مەديتسينالىق قىزمەتتەردى كورسەتۋ ساپاسىن ارتتىرۋ, دەنساۋلىق ساقتاۋ سالاسىندا سىبايلاس جەمقورلىق كورىنىستەرىنە جول بەرمەۋ – ەلدىڭ باسەكەگە قابىلەتتىلىگىنىڭ نەگىزگى فاكتورلارىنىڭ ءبىرى. ەندەشە, ۆەدومستۆولاردىڭ اراسىنداعى ءوزارا ءىس-قيمىل ەلدەگى جانە الەمدەگى سىبايلاس جەمقورلىقتىڭ جاي-كۇيى تۋرالى اقپاراتتار الماسۋ, دەنساۋلىق ساقتاۋ ۇيىمدارىندا سىبايلاس جەمقورلىق تاۋەكەلدەرىنىڭ سىرتقى جانە ىشكى تالداۋلارىن جۇرگىزۋ, سونداي-اق بىرلەسكەن جوبالاردى, اكتسيالاردى, سەمينارلار مەن كەڭەستەردى وتكىزۋ ارقىلى جۇزەگە اسىرىلاتىن بولادى.
«2017 جىلمەن سالىستىرعاندا, بيىل جاعىمسىز فاكتىلەردىڭ تومەندەۋ ءۇردىسى بار. ماسەلەن, 2017 جىلى مينيسترلىكتىڭ قوعامدىق دەنساۋلىق ساقتاۋ جانە فارماتسيا كوميتەتتەرىنىڭ مەملەكەتتىك قىزمەتشىلەرىنە ادەپ قاعيدالارىن بۇزعانى ءۇشىن 18 جانە مەملەكەتتىك قىزمەتتىڭ بەدەلىنە نۇقسان كەلتىرگەنى ءۇشىن 21 تارتىپتىك جازا قولدانىلدى. ال بيىلعى 7 ايدا ادەپ قاعيدالارىن بۇزعانى ءۇشىن 4 جانە مەملەكەتتىك قىزمەتتىڭ بەدەلىنە تەرىس اسەر ەتكەنى ءۇشىن 1 تارتىپتىك جازا بەلگىلەندى», دەپ اتاپ ءوتتى دەنساۋلىق ساقتاۋ ءمينيسترى ەلجان ءبىرتانوۆ.
ال ءوز كەزەگىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ بۇگىنگى تاڭدا ادامي كاپيتالدىڭ ماڭىزدى فاكتورى ۇزدىك دەنساۋلىق ساقتاۋ ءىسى جانە دەنى ساۋ ۇلت بولىپ وتىرعانىنا توقتالدى. سونىمەن قاتار مەموراندۋمعا قول قويۋدىڭ ەرەكشە وزەكتىلىگى مەن قاجەتتىلىگى جۇرگىزىلىپ جاتقان الەۋمەتتىك مەديتسينالىق ساقتاندىرۋدى ەنگىزۋ جونىندەگى رەفورماعا, دارىلىك زاتتاردى ساتۋ كەزىندە ءبولۋ جانە باعالىق رەتتەۋ سالاسىنداعى رەفورماعا دا بايلانىستى ەكەندىگىن تىلگە تيەك ەتتى. مەموراندۋمعا سايكەس, دەنساۋلىق ساقتاۋ ۇيىمدارىنداعى «تۇرمىستىق سىبايلاس جەمقورلىققا» ىقپال ەتەتىن سەبەپتەر مەن جاعدايلاردى جويۋ شارالارى ىسكە اسىرىلماق.
دينارا بىتىك,
«ەگەمەن قازاقستان»
