العا قويعان ماقسات-مۇرات وراسان زور. ەڭ باستىسى, بۇگىنگى جاستارعا مەملەكەتىمىز بەن قوعامىمىزدا بولىپ جاتقان وڭ وزگەرىستەردىڭ قايناعان ورتاسىنان تابىلىپ, بولاشاق يەلەرى وزدەرى ەكەندىگىن ۇعىندىرۋ قاجەت. العا سۇيرەيتىن الاپات كۇش تە سولار.
جيىنعا قاتىسقان قوعامدىق دامۋ ءمينيسترى دارحان قالەتاەۆ پەن اقپارات جانە كوممۋنيكاتسيالار ۆيتسە-ءمينيسترى نۇرگۇل ماۋبەرلينوۆانىڭ اشىلۋ سالتاناتىنداعى لەبىزىنەن وسىنداي اسقارالى وي ءورىلدى.
جانە الداعى ۋاقىتتا ءدال بۇگىنگىدەي جاستار جيىندارىن وتكىزۋدى, ءسويتىپ, جاستار اراسىنداعى تولايىم تابىستاردى ناسيحاتتاپ, كىل جۇيرىكتى وزگە زامانداستارىنا ۇلگى ەتۋ, ولاردىڭ اقىل-كەڭەستەرىن, تاجىريبەلەرىن تاراتۋدى داستۇرگە اينالدىرۋ قاجەت دەگەن ورىندى ۇسىنىسقا اقمولا وبلىسىنىڭ اكىمى مالىك مىرزالين قولداۋ كورسەتىپ, ءار جىل سايىن زەرەندى باۋرايى جاستار زەردەسىنىڭ ۇستاحاناسىنا اينالاتىنىن اتاپ ءوتتى.
«كازكونتەنت» اكتسيونەرلىك قوعامىنىڭ توراعاسى ەۆگەني كوچەتوۆ تا جاسامپاز بولاشاقتىڭ يەلەرى قانداي بولۋ كەرەكتىگىن قولمەن قويعانداي ەتىپ تاپتىشتەپ ايتىپ بەردى.
جىگەرلەرى جالىن اتقان جاستاردىڭ بوي تۇزەيتىن, وي تۇزەيتىن تەمىرقازىق-نىسانالارى بولۋى شارت. ءبىر جاقسى جەرى, بۇگىنگى جيىنعا ونداي جاستار دا كوپتەپ قاتىسىپ وتىر ەكەن. بىرنەشە جوبالاردىڭ, جاڭاشىل يدەيالار اۆتورلارىنىڭ ەسىمدەرى اتالىپ, قول جەتكىزگەن تابىستارى ونەگە وزەگىنە اينالدى. الداعى كۇندەرى ولار جيىنعا قاتىسۋشى جاستارمەن ەگجەي-تەگجەيلى پىكىر الماسىپ, باعىت-باعدار بەرەدى.
ال, ۇزدىك جوبالارعا جيىنعا ۇيىتقى بولىپ وتىرعان مينيسترلىكتەر تاراپىنان قولداۋ كورسەتىلەدى. بۇگىنگى باس قوسۋدىڭ ۇتىمدى تۇسى دا وسى. اقىل-وي, قابىلەت-قارىمدارىنىڭ ارقاسىندا قازىردىڭ وزىندە ءبىرشاما تابىستارعا قول جەتكىزگەن دارىندى جاستار وزدەرىنىڭ قاتارلارىن تولىقتىرا تۇسپەك. اينالىپ كەلگەندە بۇل – ماڭگىلىك ەلدىڭ كوكسەگەن مۇراتىن ءماندى ەتەتىن ۇمتىلىس.
مەملەكەتىمىز بەن قوعامىمىزدىڭ كوپتەگەن سالالارىندا جاڭعىرۋ ءجۇرىپ جاتىر. جاس جىگەر مول بىلىممەن استاسقاندا عانا باسەكەگە قابىلەتتى بولاتىنىمىز انىق. بۇگىنگى كۇنى ءبىز دامىعان ەلدەرمەن بوي تالاستىرۋ ءۇشىن ءبىلىمدى ۇلت قاتارىنان تابىلۋى كەرەك ەكەنىن تۇسىندىك. مىنە, وسى ارادا ينتەللەكتۋالدىق قابىلەتى زور, بەلسەندى دە جىگەرلى جاستارعا سەنىم ارتىلادى.
جاستاردىڭ جازعى ءبىلىم لاگەرىندەگى جۇمىس ۇستىمىزدەگى جىلدىڭ تامىز ايىنىڭ 12-ءى مەن 26-ى ارالىعىندا وتكىزىلەدى دەپ جوسپارلانۋدا. جۇمىس ءۇش تاقىرىپ بويىنشا ۇيىمداستىرىلماق. ايتالىق, ءبىرىنشى اۋىسىم بىرنەشە تاقىرىپتى قامتيتىن بولادى. ونىڭ ىشىندە ەڭ باستى تاقىرىپ «Digital-ۇرپاق» بولسا, ەكىنشى اۋىسىم «جاڭعىرۋ ترەندتەرى», ءۇشىنشى اۋىسىم «بيزنەس سيقىرى» دەپ اتالادى.
لاگەردىڭ قاتىسۋشىلارى ەلىمىزدىڭ ءار قيىرىنداعى جاستار ۇيىمدارىنىڭ كوشباسشىلارىمەن جانە ءىسىن دوڭگەلەتىپ وتىرعان جاس تولقىن اراسىنان شىققان كاسىپكەرلەرمەن كەزدەسەدى. ونىڭ ۇستىنە «قازاقستاننىڭ 100 جاڭا ەسىمى» جوباسىنىڭ قاتىسۋشىلارى دا بۇل جۇمىستان تىس قالمايدى. ءار اۋىسىمدا ءجۇز ادامنان قامتىلماق.
الداعى مىندەت – جاستار ساياساتىن جەتىلدىرىپ, جاڭا تەحنولوگيالاردى وقىپ-ۇيرەنۋ, تاجىريبە الماسۋ بولىپ وتىر. وسى ورايداعى ءتيىمدى تەتىكتەردى جاستاردىڭ الەۋەتىن دامىتۋعا جۇمىلدىرۋ كوزدەلۋدە. سەمينارلار مەن ترەنينگتەر وتكىزىلىپ, تاقىرىپتىق جوبالار ازىرلەنىپ, يدەيالاردى ىرىكتەۋ ۇيىمداستىرىلماق.
بايقال ءبايادىل,
«ەگەمەن قازاقستان»
اقمولا وبلىسى
زەرەندى اۋدانى
