2010 جىلى ەلباسى - قازاقستان رەسپۋبليكاسىنىڭ تۇنعىش پرەزيدەنتى نۇرسۇلتان نازارباەۆتىڭ باستاماسىمەن قۇرىلعان تۇركى اكادەمياسى وسى جىلى ءوزىنىڭ 8 جىلدىق مەرەيتويىن وتكىزدى.
«قىسقا مەرزىم ىشىندە اكادەميا ۇلكەن جۇمىس وتكىزىپ, تۇركىتىلدەس مەملەكەتتەر ىنتىماقتاستىعى كەڭەسىنىڭ (تۇركى كەڭەسى) مۇشە-مەملەكەتتەرى – ازەربايجان, قازاقستان, قىرعىزستان جانە تۇركيا اراسىندا مادەني-تاريحي جانە عىلىمي-زەرتتەۋ ىنتىماقتاستىعىن دامىتۋعا قوماقتى ۇلەس قوستى. اكادەميا قازىرگى كۇنى ينتەللەكتۋالدى ۇيىمعا اينالدى», - دەدى ءسىم باسشىسى.
ق.ءابدىراحمانوۆ عىلىمي ۇيىمنىڭ قابىرعاسىندا ازىرلەنگەن تۇركى ينتەگراتسياسىنىڭ تۇجىرىمداماسى تۇركى كەڭەسىنىڭ جوسپارلانعان 6-شى سامميتىندە قابىلداناتىن ماڭىزدى قۇجاتتاردىڭ ءبىرى بولاتىندىعىن ەرەكشە اتاپ ءوتتى. تۇركى كەڭەسىنە مۇشە تاراپتارمەن تۇركى اكادەمياسىنىڭ ينستيتۋتسيالاندىرۋ ءراسىمىن اياقتاۋ بويىنشا جانە تۇركى مادەني-گۋمانيتارلىق ىنتىماقتاستىقتى جاڭا دەڭگەيگە شىعارۋ بويىنشا ءتيىستى جۇمىس جۇرگىزىلۋدە.
تۇركى اكادەمياسىنىڭ پرەزيدەنتى دارحان قىدىرالى حالىقارالىق دەڭگەيدەگى عىلىمي ۇيىمنىڭ قالىپتاسۋىنا قولعابىس كورسەتىپ كەلە جاتقان مەملەكەت باسشىسى ن. نازارباەۆقا جانە سىرتقى ىستەر مينيسترلىگىنە العىسىن بىلدىرە وتىرىپ, تۇركى مەملەكەتتەردىڭ اراسىنداعى ىنتىماقتاستىقتى ىلگەرىلەتۋ جولىندا اكادەميانىڭ ۇجىمى بار كۇشىن سالاتىندىعىنا ءوزىنىڭ تەرەڭ سەندىرۋلەرىن ءبىلدىردى.
«اكادەميا تۇركى الەمىنىڭ مۇراسىن زەرتتەۋ بويىنشا ۇلكەن عىلىمي-زەرتتەۋ جۇمىس وتكىزۋدە. ءبىز «ورتاق تۇركى تاريحى» وقۋلىعىن ازىرلەۋ بويىنشا جۇمىستى ءبىتىرىپ, XV عاسىرعا دەيىنگى «ورتاق تۇركى ادەبيەتى» مەن «ورتاق تۇركى گەوگرافياسى» وقۋلىقتارىنىڭ جوبالارىن دايىنداۋ جۇمىستارىن جالعاستىرۋدامىز. سونىمەن قاتار, اكادەميانىڭ قىزمەتكەرلەرى «اتالار ميراسى» جانە «تۇركبارومەتر» اتتى ەكى جوبانى دايىنداۋدا», - دەدى د.قىدىرالى.
اكادەميادا تۇركى الەمىنىڭ ەكسپوناتتارى ورنالاسقان مۇراجايى جانە تۇركولوگيا مەن ونىڭ مادەني مۇراسىنا ارنالعان 50 مىڭنان استام كىتاپ جينالعان كىتاپحانا قورى بار.
ق.ءابدىراحمانوۆ اكادەميانىڭ قىزمەتكەرلەرىن عىلىمي-زەرتتەۋ سالاداعى حالىقارالىق باستامالاردى ىلگەرىلەتۋ جانە تۇركى ىنتىماقتاستىقتى دامىتۋ بويىنشا قوسقان ۇلەستەرى ءۇشىن قۇرمەت گراموتالارىمەن ماراپاتتاپ, سونىمەن بىرگە تۇركى اكادەمياسى قورىنا مەملەكەت باسشىسىنىڭ جانە سىرتقى ىستەر مينيسترلىگىنىڭ سىرتقى ساياسي قىزمەتى تۋرالى كىتاپتاردى سىيعا تارتتى.
