مەموراندۋمنىڭ ماقساتى قوعامدىق قاتىناستاردىڭ تۇراقتىلىعىن ساقتاۋ بويىنشا بىرلەسكەن جانە كەلىسىلگەن ءىس-قيمىلدار جاساۋ, قوعامداعى شيەلەنىستىڭ دەڭگەيىن تومەندەتۋ, قۇقىقتىق ساۋاتتىلىق پەن قۇقىقتىق سانانى ارتتىرۋ, ازاماتتاردىڭ جاسامپاز جۇمىسى ءۇشىن مەملەكەتتە مەدياتسيا مادەنيەتىن دامىتۋعا جاعداي جاساۋ بولىپ تابىلادى.
قۇجاتقا قول قويۋ بارىسىندا دارحان كالەتاەۆ قوعامداعى شيەلەنىستى تومەندەتۋدىڭ قولدانىستاعى تاسىلدەرىنىڭ ءبىرى رەتىندە قازاقستانداعى مەدياتسيانى دامىتۋدىڭ ماڭىزدىلىعىن اتاپ ءوتتى. ونىڭ ايتۋىنشا, اتالعان مەموراندۋمدى بەكىتۋ ماڭىزدى ءارى وزەكتى شارا بولىپ سانالادى.
«وزدەرىڭىز بىلەتىندەي, مينيسترلىكتىڭ جاڭا باعىتتارىنىڭ قاتارىندا مەدياتسيا ينستيتۋتىن دامىتۋ بار. وسى باعىتتا قوعامنىڭ ءوزىن-ءوزى رەتتەۋ قابىلەتىن ارتتىرۋ جونىندەگى جوبالاردى ەنگىزۋ, شيەلەنىس پەن داۋلاردى ءتيىمدى شەشۋگە قوعامدىق قۇرىلىمدار الەۋەتىن تارتۋ بويىنشا بەلسەندى جۇمىستار جۇرگىزىلۋدە», - دەدى قوعامدىق دامۋ ءمينيسترى.
د.كالەتاەۆ ازاماتتىق قوعام وكىلدەرىن جانە مەدياتورلاردىڭ قاتىسۋىمەن تۇرعىندار اراسىندا اقپاراتتىق-ءتۇسىندىرۋ جۇمىستارى جالعاساتىنىن ايتتى. سونىمەن قاتار, قر قوعامدىق دامۋ مينيسترلىگى جانىندا مەدياتسيا ينستيتۋتىن دامىتۋ ماسەلەلەرى بويىنشا كەڭەس قۇرۋ جوسپارلانۋدا.
مەموراندۋم شەڭبەرىندە تاراپتار ازاماتتىق قوعام ينستيتۋتتارىن تارتۋ ارقىلى تاتۋلاسۋ ۇردىستەرى تۋرالى زاڭنامانى جەتىلدىرۋ بويىنشا ىنتىماقتاستىقتى دامىتۋدى, تۇرعىندارعا شيەلەنىستەر مەن داۋلاردى رەتتەۋ بويىنشا قىزمەتتەر كەشەنىن كورسەتۋ ءۇشىن تاتۋلاسۋ ورتالىقتارىنىڭ جۇمىسىن ۇيىمداستىرۋدى, سونداي-اق مەدياتسيا ساپاسىن جاقسارتۋعا جاعداي جاساۋدى قولدايدى.
سونىمەن بىرگە مەموراندۋم قوعامدىق قاتىناستاردىڭ تۇراقتىلىعىن ساقتاۋ, قوعامداعى شيەلەنىس دەڭگەيىن تومەندەتۋ, قۇقىقتىق ساۋاتتىلىقتى ارتتىرۋ ماقساتىندا داۋلاردى سوتقا دەيىن شەشۋ مادەنيەتىن دامىتۋعا; مەدياتسيا جانە وزگە دە تاتۋلاسۋ ۇردىستەرىن ىلگەرىلەتۋدىڭ قۇرالدارى مەن مەحانيزمدەرىن دايىنداۋعا باعىتتالعان بىرلەسكەن جوبالارعا مەملەكەتتىك ورگانداردىڭ قاتىسۋىن قاراستىرادى.
