مەملەكەت باسشىسىنىڭ اتىنا ەل, ۇكىمەت باسشىلارىنان, حالىقارالىق ۇيىمداردىڭ وكىلدەرىنەن قازاقستان رەسپۋبليكاسى تاۋەلسىزدىگىنىڭ 20 جىلدىعىنا بايلانىستى قۇتتىقتاۋلار تولاسسىز كەلىپ تۇسۋدە, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
قىرعىز رەسپۋبليكاسىنىڭ پرەزيدەنتى المازبەك اتامباەۆ «قازاقستان وتكەن جىلدار ىشىندە ءوز پرەزيدەنتىنىڭ دانا باسشىلىعىمەن ەكونوميكالىق جانە قوعامدىق-ساياسي جاڭارۋلار, ءوزىنىڭ حالىقارالىق بەدەلىن نىعايتۋ ىسىندە ايتارلىقتاي تابىستارعا جەتتى» دەپ اتاپ وتكەن.
يران يسلام رەسپۋبليكاسىنىڭ پرەزيدەنتى ماحمۇد احمادينەجاد قۇتتىقتاۋ حاتىندا قازاقستان ءوزىنىڭ دامۋى مەن گۇلدەنۋى جولىندا الداعى ۋاقىتتا دا ۇلكەن تابىستارعا جەتەتىنىنە سەنىم بىلدىرگەن.
ءوزىنىڭ قۇتتىقتاۋ حاتىندا كورەيا رەسپۋبليكاسىنىڭ پرەزيدەنتى لي ميون-باك: «مەن قازاقستان رەسپۋبليكاسى مەن كورەيا رەسپۋبليكاسىنىڭ ورتاق مۇددەسىنە, ءوزارا قۇرمەت پەن حالىقتار دوستىعىنا نەگىزدەلگەن ىنتىماقتاستىق ودان ءارى نىعايا بەرەتىنىنە سەنەمىن», دەپ اتاپ وتكەن.
سونىمەن قاتار, مەملەكەت باسشىسىنىڭ اتىنا كەلگەن قۇتتىقتاۋ جەدەلحاتتارىن ۇلىبريتانيا كورولەۆاسى ءىى ەليزاۆەتا, موڭعوليا پرەزيدەنتى تساحياگين ەلبەدورج, گرۋزيا پرەزيدەنتى ميحايل سااكاشۆيلي, گرەكيا رەسپۋبليكاسىنىڭ پرەزيدەنتى كارولوس پاپۋلياس, بەلگيا كورولى البەرت ءىى, نيدەرلاندى كورولەۆاسى بەاتريكس, يندونەزيا رەسپۋبليكاسىنىڭ پرەزيدەنتى سۋسيلو بامبانگ يۋدويونو جولداعان.
قازاقستان رەسپۋبليكاسى تاۋەلسىزدىگىنىڭ 20 جىلدىعىمەن پرەزيدەنت نۇرسۇلتان نازارباەۆتى حالىقارالىق ۇيىمداردىڭ وكىلدەرى قۇتتىقتادى.
شانحاي ىنتىماقتاستىق ۇيىمىنىڭ باس حاتشىسى مۇراتبەك يماناليەۆتىڭ جەدەلحاتىندا بىلاي دەلىنگەن: «قازاقستان تاۋەلسىزدىك جىلدارىندا پرەزيدەنت نۇرسۇلتان نازارباەۆتىڭ باسشىلىعىمەن ۇلتتىق مەملەكەتتىلىكتى قالىپتاستىرۋدا جانە نىعايتۋدا زور تابىستارعا, سونداي-اق ەلدىڭ حالىقارالىق ارەنادا بەدەلىنىڭ ۇدەمەلى ارتۋىنا قول جەتكىزدى. شانحاي ىنتىماقتاستىق ۇيىمىنىڭ نەگىزىن قالاعان ەلدىڭ ءبىرى بولا وتىرىپ, قازاقستان شىۇ اياسىندا ورنىققان تاتۋ كورشىلەستىك, ءوزارا تۇسىنىستىك جانە سىندارلى ءارىپتەستىك قاتىناستاردى دامىتۋعا ەلەۋلى ۇلەس قوستى».
