رەسپۋبليكامىزدىڭ باتىسىنداعى ۇلكەن شاھاردا تۇرعىندار سانى دا جارتى ميلليوندىق مەجەدەن اسىپ وتىر. ايتسە دە اسەم قالانىڭ سيقىن كەتىرىپ جۇرگەن ءبىر جايت بار. اقتوبە كولىك-لوگيستيكا قىزمەتى وڭ جولعا قويىلعان ءوڭىردىڭ ءبىرى بولعاندىقتان, مۇنداعى قوزعالىس كوپ ورىنداردىڭ ءبىرى – تەمىر جول ۆوكزالى. بۇل جەردەن پويىزدار كۇن سايىن ەلىمىزدىڭ ءار قيىرىنا جانە رەسەي مەن ورتالىق ازيا رەسپۋبليكالارىنا قاراي ەرسىلى-قارسىلى ءوتىپ جاتادى.
سول پويىزداردان اگلومەراتسيا ورتالىعى ءارى رەسپۋبليكامىزداعى ءتورتىنشى مەگوپوليس اتانۋعا لايىقتى قالا اقتوبە ۆوكزالىنا تۇسەتىندەر دە جەتكىلىكتى. بۇعان قوسا اقتوبە قالاسىندا رەسپۋبليكانىڭ جانە حالىقارالىق دەڭگەيدە وتەتىن ءارتۇرلى مارتەبەلى جيىندارعا كەلەتىندەر مەن قالا قوناقتارى قانشاما؟ ولاردىڭ پەرروننان جانە اقتوبە تەمىر جول ۆوكزالى عيماراتىنىڭ الدىنان ەڭ الدىمەن كەزدەستىرەتىنى كىمدەر دەسەڭىزشى؟ اشىعىن ايتقاندا, ماسكۇنەمدەر مەن قاڭعىباستار.
بەت-اۋىزدارى كۇس-كۇس بولىپ جارىلىپ, ازىپ-توزىپ كەتكەن الگىلەر ءارلى-بەرلى وتكەن جولاۋشىلارعا الايا قاراعاندا, جانىڭىزدى قويارعا جەر تاپاي قالاسىز. ولاردىڭ كەز كەلگەن ۋاقىتتا دومالاي كەتىپ, قور ەتە قالاتىن مەكەندەرى دە پويىزدان تۇسكەن جولاۋشىلاردىڭ ۆوكزال الاڭىنا قاراي وتەتىن تەمىر قاقپانىڭ تۇسى. كۇندىز-ءتۇنى اقتوبە تەمىر جول ۆوكزالى ماڭايىن تورۋىلداپ جۇرەتىن ماسكۇنەمدەر مەن قاڭعىباستار ءبىر-بىرىمەن شەكىسىپ, بالاعاتتاسىپ, جۇدىرىقتاسىپ جاتادى. ايقاي-شۋ مەن يتجىعىس توبەلەس تە وسى جەردە. بۇعان دا جولاۋشىلاردىڭ كوزدەرى ۇيرەنىپ كەتكەن سەكىلدى. ونىڭ ءبارىن ادەتتەگى, قالىپتى كورىنىستەي كورەتىنى بايقالادى.
سونداي-اق ۆوكزالدىڭ قالاعا كىرەبەرىس تۇسىندا ىركەس-تىركەس, ارقايسىسى قۇرقىلتايدىڭ ۇياسىنداي ءدامحانالار ورنالاسقان. بۇل جەردە دە ءتارتىپ جوق. ماسكۇنەمدەر مەن قاڭعىباستار جولىڭىزدى كەس-كەستەپ, الاقان جايىپ الدىڭىزدان شىعادى. ءبىز وسى ارادا ءبىر جولاۋشىنىڭ ءىشىپ وتىرعان تاماعىن الا قاشقان قاڭعىباس قازاق ايەلىن كەزدەستىرىپ, جاعامىزدى ۇستادىق.
ءبىر تاڭعالارلىعى, اقتوبە تەمىر جول ۆوكزالىندا ورىن العان وسىنداي كەلەڭسىزدىكتەردى رەتتەۋگە ەشكىم كوڭىل اۋدارماي كەلەدى. اباي اتامىز ايتقانداي «باياعى جارتاس, سول جارتاس» كۇيىندە قالىپ وتىر. مۇنداي ساتتە جان-جاعىڭىزعا قاراپ ىشكى ىستەر ورگانىنىڭ وكىلدەرىن ىزدەيدى ەكەنسىز. ال پوليتسيا قىزمەتكەرلەرى ۆوكزال ماڭىنان كورىنە بەرمەيدى. نەگە؟ ويتكەنى قاڭعىباستارمەن الىسىپ-ج ۇلىسىپ جاتۋ ولار ءۇشىن دە ءتيىمسىز بولسا كەرەك. اقتوبە تەمىر جول ۆوكزالى ماڭىنان ءوزىمىز كورىپ جۇرگەن بەلگىلى تۇراعى جوقتاردىڭ دەنى قول-اياقتارى بالعاداي, تەپسە تەمىر ۇزەتىن جاندار. دەنى – قانداستارىمىز. تاعى دا ۇلى ابايدىڭ سوزىمەن ايتقاندا, «ادام بالاسىن ازدىراتىن جۇمىسى جوقتىق» ەكەنىن العا تارتقىمىز كەلەدى. ولاردىڭ بەتىن كەرى قايتارۋدىڭ ءبىر جولى «ەكى قولعا ءبىر كۇرەك» تاۋىپ بەرۋ ەمەس پە ەكەن؟ بۇل ماسەلە ەڭبەككە ورنالاستىرۋ جونىندەگى جەرگىلىكتى قۇرىلىم وكىلدەرىن ويلاندىرۋعا ءتيىس.
تەمىر قۇسايىن,
«ەگەمەن قازاقستان»
