قر ءبىلىم جانە عىلىم مينيسترلىگىنىڭ اقپاراتىنا سايكەس, مەكتەپتەردىڭ اتا-انالارعا باستاۋىش سىنىپتاردىڭ وقۋشىلارىنا جۇمىس داپتەرلەرىن ساتىپ الۋ تۋرالى قويعان تالاپتارى زاڭسىز.
«جۇمىس داپتەرلەرىن ساتىپ الۋ جانە پايدالانۋ – مىندەتتى ەمەس. بۇل وقۋعا ارنالعان قوسىمشا ماتەريال, ونى ۇسىنۋعا بولادى, الايدا ونى جالپىلاي قولدانۋ مىندەتتەلمەگەن. جۇمىس داپتەرلەرىن ساتىپ الۋ تۋرالى تالاپتار زاڭسىز, سول سەبەپتى وسىنداي جاعدايلاردا ءبىز ءتيىستى شارالاردى قابىلايمىز. دەگەنمەن, ولاردى پايدالانۋعا تىيىم سالا المايمىز. سونداي-اق, ءتۇرلى پاندەرگە ارنالعان حرەستوماتيالار دا بار, ولار دا وقۋعا مىندەتتەلمەگەن.
بۇگىندە اتا-انالار وقۋشىلاردىڭ مەكتەپكە ۇستايتىن سومكەلەرى كىتاپتاردىڭ كوپتىگىنەن وتە اۋىر ەكەنىن ايتىپ شاعىمدانادى. وسىنىڭ ءوزى سەبەپ, ويتكەنى كەي جاعدايلاردا جۇمىس داپتەرلەرىنىڭ ءوزى كىتاپتىڭ كولەمىمەن بىردەي بولىپ جاتادى, سوندىقتان دا قازىرگى تاڭدا قر بعم دەنساۋلىق ساقتاۋ مينيسترلىگىمەن بىرلەسىپ, بارلىق وقۋلىقتار, جۇمىس داپتەرلەرى جانە وزگە دە وقۋ قۇرالدارى بويىنشا ولاردى سانيتارلىق نورمالارعا ساي كەلتىرۋ جونىندە ناقتى ستاندارتتار ازىرلەپ جاتىر», — دەدى ا. ايماعامبەتوۆ.
ءباسپاسوز كونفەرەنتسياسى بارىسىندا ۆيتسە-مينيستر, سونداي-اق, بيىل قازاقستاندا پەداگوگيكا قىزمەتكەرلەرىن اتتەستاتتاۋدىڭ جاڭا جۇيەسى ەنگىزىلگەنىن ايتتى, وندا مۇعالىمدەردىڭ ساناتىنا بايلانىستى ەڭبەكاقى كولەمى وسەدى جانە وسى ەڭبەكاقىعا بەلگىلى ءبىر ۇستەمە قوسىلادى.
«ەڭبەكاقىنى ءوسىرۋ تۋرالى ايتقان كەزدە, ەكى جاعدايعا بايلانىستى قاراستىرامىز. ءبىرىنشىسى – بۇگىندە جاڭارتىلعان باعدارلامالار بويىنشا جۇمىس ىستەپ جۇرگەن مۇعالىمدەردىڭ ەڭبەكاقىسىن ءوسىرۋ, بۇل — 205 مىڭ مۇعالىم. ولار بۇل تولەمدى قازىرگى تاڭدا الىپ جاتىر, ءتيىستى قاراجات رەسپۋبليكالىق بيۋدجەتتەن ءبولىندى, ترانسفەرتتەرمەن جەرگىلىكتى بيۋدجەتتەرگە باعىتتالدى. ەكىنشىسى – ساناتقا قوسىلاتىن قوسىمشا اقى. ەندىگى كەزدە وقىتۋشىلاردىڭ ەڭبەكاقىلارىنىڭ كەستەسى سارالانعان تۇردە جانە ءارتۇرلى كريتەريلەرگە بايلانىستى تولەنەدى», — دەپ تۇيىندەدى ا. ايماعامبەتوۆ.
ەسكە سالا كەتەيىك, بۇگىن قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا ءبىلىم بەرۋدى جانە عىلىمدى دامىتۋدىڭ 2016–2019 جىلدارعا ارنالعان مەملەكەتتىك باعدارلاماسىنىڭ وسى جىلدىڭ 6 ايىندا ىسكە اسىرىلۋ بارىسى, سونداي-اق ۇلتتىق بىرىڭعاي تەستىلەۋدىڭ جانە وقۋعا ءتۇسۋ ەمتيحاندارىنىڭ قورىتىندىلارى قارالدى.