ەۋرازەق باس حاتشىسى تاير مانسۇروۆ: «قازىرگى زامانعى قازاقستاندى قۇرۋشى, بۇكىلحالىقتىق تانىمال ۇلت كوشباسشىسى رەتىندە ءسىز ەلدىڭ ۇدەمەلى الەۋمەتتىك-ەكونوميكالىق دامۋىنا ارنالعان مەملەكەتتىك ساياساتتى دايەكتى تۇردە جانە سەنىممەن جۇزەگە اسىرىپ كەلەسىز. قازاقستان ءوز تاۋەلسىزدىگىنىڭ 20 جىلدىعىن ءبىزدىڭ ەلىمىزدى جالپىالەمدىك ۇدەرىستەرگە بەلسەنە قاتىسقان, دەموكراتيالىق مەملەكەتتەر قاتارىنا شىعارعان وراسان جەتىستىكتەرىمەن قارسى الدى. ەۋرازيالىق وداقتاس مەملەكەتتەردى قالىپتاستىرۋداعى كوپشىلىك مويىنداعان سەرپىندى يدەياڭىز ءسىزدىڭ قاجىرلى قىزمەتىڭىزدىڭ ارقاسىندا ەۋرازيالىق ەكونوميكالىق قوعامداستىقتىڭ, كەدەن وداعى مەن ءبىرتۇتاس ەكونوميكالىق كەڭىستىكتىڭ قۇرىلۋىن ىسكە اسىردى», دەپ اتاپ وتكەن.
مەملەكەت باسشىسى تاۋەلسىزدىك كۇنىمەن قۇتتىقتاۋلاردى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى مارگارەت چەننەن, تمد اتقارۋشى كوميتەتىنىڭ توراعاسى سەرگەي لەبەدەۆتەن, تمد پارلامەنتارالىق اسسامبلەياسى كەڭەسى باس حاتشىسىنىڭ ورىنباسارى ميحايل كروتوۆتان, تمد پارلامەنتارالىق اسسامبلەياسى كەڭەسى باس حاتشىسىنىڭ ورىنباسارى حالەل باكەنوۆتەن الدى.
* * *
پرەزيدەنت نۇرسۇلتان نازارباەۆتى ەل ءتاۋەلسىزدىگىنىڭ 20 جىلدىعىمەن قازاقستاننىڭ ىسكەر توپ وكىلدەرى قۇتتىقتايدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. «Arcelor Mittal» كومپانياسى ديرەكتورلار كەڭەسىنىڭ توراعاسى لاكشمي ميتتالدىڭ حاتىندا بىلاي دەلىنگەن: «بۇل – سوڭعى 20 جىل بويى ءوزىن تاۋەلسىز مەملەكەت رەتىندە جاڭعىرتۋ جانە نىعايتۋدا ۇلكەن جولدى ءجۇرىپ وتكەن ۇلت ءۇشىن ەلەۋلى كەزەڭ. قازاقستاننىڭ تابىسى ءسىزدىڭ اينالاڭىزعا توپتاسقان حالىقتىڭ ۇجىمدىق كۇش-جىگەرىنىڭ وراسان ناتيجەسى بولىپ تابىلادى. سىزگە جانە قازاقستان رەسپۋبليكاسىنىڭ حالقىنا بەيبىتشىلىك, باقىت جانە گۇلدەنۋ تىلەيمىز». ال «ENRC» كومپانياسىنىڭ اكتسيونەرلەرى الەكساندر ماشكەۆيچ, پاتوح شوديەۆ جانە اليدجان يبراگيموۆتىڭ قۇتتىقتاۋ جەدەلحاتىندا «بۇگىنگى قازاقستان – وشپەس رۋحاني قۇندىلىقتارىن قايتا وركەندەتىپ, بابالار ءداستۇرىن كەلەشەكپەن بەرىك ۇيلەستىرە وتىرىپ, العا ۇمتىلعان, ءوزىنىڭ باي الەۋەتىن ىسكە اسىرۋ جولىندا قارقىندى دامىپ كەلە جاتقان مەملەكەت. وسىنىڭ ءبارى كوپ جاعدايدا پرەزيدەنت نۇرسۇلتان نازارباەۆتىڭ ماقساتكەرلىك, جاۋاپكەرشىلىك, دانا جانە كورەگەن قاسيەتتەرىنىڭ ارقاسىندا مۇمكىن بولدى», دەپ اتاپ وتىلگەن. «قازاتومونەركاسىپ» ۇاك» اق باسقارما توراعاسى ۆلاديمير شكولنيك قۇتتىقتاۋ حاتىندا قازاقستان جاڭا ءوندىرىس ورىندارىن