جالعاس قۇماروۆ - كوپ جىل كەدەن سالاسىندا قىزمەت اتقارعان, قارعالى اۋدانىنىڭ بادامشا ەلدى مەكەنىنىڭ تۇرعىنى. ول كوميسسياعا ۇسىنعان بيزنەس-جوباسىندا كورسەتكەندەي «اقتوبە-ورسك» تاس جولىنىڭ بويىندا ورنالاسقان «الىمبەت» وتكىزۋ پۋنكتى ماڭىنا گاز قۇيۋ ستانتسياسىن سالۋدى جوسپارلايدى. ەسەبىنشە, بۇل جولمەن كولىك كوپ وتەتىن بولعاندىقتان, بيزنەس تابىستى بولۋى ءتيىس.
«اۆتوكولىكتەردىڭ سانىنىڭ كوبەيۋىنە بايلانىستى بۇل سالاعا بايلانىستى بيزنەس ءتۇرىنىڭ بارلىعى پايدا اكەلەدى دەپ ەسەپتەيمىن. اسىرەسە, قازىر بەنزين باعاسىنىڭ قىمباتتاۋىنا بايلانىستى گاز ساۋداسى قىزىپ تۇر. جەرگىلىكتى بيلىك تە جانار-جاعار مايدى ۇنەمدەۋ ماقساتىندا كولىكتەردىڭ گازبەن جۇرۋگە كوشۋىن قۇپتاپ وتىر. سوندىقتان بۇل جوبامدى ىسكە اسىرۋدا قيىندىق بولمايدى دەپ ويلايمىن»,-دەيدى «باستاۋ» جوباسىنىڭ تىڭداۋشىسى جالعاس قۇماروۆ.
كوميسسيا مۇشەلەرى وعان گاز ستانتسياسىنىڭ قۇرىلىسىنا قاجەتتى جەر ۋچاسكەسىن الۋ ماسەلەسى جونىندە سۇراق قويدى. بولاشاق كاسىپكەر جەر الۋعا ءوتىنىشتى قارعالى اۋداندىق جەر بولىمىنە جانە قازاۆتودور رمك ءوتىنىش بەرگەنىن, بۇگىنگى كۇنى قارالىپ جاتقانىن ايتتى.
«باستاۋ» جوباسىنىڭ تاعى ءبىر قاتىسۋشىسى, بايعانين اۋدانىنىڭ تۇرعىنى جاساربەك قۇرماشەۆ قاراۋىلكەلدى اۋىلىندا توكار تسەحىن اشپاق. ايتۋىنشا, اۋىل تۇرعىندارى كاسىبي توكار قىزمەتىنە ءزارۋ. جوبا ماقۇلدانعان جاعدايدا اۋىلشارۋاشىلىقتى قولداۋ قورىنان نەسيەگە 1 000 000 تەڭگە كولەمىندە قارجى الماق. بۇل سوما تسەحقا قاجەتتى بارلىق قۇرالداردى الۋعا جەتپەيدى. مۇنان كوپ قاراجات الۋعا جاساربەكتىڭ كەپىلزاتقا قوياتىن قۇندى مۇلكى از بولىپ تۇر. كاسىپكەر باستاپقى ۋاقىتتا كورسەتىلگەن سوماعا بۇرىن قولدانىستا بولعان ستانوكتاردى ساتىپ الىپ, كاسىپ باستاماقشى. بولاشاقتا بيزنەسى ءجۇرىپ جاتسا, بۇدان ۇلكەن سوماعا تاپسىرىس بەرمەك.
اۋىل كاسىپكەرلەرى ءۇي قۇستارىن ءوسىرۋ ىسىنە دە قىزىعۋشىلىق تانىتىپ وتىر. نارىقتا ۇيرەك, قاز, كۇركەتاۋىق ەتىنە سۇرانىس جوعارى كورىنەدى. دەنساۋلىققا پايدالى بولعاندىقتان مۇنداي قۇس ەتتەرى ەلىمىزدە كوپتەپ قولدانىلا باستادى. دۇرىس كۇتىم كورسەتىپ, وسىرە العان جاعدايدا قۇس ەتىن الىس-جاقىن شەتەلگە ساتۋعا بولادى. مۇنداي جوبالاردى قارعالى جانە حرومتاۋ اۋدانىنىڭ شارۋالارى جۇزەگە اسىرماق.
ءار اۋداننان كەلگەن جوبا قاتىسۋشىلارى مال شارۋاشىلىعىن دامىتىپ, ازىق-ت ۇلىك دۇكەندەرىن, اسەمدىك سالونىن, تىگىن تسەحىن, شاشتاراز اشۋعا بايلانىستى بيزنەس-جوسپارلارىن ۇسىندى. ولاردىڭ اراسىندا جول بويىنداعى قىزمەت كورسەتۋ سالاسىن وركەندەتىپ, اسحانا, سۋشي, تاكسي قىزمەتىمەن اينالىسقىسى كەلەتىندەر بار ەكەن. كوميسسيا مۇشەلەرى ولاردىڭ وسى قىزمەتتەرمەن اينالىسۋعا ارنايى قۇجاتتارىنىڭ بار-جوعىن تەكسەرىپ, قارجىلىق ساۋاتتىلىعىن انىقتاۋعا ارنالعان ساۋالدار قويدى. بيزنەس-جوسپارىن قورعاۋعا كەلگەن اۋىل تۇرعىندارى «باستاۋ» جوباسىنا قاتىسىپ, كاسىپ اشۋدىڭ قىر-سىرىن ۇيرەنگەندەرىن ايتادى. «باستاۋلىقتار» جوبا بولماعاندا كاسىپكەرلىكتى دامىتۋعا ارنالعان مەملەكەتتىك قولداۋ شارالارى تۋرالى بىلمەگەن دە بولار ەدىك دەستى.
ايتىپ وتسەك, بيزنەس-جوسپارلارىن ءساتتى قورعاعان «باستاۋ» جوباسىنىڭ تۇلەكتەرىنە «اۋىلشارۋاشىلىقتى قولداۋ قورى» ارقىلى 54 ايدان كوپ ەمەس مەرزىمگە 6 % نەسيەلەۋ مۇمكىندىگى قاراستىرىلعان. سونىمەن قاتار, ولاردىڭ نەسيە سەرىكتەستىكتەرى جانە ەكىنشى دەڭگەيلى بانكتەر ارقىلى جەڭىلدەتىلگەن نەسيەگە قول جەتكىزۋگە مۇمكىندىكتەرى بار.
«باستاۋ» جوباسى «اتامەكەن» ۇلتتىق كاسىپكەرلەر پالاتاسىنىڭ باستاماسىمەن ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنىڭ ەكىنشى باعىتى اياسىندا جۇزەگە اسىرىلۋدا. 2018 جىلى بارلىعى 2 231 ادام وقىتىلىپ, ولاردىڭ ەڭ كەمى 446–سى جەڭىلدەتىلگەن نەسيەگە يە بولادى دەپ كۇتىلۋدە.
تەمىر قۇسايىن,
«ەگەمەن قازاقستان»
اقتوبە
