كۇمىس جۇلدەگەرى ۆاسيلي لەۆيت جانە تاعى باسقا بىرقاتار ەلىمىزگە بەلگىلى سپورتشىلار مەن سپورت ارداگەرلەرى قاتىستى.
سالتاناتتى شارا بارىسىندا ۆەدومستۆو باسشىسى ەلىمىزدىڭ سپورتىن دامىتۋعا ۇلەس قوسىپ جۇرگەن 30-عا جۋىق ازاماتتى «دەنە شىنىقتىرۋ جانە سپورتتى دامىتۋعا سىڭىرگەن ەڭبەگى ءۇشىن», «قۇرمەتتى سپورت قىزمەتكەرى» توسبەلگىسىمەن جانە قۇرمەت گراموتاسىمەن ماراپاتتادى. ولاردىڭ قاتارىندا «بوكستان وليمپيادالىق دايارلاۋ ورتالىعى» رمقك جاسوسپىرىمدەر قۇراما كومانداسىنىڭ جاتتىقتىرۋشىسى اركادي توپاەۆ, سپورت رەزەرۆى جانە ادىستەمەلىك قامتاماسىز ەتۋ باسقارماسىنىڭ باس ساراپشىسى باحىتجان ەسجانوۆ, «كۇرەس تۇرلەرى بويىنشا وليمپيادالىق دايارلاۋ ورتالىعى» رەسپۋبليكالىق مەملەكەتتىك قازىنالىق كاسىپورنىنىڭ ادىسكەرى ابىلايحان قىلىشباەۆ بار.
«سىزدەردى سپورت كۇنى مەرەكەسىمەن قۇتتىقتايمىن! سپورت – ەلدىڭ مەرەيىن اسىرىپ, ابىرويىن تاسىتاتىن سالا. تاۋەلسىزدىك جىلدارى ەل سپورتشىلارى حالىقارالىق ءىرى جارىستاردا توپ جارىپ, كوك بايراعىمىز اسقاقتاي تۇسۋدە. ەلباسىمىز نۇرسۇلتان ءابىش ۇلى نازارباەۆ سپورتتى دامىتۋعا, سالاماتتى ءومىر سالتىنا ايرىقشا ءمان بەرەدى», دەدى ا.مۇحامەدي ۇلى.
ەل نامىسى مەن مەملەكەت ابىرويىن شەتەلدەگى حالىقارالىق ارەنالاردا قورعاپ جۇرگەن سپورتشىلار مەرەكەسى 2003 جىلدىڭ 15 قاراشاسىنداعى ەلباسىنىڭ جارلىعىنا سايكەس جىل سايىن تامىز ايىنىڭ ءۇشىنشى جەكسەنبىسىندە سپورت كۇنى رەتىندە اتاپ وتىلەدى.
ءالي بيتورە,
«ەگەمەن قازاقستان»
