«رۋحاني جاڭعىرۋ» باعدارلاماسى اياسىندا اتقارىلعان بۇل جوبانىڭ العاشقى كەزەڭى وتكەن جىلى تابىستى جۇزەگە استى. «قازاقستاننىڭ 100 جاڭا ەسىمى» قاناتقاقتى جوباسى بىردەن قوعامدىق تالقىلاۋعا ءتۇسىپ, حالىق تاراپىنان قىزۋ قولداۋ تاپقان بولاتىن. ۇيىمداستىرۋشىلارعا وسى جوبانى جالعاستىرۋدى وتىنگەن, جاڭا تابىستار تاريحىن ساراپتاۋ تۋرالى ۇسىنىستار كوپتەپ تۇسكەندىكتەن اقپارات جانە كوممۋنيكاتسيالار مينيسترلىگى قازاقستان حالقى اسسامبلەياسى حاتشىلىعىمەن اقىلداسا كەلە, جوبانىڭ ەكىنشى كەزەڭىنە ىرىكتەۋ جاريالاۋدى ءجون دەپ شەشتى.
بيىلعى ىرىكتەۋدىڭ تالاپتارى بويىنشا ۇمىتكەر ەلدىڭ جاعىمدى ءيميدجىن قالىپتاستىرۋعا ىقپال ەتەتىن سالالاردا جارقىن جەتىستىكتەرى بار, كەيىن ونى قوعامدا ىلگەرىلەتۋ بەدەلىنە يە 18 جاسقا تولعان قازاقستان ازاماتى بولۋى شارت. سونداي-اق قاتىسۋشىنىڭ قوعامدىق-ساياسي جانە ەڭبەك جولى وزگەلەرگە ۇلگى بولۋى ءتيىس. جاستاردى ادامگەرشىلىك, پاتريوتتىق تۇرعىدا تاربيەلەيتىن, تۋعان جەرىن سۇيۋگە ۇندەپ, قوعامدا ەڭبەك كۋلتىن قالىپتاستىرا الاتىن ادامدار مەن زاماناۋي قازاقستاننىڭ دامۋىنا ناقتى ۇلەس قوسىپ, ەلىمىزدىڭ جەتىستىكتەرى مەن تابىستارىن بەينەلەي الاتىن ازاماتتار قاتىسا الادى. جوباعا قوعامداعى بارلىق سالانىڭ وكىلدەرى: دارىگەرلەر, كاسىپكەرلەر, عالىمدار, مۇعالىمدەر, سپورتشىلار, ونەر قايراتكەرلەرى جانە وزگە دە سالادا ونەگەلى ەڭبەك ەتىپ جۇرگەن ادامداردىڭ قاتىسۋىنا مۇمكىندىگى بار. «قازاقستاننىڭ 100 جاڭا ەسىمى» جوباسىنىڭ ەكىنشى كەزەڭىنە قاتىسۋعا سالالىق اسسوتسياتسيالار, قوعامدىق ۇيىمدار مەن بىرلەستىكتەر تاراپىنان دا بەلسەندىلىك كۇتىلۋدە.
ەلباسى بۇل جوبا تۋراسىندا: «جوبادا ناقتى ادامداردىڭ ناقتى تاعدىرلارى مەن ءومىرباياندارى ارقىلى بۇگىنگى, زاماناۋي قازاقستاننىڭ كەلبەتى كورىنىس تابادى. تاۋەلسىزدىك داۋىرىندە ءوزىنىڭ ەڭبەگىمەن, بىلىمىمەن, ونەرىمەن وزىپ شىققان قانشاما زامانداستارىمىز بار. ولاردىڭ ءجۇرىپ وتكەن جولدارى – كەز كەلگەن ستاتيستيكادان ارتىق كورسەتكىش. جاستار ومىرگە شىنايى كوزبەن قاراپ, ءوز تاعدىرلارىنا وزدەرى يەلىك ەتە الاتىن ازاماتتار بولۋى ءۇشىن ولارعا ۇلگى ۇسىنۋىمىز كەرەك», دەگەن بولاتىن. سونداي-اق «قازاقستاننىڭ 100 جاڭا ەسىمى» جوباسىن ىسكە اسىرۋدىڭ ماڭىزىنا نازار اۋدارىپ, وعان قاتىسۋشىلارعا قوعام تاراپىنان ارتىلعان جاۋاپكەرشىلىكتىڭ مول ەكەنىن ەسكەرتكەن-ءدى.
جوبانىڭ العاشقى كەزەڭىندە 340 مىڭنان استام قازاقستاندىق وزدەرى تاڭداعان تۇلعالارعا 1 ميلليون 376 مىڭ داۋىس بەردى. ال جالپى تىزىمگە قاتىسۋعا 2100 ادام ءوتىنىش ۇسىنعان. بۇگىندە «100 ەسىم» اتانعان ازاماتتار ءتۇرلى الەۋمەتتىك ماڭىزدى شارالارعا قاتىسىپ, جەكە جوبالارىن جۇزەگە اسىرۋدا. سونداي-اق جاستاردى جىگەرلەندىرۋگە ارنالعان سۇحبات الاڭدارىنا سپيكەر رەتىندە قاتىسىپ, جەكە تابىس قۇپياسىمەن جانە تاجىريبەسىمەن ءبولىسىپ ءجۇر.
ۆەنەرا تۇگەلباي,
«ەگەمەن قازاقستان»