قۇرىپ, يننوۆاتسيالىق-تەحنيكالىق جانە تەحنولوگيالىق شەشىمدەردى باسشىلىققا الا وتىرىپ, مەملەكەتتىڭ گۇلدەنۋى مەن ءاربىر قازاقستاندىقتىڭ يگىلىگى ءۇشىن ودان ءارى قارقىندى دامي بەرەتىنىنە سەنىم بىلدىرگەن. سونىمەن قاتار, مەملەكەت باسشىسىن «شەۆرون» كورپوراتسياسى ەۋرازيالىق بولىمشەسىنىڭ باسقارۋشى ديرەكتورى سكوتت دەۆيس, «Kazzinc» جشس باسشىلارى نيكولا پوپوۆيچ پەن گەننادي زيلببەربەرگ, «OKAN» كومپانياسىنىڭ باسقارما توراعاسى بەكير وكان قۇتتىقتاعان.* * *
مەملەكەت باسشىسىنىڭ اتىنا زيالى قاۋىم وكىلدەرىنەن, مەكەمە باسشىلارىنان, كاسىپكەرلەردەن جانە قاراپايىم ازاماتتاردان ەل تاۋەلسىزدىگىنىڭ 20 جىلدىعىنا بايلانىستى قۇتتىقتاۋلار مەن جەدەلحاتتار لەگى تولاسسىز كەلىپ تۇسۋدە, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. حات يەلەرى ەلىمىزدىڭ 20 جىلدا جەتكەن جەتىستىكتەرىنە, قازاقستان مەملەكەتتىلىگىنىڭ نەگىزىن قالاپ, ەكونوميكاسى تۇراقتى, حالقى ىنتىماقتى, الەمگە تانىمال, ىرگەلى ەل قۇرىپ, وركەندەۋدىڭ قازاقستاندىق جولىنا باستاعان ەلباسى ن.ءا.نازارباەۆتىڭ ەڭبەگىنە كەڭىنەن توقتالىپ, سارالاپ كورسەتكەن. جازۋشى ا.مەكەباەۆ ءوز قۇتتىقتاۋىندا: «قۇرمەتتى نۇرسۇلتان ءابىش ۇلى, ءسىز قازاق ەلى ءۇشىن تاۋەلسىزدىك سيمۆولىنا اينالعان ۇلى تۇلعاسىز. سونىمەن قاتار, ءتۇرلى زامانداردا قيلى قاسىرەتتى باستان كوپ كەشكەن ۇلتتىڭ اراسىنان دارالانىپ شىعىپ, ەلىن تاۋەلسىزدىككە جەتكىزگەن دارا تۇلعاسىز. ءسىز ەرەكشە كورەگەندىلىكپەن بىرنەشە عاسىرعا سوزىلۋى مۇمكىن كۇردەلى جۇمىستاردى 20 جىل ىشىندە اتقارا الدىڭىز. حالقىڭىزدى مۇراتىنا جەتكىزدىڭىز», دەپ جازادى. سونداي-اق, مەملەكەت باسشىسىن تاۋەلسىزدىكتىڭ 20 جىلدىق مەرەيتويىمەن قۇتتىقتاپ, ءوز ۇجىمدارى اتىنان جۇرەكجاردى تىلەكتەرىن ءبىلدىرىپ, قۇتتىقتاۋلار جولداعاندار قاتارىندا «قازمۇنايگاز» ۇلتتىق كومپانياسى» اق باسقارما توراعاسى ب.اقشولاقوۆ, كوكشەتاۋلىق كاسىپكەر ە.قۇرمانعالي ۇلى, ت.ب. بار. حات يەلەرى ءوز قۇتتىقتاۋلارىندا تۇڭعىش پرەزيدەنتىمىزدىڭ ەڭبەگىنىڭ ناتيجەسىندە ەلىمىزدىڭ 20 جىل ىشىندە ەكونوميكاسى وركەندەگەن, ساياسي تۇراقتىلىق پەن قوعامدىق كەلىسىمدى بەرىك ورنىقتىرعان ابىرويلى مەملەكەتكە اينالعانىن ايتا كەلە, ۇلت كوشباسشىسىنىڭ تاۋەلسىزدىكتى ورنىقتىرۋ جولىنداعى قىزمەتىنە زور باعا بەرگەن. وسىنداي مازمۇنداعى حاتتار اقتوبە وبلىسى ىرعىز اۋىلىنىڭ تۇرعىنى, زەينەتكەر ج.دەربىسوۆ, جامبىل وبلىسى بولتىرىك شەشەن اۋىلىنىڭ تۇرعىنى م.راحمەتۋللا, قازالى قالاسىنىڭ تۇرعىنى ز.بايماحانوۆا, سەمەي قالاسىنىڭ تۇرعىنى ە.ورازاليننەن كەلدى.
