قويىلىم اتى اڭىزعا اينالعان ءبيشى ءارى حورەوگراف رۋدولف نۋرەەۆكە ارنالعان Tributo a Rudolf Nureyev حالىقارالىق گالا-بالەتى اياسىندا 28 شىلدە كۇنى ءبىزدىڭ داۋىرىمىزگە دەيىنگى ءى عاسىردان بەرى ساقتالىپ كەلە جاتقان كونە ريمدىك امفيتەاتر, سپولەتو (يتاليا) ريم تەاترىنىڭ اشىق ساحناسىندا وتكەن بولاتىن. الەمدىك بالەت جۇلدىزدارىنىڭ ورىنداۋىندا كورەرمەندەرگە ر. نۋرەەۆتىڭ رەپەرتۋارىنان نومىرلەر ۇسىنىلدى.
رولان پەتيدىڭ «بوزبالا مەن اجال» اتتى ءبىر ءبولىمدى ايگىلى بالەتى 1946 جىلى يوگانن سەباستيان باحتىڭ پاسساكاليا مۋزىكاسىنا قويىلدى, وعان ارقاۋ بولعان جان كوكتونىڭ ولەڭمەن جازىلعان ليبرەتتوسى. گالا-بالەتكە ارناپ قويىلىمدى جۇزەگە اسىرعان ر.پەتيدىڭ اسسيستەنتى – بالەتمەيستەر لۋيدجي بونينو, ول ءوزى دە ءبىر كەزدەرى بوزبالانىڭ پارتياسىن ورىنداعان بولاتىن. باقتيار ادامجاننىڭ ساحناداعى سەرىگى بولعان ايگىلى ميلاندىق لا سكالا تەاترىنىڭ پريما-بالەريناسى نيكولەتتا مانني.
بۇدان بولەك, باقتيار ادامجان وسى كەشتە ۆەنگريا مەملەكەتتىك وپەراسىنىڭ پريماسى تاتيانا مەلنيكپەن ل.مينكۋستىڭ «دون كيحوت» بالەتىنەن پا-دە-دەنى ورىندادى. يتاليالىق كورەرمەندەر ب. ادامجاننىڭ ءاربىر ساحناعا كوتەرىلۋىن تولاسسىز قوشەمەتپەن قارسى الىپ, قازاقستاندىق بالەت جۇلدىزىن زور سۇيىنىشپەن قابىلدادى.
باعاشار تۇرسىنباي ۇلى,
«ەگەمەن قازاقستان»
