قور سالىمشىلارى ءۇشىن جارتىجىلدىق بويىنشا ەسەپ بەرگەن بجزق ماماندارى زەينەتاقى قىزمەتتەرىنىڭ سالىمشىلار ءۇشىن دە الۋشىلار ءۇشىن دە قولجەتىمدى ەكەندىگىن جەتكىزدى. سايت ارقىلى «جەكە كابينەت» جانە «ەلەكتروندىق قىزمەت كورسەتۋ» ءبولىمى ارقىلى كەلىسىمشارت جاساۋعا بولادى. ونى پايدالانۋ ءۇشىن سالىمشىلاردا ەلەكتروندى تسيفرلىق (ەتسق) كىلت بولسا جەتكىلىكتى.
بجزق ءتورايىمى ن.ناۋرىزباەۆا اعىمداعى مەرزىمدەگى كورسەتكىشتەرگە شولۋ جاساپ, زەينەتاقى جيناقتارىنىڭ جالپى سوماسى 8,4 تريلليون تەڭگەنى قۇراعاندىعىن ءارى جىل باسىنان بەرگى ارالىقتا 663,6 ملرد تەڭگەگە, ياعني 9 پايىزعا وسكەندىگىن مالىمدەدى.
جارتىجىلدىق قورىتىندىسىنا سايكەس قورعا 5,6 ميلليوننان استام سالىمشى زەينەتاقى جارنالارىن اۋدارعان. وسى مەرزىمدەگى تۇسىمدەردىڭ جالپى سوماسى 407,5 ملرد تەڭگەگە (كەرى قايتارىلعان جارنالاردى ەسەپكە الماعاندا) جەتتى. كورسەتكىش وتكەن جىلمەن سالىستىرعاندا (366,4 ملرد تەڭگە) 11 پايىزعا جوعارى. تۇسىمدەردىڭ نەگىزگى ۇلەسى مىندەتتى زەينەتاقى جارنالارىنا تيەسىلى.
سالىمشىلار مەن الۋشىلاردىڭ زەينەتاقى شوتتارىنا ەسەپتەلگەن تازا ينۆەستيتسيالىق تابىس سوماسى 356,4 ملرد تەڭگەنى قۇراپ وتىر. ياعني, جىل باسىنان بەرى تابىس 4,5 پايىزدى قۇراسا, بۇل كەزەڭدەگى ينفلياتسيا دەڭگەيى 2,6 پايىز بولعان. ال قوردىڭ ءبىر جىلى ىشىندەگى تابىسى 9,5 پايىزدى قۇراپ وتىر.
قور تاراپىنان ەكونوميكالىق بەلسەندى ازاماتتاردى جيناقتاۋشى زەينەتاقى جۇيەسىنە تارتۋ ءارى قورعا بىرنەشە جىلدار قاتارىنان جارنا اۋدارماعاندار سالىمشىلارمەن جۇمىستار قولعا الىنعان. دەرەكقوردا 2015-2017 جىلدار ارالىعىندا اشىلىپ, بىردە-ءبىر نەمەسە تۇراقتى جارنا تۇسپەگەن شوتتار انىقتالدى. ءتيىستى مەرزىم ىشىندە 218,4 مىڭنان استام سالىمشىمەن بايلانىس ورناتىلىپ, 29 مىڭعا جۋىق ازاماتقا كەڭەستەر بەرىلگەن. ال وسى ۋاقىتتا 50,65 مىڭ شوتقا جارنا اۋدارىلعان.
اعىمداعى جىلدىڭ مامىر ايىندا بزجق «Telegram» مەسسەندجەرىنە قوسىلدى. پايدالانۋشىلار جاڭا قىزمەتتىڭ كومەگىمەن قىسقاشا كوشىرمە الۋ, ەلەكتروندىق پوشتاسىنا جىبەرۋ, «جەكە كابينەتكە» كىرۋ ءپارولىن قالپىنا كەلتىرۋ, ماڭىزدى جاڭالىقتار جانە اعىمداعى كورسەتكىشتەرىمەن تانىسۋ مۇمكىندىگىنە يە بولسا, شىلدە ايىندا ىسكە قوسىلعان «WhatsApp» قىزمەتى ەل ىشىندە جانە شەتەلدە جۇرگەندەرگە جيناقتاۋشى زەينەتاقى جۇيەسى تۋرالى قاجەتتى اقپاراتتى جەدەل الۋعا مۇمكىندىك بەرەدى. ال قور بولىمشەلەرى جوق اۋدانداردا زەينەتاقى قىزمەتتەرىنىڭ قولجەتىمدىلىگىن قامتاماسىز ەتۋ ماقساتىندا «موبيلدىك كەڭسە» جوباسى ىسكە قوسىلىپ, قاجەتتى تەحنيكالارمەن جانە جەرسەرىكتىك بايلانىس قۇرالىمەن جابدىقتالعان. بيىلعى جىلدىڭ 16 ءساۋىرى مەن 30 ماۋسىمى ارالىعىندا «موبيلدىك كەڭسە» 75 رەت جولعا شىعىپ, رەسپۋبليكا ايماقتارى بويىنشا سالىمشىلارمەن بايلانىس ورناتتى.
ەلۆيرا سەرىكقىزى,
«ەگەمەن قازاقستان»
الماتى
